طبعا يا بنات كنتم متابعين معايا معاناتي في تأخر الولاده و ان الدكتوره مكنتش عايزه تستنى و كان رأيها اننا نخلص بالطلق الصناعي و انا قلت استنى طالما مفيش (الحمد لله )اي خطر على الجنين خصوصا بعد ما عملت اشعة دوبلار وضحت ان لحد 30/12 الوضع تمام (مع ان ميعاد الولاده المفروض 20/12)
و انا كنت خلاص تعبت و عايزه اولد و اخلص بس قلت اسيبها على ربنا و اكيد كل شئ له ميعاد مهما عملت مش حيتغير
لحد يوم 29 كنت عماله افكر اسمع كلام الدكتوره و لا اعمل اشعه تاني ؟؟؟؟؟؟!!!!!!!!!!!!
و من كتر التفكير كانت راسي حتنفجر و نفسيتي زفت
و دخلت انام عادي بس مع الفجر ابتديت احس بوجع مستمر على خفيف لحد الساعه 8 الصبح بقى وجع يروح و يجي و بيسمع في ضهري فقعدت ادعي يبقى طلق ولاده و صحيت جوزي و قلتله استعد معايا و قعدنا لحد ما انتظم الوجع (هو اصلا كان طلق جامد و كل 3 او 4 دقائق و بيطول اكتر من دقيقه)
و كلمت الدكتوره و رحتلها المستشفى كشفت قالتلي الرحم فتح 3,5 سم و (كالعاده)يالا نستخدم طلق صناعي حنخلص في اقل من ساعتين
بس انا كنت عايزه الطلق يشتد لوحده و الرحم يفتح براحته و قلتلها انا حاروح و حامشي لحد ما احس انه خلاص حارجع المستشفى تاني
قالتلي براحتك!
و فعلا روحت و مشيت و كنت باتعذب من الوجع اللي بيزيييييييييييييد بس كنت بادعي و اقرأ قرآن و بحاول معيطش او اصرخ لحد ما خلاص مبقتش قادره و كمان لقيت دم قلت مبدهاش و كان الساعه 8 مساء
رحت المستشفى و جت الدكتوره و كشفت قالتلي ولاااااااااده و دخلتني غرفة الولاده على طول و انا مستنيه البنج و هي تقولي مينفعش لحد ما الراس تنزل وكل ماتيجي طلقه تقولي ادفعي لتحت جاااااااااااااااامد وانا بحاول و مش قادره و الموضوع طول و هي عماله تحاول توسع بايدها و تمسك الراس لحد ما قالتلي الراس مقلوبه و لازم تلف الاول!!!!!!!!!!!!!!!!!!!!!!!!!!!!
وده طبعا يعني عذاب زياده و انا عماله اترجاها تديني بنج و تعمل اي حاجه و هي قالتلي لو الراس ملفتش حتضطر تفتح فتحه كبيره للتوسيع و تضغط على الرحم وممكن تسببلي مشاكل !!
و فضلنا كده لحد ما حسيت اني بموووووووووووووووووت و مش حطلع للدنيا تاني و كان كل همي بنتي اللي سيباها في البيت مين حيربيها
و بجد والله اتعذبت بطريقه رهيييييييييبه لحد ما حسيت ان الراس اتعدلت وحتخرج فصرخت صرخه كأن روحي بتطلع و بعدين بنجتني (اخيرا) بس مسلسل العذاب مرضاش ينتهي لحد كده اتاري مفعول البنج راح وهي بتخيط كام غرزه كده!!!!!!
فتخيلوا خياطه في المنطقه دي بعد كل العذاب ده و انتي حاسه و شايفه !!!!!!!!!!!!!!!
اتاري بعد كل ده الباشا لما راسه ظهرت اكتشفوا انه حاطط ايده على كتفه و مش حينفع يخرج الا بفتحه زياده !!!!!!!!!
و الحمد لله لحد دلوقتي مجرد ما افتكر باحس بالوجع على طول بالايحاء
بس بصراحه حسيت كده ان ربنا بيخلص ذنوبي على قد التعب اللي شفته
و سبحان الله الولاده كانت يوم 30/12 يعني آخر يوم حددته الاشعه قبل اي تدخل من حد
معلش طولت عليكم بس انا كنت وعدتكم اني حاحكيلكم
و ربنا يقوم كل حامل بالسلامه و يرزقها ولاده سهله و يرزق كل محروم بالذريه الصالحه
الروابط المفضلة