سلام عليكم
الحكايه من الاول اني عمري مازاد وزني عن 60 لمدة 15 سنه حمل وولاده ورضاعه وأرجع تاني وفي وقت قياسي لل 60
كنت بنصح أهلي وقريباتي وأصحابي لدرجة انه كانو بيقولوا عليا دكتوره تخسيس عارفه كل كبيره وصغيره عن ازاي اوصل للوزن المناسب وعارفه الاكل الصحي والسعرات والرجيمات المضره والمفيده
ظروفي اتغيرت وسافرت مع زوجي وقعدت في البيت بعد ماكنت بنزل الشغل كل يوم واخر النهار أنزل اوصل الدروس واخرج ازور أصحابي واشتري طلباتي بقيت قاعده في البيت 24 ساعه مابنزلش غير في الاجازه مع وزوجي اشتري أكل وأرجع اكله
المصيبه انه كل ده في شهر ونصف بس ومع اني كنت حاسه وعارفه اني بتخن بس مفيش فايده مابوقفش أكل وخيرا اشتريت ميزان ووزنت لقيت نفسي 69
شوفتوا المصيبه في شهر ونصف زياده 9 كيلو عمري ماكنت بالوزن ده قبل كده حتى وأنا حامل وبرضع ولما بقول لأخواتي مش مصدقيني لاني طول عمري بتريق على أي واحده مش قادره تنزل وزنها وبقول عليها ضعيفة الشخصيه
9 كيلو طبعا مش شويه ازاي زادو في الوقت القصير ده سبحاااااااان الله بس حقيقي احساس وجود الدهون بالكم ده في الجسم مزعج جدا يمكن علشان زدتهم في وقت قليل فحسه بالتغير في شكلي ولبسي وحركتي وتنفسي وحتى احساسي بالحر
عندي سوال هو ممكن أنزل ال9 كيلو في شهر ونصف زي مازدتهم ولا هاخد وقت اطول في النزول؟؟
المهم اني قعدت مع نفسي ولقيت ان مشكلتي الفراغ وقلة الحركه بعد ما كنت مكوك والاكل الغير صحي
علشان كده أنا لازم مااكونش ضعيفة الشخصيه وهبدأ من الاربعاء هملا الفراغ هحفظ كل يوم صفحة قران وهتحرك ان شاء الله اتنطط في البيت وهعمل رجيم ورياضه
مين معايا نشجع بعض ونضرب بعض ونبهدل بعض لغاية ماننزل كيلوات الدهون
أنا هبدا هبدا ان شاء الله حتى لو لوحدي بس لو معايا حد يكون أحسن
نظامي هيكون:
1- حفظ صفحة قران كل يوم
2- شرب 3 لتر ماء يوميا
3- رياضه اقل حاجه 40 دقيقه في اليوم
4- رجيم كنت لقيته زمان ومكتوب انه بينقص 4 كيلو في اسبوع بس مش مهم بينقص كام المهم ينقص وخلاص حتى لو كيلو واحد
نظام غذائى لانقاص 4 كيلو فى الاسبوع
- الأفطار:
- 2ملعقة جبنه قريش + توست سن + سلاطة
- وبعد الأفطار بساعتين ثمرة فاكهه تفاح
- وبين الأفطار والغذاء 3 ثمرة خيار وثمرة جزر أو 3 قطع بروكلي وثمرة جزر
- الغذاء: صدر فرخه مشوي + طبق سبانخ مسلوقه + بطاطس مشويه
- العشاء: بيضه مسلوقه + كوب عصير طماطم
- اليوم الثاني:
- الغذاء: 8ملاعق مسقعه بالباذنجان المشوي والفلفل الأخضر واللحمه المفرومه + 1خبز ريجيم +سلاطة
- العشاء: كوب لبن خالي الدسم + ثمرة تفاح
- اليوم الثالث:
- الغذاء: 100جم لحمه مشويه + بصله مشويه بالفرن +طبق خضار سوتيه بدون دهون +كوب عصير ليمون
- العشاء:علبة تونه مصفاه + سلاطه
- اليوم الرابع:
- الغذاء: 2بيضه أومليت مع قطع مشروم + 1خبز ريجيم + سلاطة
- العشاء: 2ثمرة فاكهه
- اليوم الخامس:
- الغذاء: 200جم فليه سمك مع خضروات بالفرن + سلاطة
- العشاء: 3ملاعق جبنه قريش + ثمرة خيار وثمرة طماطم
- اليوم السادس:
- الغذاء: 3ملاعق مكرونه مسلوقه بالطماطم المركزه وفص ثوم + 2قطعة لحم مشوي صغيره + سلاطة
- العشاء: 2بيضه مسلوقه + سلاطه
- اليوم السابع:
- الغذاء: طبق سلطة فواكه من المسموح ( برتقال وتفاح وكمثري وجوافه )
- العشاء: ثمرة فاكهه
- بعد الغذاء بساعتين ثمرة فاكهه
هاه مين تبتدي معايا
الروابط المفضلة