تعالو احكيلكم عملت ايه من ساعتين
انا كنت مفضيه الثلاجه من المغرب عشان اغسلها وابتدى اشترى اللحوم وحاجات رمضان كل سنه وانتو طيبين
المهم فضيت كل الثلاجه ووديت الخضار عند الجيران كان باقى اشياء بسيطه بس مش حتخرب عادى سبتها
صحيت من النوم وافتكرت انى ناسيه بيض فى الثلاجه وهى بدأت تسخن طبعا خفت على البيض يخرب ويترمى بصراحه كانو 7 بيضات وانا احترت تعملى فيهم ايه يا سمسم
انا عمرى ما استعملت 7 بيضات لا فى كيك ولا فى عجين
المهم قلت خلينى اخترع كيكه وزى ما تطلع تطلع
كان عندى لبن رايب وعلبة زبادى باقى منها حوالى معلقتين من نور قلت خلينى استغل كل المكونات اللى عندى واخترع يمكن!!!
المهم بلاش رغى كتير ندخل فى الموضوع
_ضربت ال7 بيضات فى الخلاط ومعاهم حوالى 2 معلقة صغيره فانيليا انا بحب الفانيليا فى الكيك تكون ظاهره
_وبعدين ضفت عليهم كوب سكروخلطتهم مع بعض
_ضفت كوب الاربع زيت
_وبعدين ضفت كوب اللبن الرايب ايوه لبن رايب
وعاهم معلقتين الزبادى
وضربت كله مع بعض فى الخلاط
_فى وعاء اخر حطيت 2 كوب دقيق مع ملعقه كبيره وشويه باكينج باودر وذرة ملح وقلبتهم عشان يدخل الهوا
_بعدين ضفت الخليط السابق بالتدريج وقلبت بالمضرب اليدوى على خفيف
وضعت جزء من الخليط فى قالب
وباقى الخليط ضفت عليه زبيب مخلوط بالدقيق وقلبته ووضعته فى صينيه
انا هنا رشيت على الوجه جوز هند وقرفه
وهنا بعد ما طلعت من الفرن شايفين هشه ازاى
كيكة الزبيب مش محروقهانا بس بحب احمر الوجه ومتنسوش انى حاطه عليها قرفه وجوز هند يعنى مش محروقه
شايفين هنا الكيكه عن قرب ازاى منتفخه وهشه من الداخل
وده طبق تانى
يارب تعجبكم بصراحه هى خفيفه وسكرها خفيف وحلوه الصبح مع الشاى
الروابط المفضلة