السلام عليكم ورحمة الله وبركاته
بطاقتك الشخصية :
الاسم: ام ادهم
السن:34
المؤهل العلمي:بكالوريوس هندسة /قوى وآلات كهربية
المهنة:ربة منزل
الجنسية: مصرية واعيش في الامارات
عرفينا بنفسك كأم
كم طفل لديك
طفلين ربي يحفظهم
أدهم و يامن
وماهي اعمارهم ؟
أدهم: خمس سنوات و9شهور
يامن :سنتين الا شهر
ماهي الطرق التي تعتمدي عليها في تربية اطفالك ؟ دايما بشوف امي قدامي وبشوف ازاي كانت بتربينا وبحاول اعمل زيها ربنا يخليها ليا ويحفظها ويبارك في عمرها
والوسطية في كل شئ احسن الطرق للتربية
لا اشد ولا ارخي
بس ادعولي اقدر وابطل عصبية بس الحمد لله بحاول امسك نفسي علشانهم لان دايما بقول ده الوقت اللي بيكونو فيه الذكريات
وعايزة اسيب ليهم ذكريات سعيدة معايا
هل تستمعي لنصائح من حولك من اهل وصديقات وجارات وتطبقيها بحذافيرها ؟
ام انك تمتلكي خط محدد لك ولزوجك في تربية اطفالك؟
طبعا بستمع لنصائح امي واختي الكبيرة وحماتي
بس مش بطبقها بحذافيرها دايما ,,يعني بشوف ايه اللي يناسب اطفالي وظروفهم وبعمله وللاسف مليش جارات هنا كتير او صديقات,,, لكن انتم خير اخوات وصديقات وبستفيييد كتير منكم بجد ,,,
لازم استمع للنصائح واسعى ليها كمان
ماهي اجمل اللحظات التي تكوني فيها سعيدة وانت مع اطفالك ، النوم ، اللعب ، الطعام أو غيرها ........؟
ربنا يحفظهم يارب كل الاوقات بكون سعيدة معاهم
طبعا الا اوقات لما اكون معصبة منهم يا ساااااتر ببقى عايزة ارميهم في الشارع ههههههههههه
بس اكتر وقت بكون سعيدة لما هما بيكونوا سعداء وبيضحكواويبلعبو ا ,,,,ولما اجيب لهم اواعملهم حاجة ويفرحو بيها يا سلااااااااااام الدنيا ما بتساعني ساعتها والله
وعلشان اكون صريحة وقت لما بيكون يامن نايم علشان اقدر اعمل حاجة مع ادهم نذاكر نحفظ قران لانه ما شاء الله عليه مش بيخلينا نعمل اي حاجة وهو صاحي هههههههه
أول مارأيت مولودتـ/ك بعد الولادة ماهي مشاعرك التي راودتك حينها ؟
يا سلام غمضت عيوني ورجعت لاجمل لحظه يارب ما تحرم حد منها ياربولدت قيصري وكان بنج كلي,, واول ما فوقت سالت عن ادهم وسالت ماما ,,هو كويس قالتلي زي القمر ما شاء الله( هو شبه ابوه هههههه)
وجابته لعندي وبوسته ومسكت ايديه
طبعا كنت فرحانه كتيييييييييير
وكان احساس غريب حسيت المخلوق النونو ده بقا ليا ان الحمد لله
انا جبته للدنيا الله يعينه عليها
رغم التعب في الولادة والالم اول اسبوع بس كانت مشاعر جميلة
ماذا تعني لك كلمة براءة الطفولة ؟
الطفولة هي البراءة فعلا
براءة الطفولة هي عفوية وقلب ابيض ,,حنية,, ضحكة صافية,,,
حضن دااااااااااااااااااااااااااااااافي وبوسة على الخد ,, لمسة ايد ناعمة صغنونه تمسك ايديكي بقوة وحنية,,فرحة لخروجة او فسحة او شراء شيكولاته ههههه,,بكاء يجعلنا نبكي حتى لو على شئ بسيط,, ولما يتخبوفي حضنك من اي حاجة تخوفهم
باختصار
البراءة هي اطفالنا الله يحميهم
-ما هي اصعب مرحلة عمرية في تربية الاطفال
وما هي الصعوبات برايك
متهيألي كل المراحل هههههههههههه
طبعا كل مرحلة فيها صعوبتها
يعني مرحلة الرضيع طبعا قلة نوم ورضاعه بس تقدري تدخلي المطبخ (مثال)حتى لو صاحي اهو جنبك وشايفك
نبتدي الحبو يا سلاااااااااام ابني كبر ما شاء الله نام اكتر ,,,بس اقفلي باب المطبخ وارفعي كل ما تطول يده هههههه
المشي يا نهااار ابيض ابني بقا اكبر ما شاء الله ونومه بقا تماام بس اجري وراه والحقي المزهرية ,,,
اكمل؟؟؟؟ ,,, هههههههههه
ربنا يحميهم كل وقت وله صعوباته
ولسة بستكشف انا,
-موقف مضحك لاحد اطفالك
يامن بيحب الرز بلبن(طالعلي هههههه) وبيرفض اني ااكله المهم سيبته دقايق ادهم صرخ وقال تعالي يا ماما بسرعه روحت لاقيت خير اللهم اجعله خير كل حاجة ابيض في ابيض ,,,هو ما اكلش الطبق هو بقا بيشيل الرز بايده ويمسح التليفزيون والترابيزة(الطاولة) زجاج وليها درج بقت كلها ابيض
وهو وهدومه والموكيت ههههههه
ده مكنش طبق الظاهر اخد الحلة كلها وانا معرفش
المهم زعقت شوية واستغفرت ربي ونضفت
وموقف اخافك
ربنا يحفظهم يارب
كنا في العين من 3 سنين وطلعنا قمةجبل حفيت
وطبعا عاملين سياج حديد ولسة يادوب واصلين وبنتفرج ونشوف العين من فوق القمة مفيش دقيقتين والله ,,ادهم دخل راسه بين سيخين حديدوجه يخرج راسه ما خرجتش انا دمي نشفي وكل اللي بقول ادهم يا احمد ادهم (احمد ده زوجي ههههه)وكان معانا ابن عمي
وابن عمي الله يسامحه كان بيحاول ينط من على السياج وده خطيييييييييييييييييييييييييير يعني يحاول من الجهة التانية(كل ما اتخيل شكله وهو بينط السياج اموت من الخوف )بس الحمد لله ما نطش ,,,جوزي كان طلع راس ادهم بس بعد ايه ,, هو هادي ما شاء الله عليه عكسي تماما بقا يرفع راس ادهم وينزلها لانه زي ما دخلت هاتخرج بس ودانه كانت المشكله هههههه
المسأله ما اخدتش خمس دقايق بس كانت يجي خمس ساعات
بعدها اخدت ادهم وقعدنا في العربية هو يعيط وانا اعيط وماشوفتش العين من على القمة هههههههههه
-مالشئ المهم الذي تركزين عليه لغرسه باطفالك بعد الدين طبعا
والله هو كفاية الدين
يعني لو غرست فيهم كل ما قاله ديننا الحنيف يبقى مش هايحتاجوا حاجة تانية
كل الاخلاق بينص عليها القرآن والسنة
الحمد لله على نعمة الاسلام
بس بعد الاخلاق يجي العلم
وطبعا مهم جدا التعليم
ومش بس التعليم في المدرسة ,,العلوم المختلفة والثقافه يعني بحب اتكلم مع ادهم عن مواضيع مختلفه بشكل بسيط ولما يسالني بحاول اشرح له ,,, وما شاء الله الاولاد اليومين دول عندهم معلومات كتير واسئلة اكتر
ونشكر لك مشاركتنا في مضافتنا
انا اللي بشكركم على الاستضافة الرائعه
واللي قربتني منكم اكتر واكتر
ويارب اكون ضيفة خفيفة
لكم مني كل الود
الروابط المفضلة