السلام عليكم ورحمة الله وبركاته
كيفكم يارشيقات المنتدى الغالي....مابعرف اذا في أحد مفتكرني... انا مشتركة قديمة فالمنتدى كنت مشتركة باسم حنين... صارلي فترة طويلة مافتت المنتدى... بس أنا هلأ محتاجاكم كتير ومحتاجة نصايحكم...
بالمختصر المفيد..أنا عمري 27 سنة وعندي الحمد لله ولدين وبنوتين... الحمد لله صارلي والدة اقل من شهر والله اكرمني بالحلوة حنين...
كالعادة وزي أي ست كان لي تجارب مع السمنة والريجيم...حأقولكم اياها عالسريع...
بعد ماولدت ابني التاني مشيت عنظام ريجيم صحي وقدرت الحمد لله اوصل لوزن حلو... كان وزني 77 كيلو وقدرت اوصل ل65 كيلو... الحمد لله حياتي تغيرت كتيييييييييير وفعلا كإنو رجعتلي الحياة من أول وجديد وزوجي كان طاير فيا طير...
حافظت على هالشي مدة طويلة لحد ماحملت ببنوتي لانا وكالعادة بعد الميلاد تخنت وتخنت وتخنت... ونفسيتي كانت تتدمر شوي شوي واستعملت كل الوصفات السريعة وكل انواع الريجيمات لاني كنت بدي نتايج سريعة وطبعا كلكم عارفين النتيجة المتوقعة... زيادة فظيعة بالوزن وكآبة ويأس مالو حدود...
لحد مافي يوم من الأيام قررت أشيل اللولب لإنو زوجي كان بدو يصير حمل... زفي اليوم اللي شلت اللولب فيه قررت اوزن حالي وصدمت لما لقيت وزني 89 كيلو.... وطبعا شكلي كان مقرف كرشة وارداف وحالة تحفة...
قررت من لحظتها استجمع قوايا واحاول اخلي فترة الحمل هاي فرصة حلوة لاني اخس بالراحة ومن غير ضغط نفسي ومن دون استعجال... يعني بالراحة وشغل نظيف...
والحمد لله الشهر اللي وراه كان في حمل وبلشت هادا التحدي...
حاولت احط قدامي كل النصايح اللي اكتسبتها من مشواري مع الريجيم...وأهمها أنا مابدي أعمل ريجيم... انا بدي أعيش عنظام صحي متكامل... لانو انا مابدي اظلم البيبي اللي في بطني...
والحمد لله كنت آكل كل شي بس احاول أقلل الكمية...بعدت عن الشوكلاتة والحلو والخبز الابيض.. بس ماحرمت حالي منهم... يعني الحكاية كانت تنظيم أكل وبس...
فالبداية تعبت لاني كنت طبعي اتسلى بالاكل وأتفشش فيه ...بس شوي شوي وبالاستعانة بالله عز وجل كنت اواصل هالتحدي وفاليوم اللي اخربط فيه ارجع اخفف تاني يوم... اوعو تفكرو انو وحامي كان سدة نفس مثلا لا بالعكس بس انا كنت دايما اذكر حالي انو كيف حيكون وضعي اذا زاد وزني فالحمل وصرت فالتسعينات...لاني منظري ووزني كتير بيأثروا عنفسيتي.. وكنت كل ما افتكر مود الكآبة اللي كنت عايشاه قبل الحمل أحس بغصة فظيعة ما الها حدود...
المهم بس ماتكونو زهقتو مني....
الحمد لله اول شهر نزلت 4 كيلو...مع اني كنت آكل كل شي بس بتنظيم...
وكل شهر بعدها كنت انزل 2كيلو أو كيلو... وكانت نفسيتي يوم عن يوم بتتحسن الحمد لله... عن جد قديش السمنة شي بشع ومدمر وقديش الرشاقة شي ممتع ورائع...
الله يكرمنا جميعا عطول..
وقديش كان احساسي بالنجاح والانتصار عنفسي رائع وحلو...
لحد ماصار الي اول يوم فالشهر الخامس... كنت واقفة على مفترق طرق وما كنت عارفة انو الله مخبيلي شي كبير وحياتي كلها راح تتغير من الألف للياء...
مابدي أطول عليكم...بس في هديك الأيام صارت عنا هنا في غزة حرب (حجارة السجيل)...أكيد كلكم سمعتو عنها...
المهم الله أكرمني بهالحرب واستشهد الغالي حبيبي وروحي زوجي العزيز... طبعا الوضع أصعب من انو توصفو كلمات الدنيا كلها...طبعا عشت عذاب مابعده عذاب والله المستعان... واجاني ياحبيباتي ريجيم رسمي اسمه بحص وزعل وشوق وضغوطات وحاجات الها أول مالها آخر...
المهم عدت فترة الحمل بفضل الله بكل مافيها من تعب وعذاب...
لحد الشهر التامن كان وزني صاير78 كيلو.. بس كان الدكتور الحمد لله يطمني عوضع الجنين.. في آخر شهر ونص تنفخ جسمي كتير وبطلت أقدر ادوس على رجليا من التعب والتنفيخ.. وصار وزني في آخر يوم حمل 85 كيلو...
سامحوني اذا زهقتو بس هيا الدنيا كدة حداويت في حداويت...
المهم ولدت الحمد لله بعملية قيصرية وعدت هالايام عخير...والله اكرمني بالغالية حنين...
وهيك بكون بلشت مرحلة جديدة ومشوار طويل بتربية الاولاد...
جواتي مشاعر كتير مخربطة... بس اللي بيواسيني انه الله وحده حاسس فيا وعالم بحالي..وأكيد مادام هوة كتبلي هالشي فأكيد لخير ورحمة...والحمد لله عكل حال...
أكيد انتو بتسألو طيب شو انت بدك هلأ...
بعدت ماولدت وخلصت من عبء الحمل والميلاد أكيد مستنيني الاصعب...وبلشت أحدد أهدافي وشو أنا بدي...
وفعلا أنا كل اللي بتمناه... يزيد قربي من ربنا يوم عن يوم... وربنا يقدرني على تربية أولادي وأرفع راسي فيهم دنيا وآخرة...لإني في قرارة نفسي حاسة إنو زوجي مسافر وبيستناني...الله يجمعني معاه في الجنة يارب...
وأكيد عشان أقدر عهالحمل لازم أكون مركزة ومرتاحة من هم الوزن والريجيم....
ما أطول عليكم... بعد ماولدت بخمس ايام طلعت عالميزان ولقيت وزني بفضل الله...75 كيلو.. يعني بكون كدة من يوم ماحملت خسيت 14 كيلو...
كتير كنت راضية عن نفسي الحمد لله وكان شكلي مقبول...
ماتستغربو وتقولو انت في ايش وللا ايش... بس انا كدة عندي عقدة من الوزن والسمنة...
المهم بعد كدة حطيت قدامي هدف انو مش لازم أخس بس عالاقل ماأزيد عشان تضل نفسيتي مرتاحة من هالموضوع... بيكفيني الضغوطات التانية..
المهم انا هلأ صارلي شهر والدة... ويوم عن يوم بنزيد رغبتي بالأكل ... بحس بالجوع كتير وبصحى بالليل بآكل.. ووضع مأساوي...
أنا هلأ خايفة من حالي كتير...خايفة أرجع لتخبيص زمان وأتفشش بالأكل ونفسيتي تتدمر شوي شوي...خصوصا اني لقيت وزني زايد 2 كيلو...
حابة تساعدوني وتنصحوني مابدي أضيع كل تعبي ومش قادرة أسيطر عحالي خصوصا مع الرضاعة....
كل يوم بأصحى وأنا ناوية أرجع لتنظيم الأكل وبعدين بأفشل...
صدقوني هادا الموضوع مهم الي كتير لإنو نفسيتي بتتأثر بسرعة.. وعن جد أنا مش قادرة أنضغط من هالموضوع كمان...
حابة تشاركوني تجربتي يمكن تصحى فيا الإرادة والعزيمة...
سامحوني طولت عليكم...بس ادعولي من قلوبكم...
الروابط المفضلة