حكايتي هذه عن وحده من الجيران اللي مثل ما يقولون عنهم وجوههم مثل اللوح ..هذه وحده كل ما اتشوفني لازم تطلب شي اي شي تبيه واخر شي قامت تتسلف فلوس ...المشكله ما هي مره وحده قولو مرات ومرات وتتم اتلح في الطلب ..مرات اتقول انا محتاجه ومرات اتقول افلوسي انسرقت ومرات اتقول انا بسافر ساعديني بردهن ومرات اتقول انت والله مثل اختي وان شالله بردهم لج لكن المشكله من تاخذ الفلوس ما اشوف الا غبرتها وما اشوفها مره ثانيه لا هي والا الفلوس ..
الحبيبه وين ..والله تعيد نفس الموال على ناس طيبين مثلي .. عاد الواحد ما يستوي وجهه لوح بالمره .. وما فيها فايده اترد وتطلب بعد ما تخترع حجج جديده .. والله اني زهقت منها ما اعرف كيف اتعامل وياها ..
طبعا انا شو سويت قلت للوالده راعية الافكار الجهنميه ..قالت يا بنتي تبينها ما تطلبك مره ثانيه وحتى لو انت تبينها بتهرب منك !! قلتلها يا ليت كيف الوسيله ؟؟!! قالت اتصلي فيها والا روحيلها واطلبي منها انت هذه المره تتسلفين فلوس وقوليلها انك محتاجه لهم ضروري . وشوفي شو بتسوي !!
طبعا انا على طول استعملت هذه الخطه الجهنميه ورحت الها وبعد ما اتقهويت عندها وقلتلها طلبي ارفعت حواجبها مستغربه وقالت فالج طيب بس اصبري على يومين .. انا قلت في خاطري بصبر سنتين هاهاهاها بشوف شو اخرتها ..
الحبيبه ما شفت لها اثر ولا سمعت لها صوت واذا اتصلت لها يردون اعيالها يقولون ماما مش موجوده .. اعتقد انها هاجرت
هاهاها المهم نجحت الخطه .. مالها الا كذا زهقتني حياتي من بعد ما كانت تلحقني صرت انا الحقها ..بس طبعا انا ما اريد منها شي الا بس اتكف اذاها عني ..واسمحولي ..((الجار قبل الدار )).
الروابط المفضلة