من يومين عملت سلطة .. كتير طيبة .. وشهية .. وعجبت أبو الأولاد..
فتت ع المطبخ وكنت جوعانه .. فتحت الثلاجة والفريزر .. وقلت بدي اخترع اشي يكون طيب ومش تقيل ..
طلعت معي هاي السلطة ..
المقادير حسب الرغبة:
بطاطا شيبس مقلية ومنشفة من الزيت ..
كور كفتة دجاج مقلية أو مشوية بالفرن .. قسمتها بالنص..
ذرة مسلوقة..
خس مفروم ناعم ..
خيار مقطع حلقات..
بندورة مقشرة ومفرومة ناعم ..
زيتون مخلي ..
جبنة شيدر مبشورة ..
الطريقة ..
في جاط التقديم أو بايركس افرشي شوية خس وحطي البطاطا المقلية ووزعي كور الكفتة .. بعدين الخيار والبندورة والذرة والزيتون .. وباقي الخس ..
هلأ نيجي للصوص وهون اللذة ..
دقيت حبتين ثوم .. عصرت نص ليمونه .. شوية خل.. أضفت 1 ملعقة كبيرة لكل من: ساور كريم (كريمة حامضة)+ لبنة + لبن زبادي.. قرن فلفل صغير حار نار.. ملح .. فلفل أبيض .. كمون .. بهارات البيتزا (زعتر وريحان) وبس خلطتهم كتير منيح ..
صبيت الصوص ووزعته على وجه السلطة ونثرت الجبنة ورشيت سماق ..
كتير طيبة وفكرتها مش كتير بعيدة عن فتة الشاورما ..بس طيبة والطعم مختلف ..
وهلأ شوفو الصور ..
وبس .. دعواتكم يا غاليات ..
الروابط المفضلة