كل عام وأنتم بخير بمناسبة حلول شهر رمضان
مشغولة؟
رزقت بطفل جديد و مشغولة بيه جدا و مش لاقية وقت؟
عندك شغل فترات طويلة في اليوم؟
عندك أولاد و شغل البيت مش بيخلص ؟
مشغولة علي طول و مش لاقية وقت؟
حاسة بزهق و كسل و ضيق في الصدر؟
حاسة انك عمالة تجري و مش عارفة تقفي؟
رمضان دخل و مش عارفة تعملي ايه؟
تعالي الموضوع ده علشانك
بصي يا أختي المشغولة انا كمان مشغولة زيك بالظبط عندي بيبي جديد و بيبي قديم و طبعا شغل البيت زي ما انتم كلكم عارفين
عشان كده فكرت أعمل الموضوع ده لكل اللي زيي و مشغولين ربنا معانا و يعيننا
انا مش هأكتب كلام مكرر و لا هأكتب آيات في فضل الذكر و القران و خاصة في رمضان لأن و الحمد لله كلنا عارفين الكلام ده
انا هنا همي التنفيذ
يعني هأتكلم من قلبي لقلوبكم هأقول مشاعري انا
انا طبعا مشغولة جدا سهر بالليل شغل بيت بالنهار و حاسة بالارهاق
يعني من الاخر ماعنديش وقت أصلي زيادة لأن اصلا مع الدوامة دي لو صليت الفروض و النوافل في أوقاتها يبقي الحمد لله اوي
عشان كده فكرت ايه ممكن يعوض الانشغال الدائم ده خاصةفي رمضان و مفيش حد يقدر يفوت رمضان عشان طبعا مفيش حد ضامن انه يشوفه تاني
اللهم بلغنا رمضان
فكرت اني أشوف ايه أكتر العبادات أجرا و أقلها مجهودا و طبعا مفيش حاجة تحلا من غير أخوات معايا نعين بعض و نشجع بعض
أدخل في الموضوع بقي
المطلوب في الحملة:
1- الاستغفار يوميا علي الأقل 200 مرة او 10 دقائق ممكن نزود بس دي البداية طبعا
2- الصلاة علي النبي علي الأقل 100 مرة يوميا او 5 دقائق
3- قول " لا اله الا انت سبحانك اني كنت من الظالمين " علي الأقل 100 مرة يوميا او 5 دقائق .
4- قول " سبحان الله و الحمد لله و لا اله الا الله و الله أكبر " علي الأقل 100 مرة يوميا او 5 دقائق لكل واحدة منهم
5- قول " لا حول و لا قوة الا بالله ) علي الأقل 100 مرة يوميا او 5 دقائق .
6- قول " سبحان الله و بحمده سبحان الله العظيم"علي الأقل 100 مرة يوميا او 5 دقائق .
7- قراءة جزء من المصحف (ده شهر القران)عشان نختم ولو ختمة واحدة في رمضان كله (ربنا يقدرنا)
8- صلاة 4 ركعات تراويح بعد صلاة العشاء (او تزودي طبعا بس ما تقليش)
9- صلاة ركعتين قيام ليل + ركعة وتر كل ليلة (خير الأمور أدومها و ان قل)
طبعا كل ده قابل للزيادة بس دي اول خطوة عشان نبدأ
طيب هنعمل كل ده امتي؟
و انتي بتطبخي الفطار و كمان السحور و ياريت نخلي الاستغفار في السحور اكتر عشان بيبقي في التلت الأخير من الليل
و انتي بترضعي ابنك او بنتك
و انتي في المواصلات رايحة شغلك
و انتي بتنضفي البيت
قبل ما تنامي
و انتي بتغسلي الاطباق
و انتي بتطوي الملابس
وانتي بتتفرجي علي برنامج ديني (مفيش مسلسلات و لا أفلام كله هيتعاد بعد رمضان 100 مرة )
عشان كده انا حددت عدد او وقت لأن طبعا مش هأعرف أعد و انا بأطبخ او بأعمل اي حاجة تانية لكن ممكن ابص في الساعة ومع التعود طبعا مش هنبطل ذكر بأذن الله
و الله يا بنات لما بأعمل بكده بأحس براحة نفسية و عدم رغبة في الكلام اللي مالوش لازمة يعني لا نميمة بقي و لا حتي كلام تافه لأن الحاجة للكلام اشبعتها بذكر الله لا و ايه أخدت أجر كمان
ها مين هتشترك معايا؟
هندخل كل يوم نقول يومياتنا عشان نشجع بعض
اللي موافقة و هتيجي معايا تقول ياللا و تستعد و هنبدأ من بكرة التدريب ان شاء الله في كتابة اليوميات و من اول رمضان الالتزام حرفيا يا بنات ان شاء الله
و ياللا اللي هتشترك تحط ده في التوقيع و يا ريت تحط عليه الرابط للموضوع عان أكبر عدد يشترك
الروابط المفضلة