السلام عليكم
اخواتى حبيباتى انتوا عاملين ايه .. يارب كلكم تكونوا بخير ان شاء الله
بصوا بقى انا عملت البيتزا وعاوزة احكيلكم بالتفصيل الغير ممل بقدر الامكان عشان تفيدونى
وخاصة ان دي اول تجربة ليا مع البيتزا وكمان انتوا عارفين انا لسه جديدة ومبتدئة مش شاطرة زيكم ما شاء الله عليكم
أولا:
انا عملت عدد 2 بيتزا
1- بيتزا سوسيس
2- بيتزا باللحم المفروم
ثانيا:
طريقة التحضير::::
انا طبقت طريقة عجينة ال 10 د اللى الكل بيحكى عنها
وعملت اللى قولتوا عليه
حطيت المكونات الاولى واستنيت عليها 10 د .. وبعدها حطيت الدقيق والزيت وعجنت
وبعد ما خلصت فردتها في الصيينة وعليها صلصة هاينز و حلقات بصل وطماطم وفلفل رومى حلو مقطعين صغيرين
ومعاهم السوسيس مقطع حلقات بعد سلقه " او لحم مفروم في الصينية التانية " وفوقهم جبنة مودزريلا من دومتى
وحطيتها في الفرن بعد ما سخنت الفرن
وبعد حوالى 30 دقيقة تقريبا حدث الاتى
ملاحظات اثناء التحضير:::
1- العجينة مسكت بالعافية كانت معجنة اوى وقعدت ازود دقيق كتيييييييييير اوى لغاية ما مسكت يا دوب بالعافية هل ده بسبب الماء والوسائل اللى حطيتها؟؟
2- المقادير اللى قولتوا عليها من الماء (2 كاس ماء ؟؟ ما مقدار هذا الكاس ..؟؟ انا حطيت كوبين)
ملاحظات بعد النضج:::
1- ارتفعت العجينة اوى وكانت تخينة
2- الجبنة المودزريلا المبشورة ما ساحتش ع الوش وكانت زي ماهى ونشفت كمان
3- بناء على رقم 2 البيتزا ما كنت بتتمط وتتشد زي بيتزا المحلات
4- البيتزا كانت ناشفة من فوق مش طريه وفيها سوايل شوية .. لكن الحمد لله العجينة نفسها كويسه مش ناشفة
دى تجربتى وحبيت اقولكم عليها عشان تقولولى اتفادى العيوب والمشاكل دي ازاى
واتمنى اعملها قريب وتكون ولا اجمل من المحلات
مستنية رايكم
الروابط المفضلة