الي اخواتي ليبيات

[ماما الاء]

مرحبا حبايب
في مشاركة قبل سالو على الجزيرة نديرو فيها في المناسبات بسكالوب الدجاج
وما شاء الله وخية قبل ردت على السؤال وجابت الطريقة
بس حبيت انحط طرريقتي اسهل واسرع وان شاء الله تعجبكم
اول شئ اني نجيب في صدور دجاج ونقصهم سكالوب بروحي مش يجو كبار وسمان
وكل صدر يعين ربع دجاجة يدير ثلاثة طروف
وناخذ السكالوب تقريبا كيلو يعني 12 طرف سكالوب من غير ما ندقه نخيله سمين وانقعه في
بصلة مبشورة كبيرة + ملعقة صغيرة خردل (مستردة) +ملعقة كبيرة طحينة + كوب صغير خل+ نص كوب صغير عصير ليمونة حامضة + ملح وفلفل اسود حسب الرغبة.
انقعهم ونخليهم ياخدو بعض حتى ساعتين ثلاثة او ممكن نخيلهم في الفريز لوقت الاستعمال
نجو للحشو
بطاطين متوسطات الحجم ينسلقو ويتقعطعو مكعبات صغيرة ومتكونش البطاطا متهرية لازم تكون شادة بعضها + بطلة كبيرة مقطعة مكعبات صغيرة ومقلية في شوية زيت+ شرايح زيتون اخضر واسود + شاريح فقاع + جبنة شيدر + صفار بيضة واحدة + ملعقتين كبار معدنوس مفروم
ومش ادلعي الحشو حطي شوية من تتبيلة الدجاج وخلطيهم مع بعض
ستفي سكالوب الدجاج في طاجين وحطي كاشيك كبير على كل طرف من الحشو اللي درتيها وحطيها في الكوشة من غير ما اطيبي السكالوب على البخار وهيا نية اشويها في الكوشة
وطرقيتي في الشوي هيا انك تفتحي الكوشة من فوق ولوطة وتحطي الطاجين من فوق وخلي الحشو يتحمر لونه بعدين غطي الطاجين بالسلفر وحطيه من لوطة خمس دقايق بالزبط وطلعيه لان صدور الدجاج ما تتحملش النار هلبة كل ما اطيب كل ما تقسى اكثر وتولي زي المطاط وتبدا تغص
لكن بهذه الطريقة ما تجيش جافة والعصارة داخلها ويا سلام عليها
يا خسارة مع اني درتها رمضان بس نسيت نصورها بس باذن الله حنديرها اليومين الجايات ونصورها ليكم وان شاء الله تعجبكم
وزي ما قالو الاخوات الليبيات ماكتنا بنة وصنة ومنظر كمان
هي نشوفوكم على خير مع وصفة جديدة
سلام يا عسل

[omarafa]

اهلا اختنا العزييزه ام الاء ياربي تشبحي صحبه خيره معانا ... وبعدين من غير ماتسألي هاتي كوووووووووول اللي عندك حلويات عيد صقع حاجه هكي حلوه زيك ونزيكه تستر ..وكان فيه حار ومالح هاتي مش مشكله احتي في رمضان ومنصدقوا واحده تقول حاجه جدييده نجروا علمطبخ..في انتظار ابداعاتك .

[ماما الاء]

شكرا على الترحيب الحلو
من عيوني سمحة
نعطيك شن عندي
واليوم نعطيك وصفة درتها جديدة كانت تجربة وجت والله زي العسل
وتستر في المناسبات وصنة وبنة ومنظرها حلو بالمرة
حصـــــــــــــــــــــــــري واختــــــــــــــــــــــــــراعي
ولتوة ما سميتهاش مع ان بابا قالي سميها صوابع لولو بس قاعدة ندور في اسم والشكل النهائي في المرفق
كيلو سكالوب دجاج مدقوق كل طرف منقع في
مبشور بصلة كبير + كلعقة كبيرة طحينة + كوب خل + كوب زبادي صغير + ملح فلفل اسود حسب الرغبة + كاشيك كبير هريسة عربية مفتخرة صنع ايديا وحياة عنيا + قطرتين زيت عادي
يتنقعو مع بعض ما بين ما وتينا الحشو
والحشو عبارة عن
كيمة عادية جدا ( لحمة مقلية في بصل وسمن مع شوية فلفل اسود وملح وتم الموضوع)
ناخذو كل طرف سكالوب ونحطو فيه شوية كيمة ونلفها كاني نلف في كلوني ونستفهم جنب بعض في طاجين من غير ما ندهنه باي شئ وبعدين نخليهم يتنقعو اكثر وتاخد الحشوة من بنة التنقيعة متاع السكالوب
قبل المغرب بربع شاعة نسخن الكوشة كويس من فوق ولوطة ونحط الطاجين ونشويهم من فوق قبل لين يتحمرو وبعدين نغطيهم بالسلفر ونحطهم من لوطة حوالي خمس دقايق مش اكثر
وتاكلوهم بالهناء والشفاء
وممكن جدا يتزين بالجبنة من فوق او خطوط مايونيز بس اني اليوم مستعجلة وحطيتهم بسرعة في السفرة
وان شاء الله يعجبوكم صدقوني طلعو يجننو
وسلام يا حلوين يللي بالعسل مقطرين

[ماما الاء]

اسفة جدا نسيت ان الموضوع مكتوب في قسم الحلويات وحطيت حار هني
بالنسبة للحلويات اني نحب نخلط كل شئ ببعضه ونخترع
يعني ما عمر يخديت طريقة وطبقتها بالزبط لازم نغير ونذف على هوايا وكيف ما نبي ويجي في خاطري
بس ديما يكون الاساس واحد نقصد العجنة تكون نفس المقادير ومعروفة ومزبوطة وانتي تغيري في الشكل والحشو كيف ما تبي
بالنسبة للعجية اللي تغطيتها بالسكر المرحي فتكون
كوب زبدة + كوب سمن + نص كوب عطر او زهر او ماء عادي حسب الرغبة والوصفة+ ملعقة صغيرة بكمبودر + نص كوب سكر مرحي + ما يعجنهم دقيق
وانتي شكلي واحشي واخترعي كيف ما تبي
العجية اللي مغطية بالشكلاته
كوب زبدة + بيضة + ثلاثة ملاعق نشا + ثلاثة ملاعق سكر مرحي + ملعقة صغيرة بكمبودر + ما يعجنهم دقيق
وزي ما قلت خلطي واعجني وشكلي ولوني واحشي حسب ما يجي في خاطرك
العجينة المعسلة
كوب زبدة + كوب زيت + نص كوب سكر مرحي + ملعقة بكمبودر + ما يعجنهم دقيق
عجينة الموالح
كوب زبدة + كوب زيت + كوب حليب او عطر او زهر او ماء حسب التشكيلة متاعك واللي خاطرك فيه وكله يجي حلو + ملعقة صغيرة ملح + ملعقة صغيرة بكمبودر + ما يعجنهم دقيق
وزي ما قلت ديري كيف ما تبي
بس بصفة عامة هذا الاساس
وباذن الله كل مرة حنجيب ليكم وصفة جديدة وشكل جديد من اختراعي وزي ما قلت منحبش اندير الموجود ونتقيد بيه لازم نغير سواء في الطريقة او الشكل
وفي الاخر كله يطلع يا سلام عليه صنة وبنة وشكل حلو ويعجب الكل
وسلام يا عسل

[زينب محمد 2]

و فيك بارك الله أختي جميلة الكون
ماما الاء

أهلاً وسهلاً بك أختي الكريمة

بالنسبة للجزيرة أو الجردينة ادخوا هني

أما بالنسبة للدجاج الملفوف

تستطيعي تغليفه بالدقيق ثم البيض ثم البقسماط ثم يقلى

و ممكن تدهنيه بالهريسة و تحشيه بخليط جبن كريمي مع جبنة كرافت مع حبق

و شرائح زيتون ثم تغلفيه بالدقيق و البيض و البقسماط و يقلى.

صحتين و عافية

[79nana]

79nana صوري بكاميرا النقال أنا كل صوري بها.

أخواتي تفضلوا ادخلوا

خبز مقلي محشي روعة لا يفوتكم

المبطن

زينب محمد اتصدقي ماعنديش نقال خخخخ اني في الغربة والله مادرتاش والكاميرا كانت عندي لاكن للاسف باعها راجلي ولي توا ما شريتش تاني

مرحبا وخياتي الليبيات في كل مكان
ومرحبا بكل محبين الطبخ
ونقولو مرحبتين حتى للي ميحبوش المبطخ وان شاء الله عن قريب تكونو من عشاقه
ما تتصوروش قد فرحتي ولهفتي اني نتلاقى معاكم ونخش ونشارك مع خواتي اللييبيات
من زمان نخش نت بس اول مرة نشوف جو زي هذا حسيت كاني نعرفكم من زمان
وبدون تحديد اسماء حبيت كل الموجودين
وعندي هلبة هلبة هلبة طرق جديدة واللي تبوه اطلبو وتمنو وادللو
عندي الطرق المزبوطة والمقادير حتى لكميات العراس
اختكم عاشقة مطبخ من الطراز الاول ووين ما يكون جماعة يطيبو ندك راسي ونخش بينهم
وعندي كمان وصفات جديدة مخترعة مني
بس نبي براءة اختراع من المنتدى
وان شاء الله نجربو حاجات جديدة مع بعض
وعلى الخير والحب نتلاقو
وزي ما قلت اللي تبي حاجة تدلل على عيني وراسي
وان شاء الله نتلاقوووووو
سلام يا عسل

مرررررررررررررررربتين بيك ماما الاء .. ماشااااااااااااء الله الباين عليك فااالحة وناااشطة ربي يحفظك ياريت تعطينا الي عندك وللامانة رح انقول الحقووق الطبع محفوظة لي ام الاء وندعيلك الله يفتحها عليك يارب

قوليلي انت في ليبيا ولا مغتربة ؟؟؟
تحياتي ليك

[79nana]

اليوم جايبتلكم اللويمة :

كوب زبدة + كوب زيت + 2بيض + ظرف فانيليا +كوب مبشور ليم كيني + كوب سكر مرحي اني مرات انقص شوي لي نصف كوب +ملعقة صغير بيكن باودر
مايعجن دقيق
تعجن وتشكل هلالالالات وتنقششيها من فوق وترش عليها سكر احرش تم توضع في الفرن تم ناخد كل اتنين فوق بعض ومابينهم مربى برتقال او شربات ويرش من الجنب اما لوز مرحي او جوز هند ...

جربوها لدييييدة وخفيفة .

تحياتي للجميع ولي عودة بادن الله

[ماما الاء]

مرررررررررررررررربتين بيك ماما الاء .. ماشااااااااااااء الله الباين عليك فااالحة وناااشطة ربي يحفظك ياريت تعطينا الي عندك وللامانة رح انقول الحقووق الطبع محفوظة لي ام الاء وندعيلك الله يفتحها عليك يارب

قوليلي انت في ليبيا ولا مغتربة ؟؟؟
تحياتي ليك

نجيلي صاحبة الذوق يا رب
حشمتيني باطراءك وكلامك اللي يجنن
اني في طرابلس واي حاجة خاطرك فيها من هني قولي
وعلى فكرة اني مش ام الاء اني ماما الاء
بس نوعدك كان ربي رزقني ببنية حنسميها على اسمي الاء
وسلام يا عسل

[ماما الاء]

ماما الاء

أهلاً وسهلاً بك أختي الكريمة

بالنسبة للجزيرة أو الجردينة ادخوا هني

أما بالنسبة للدجاج الملفوف

تستطيعي تغليفه بالدقيق ثم البيض ثم البقسماط ثم يقلى

و ممكن تدهنيه بالهريسة و تحشيه بخليط جبن كريمي مع جبنة كرافت مع حبق

و شرائح زيتون ثم تغلفيه بالدقيق و البيض و البقسماط و يقلى.

صحتين و عافية

الله يبارك فيك حبيبة
والمطبخ مافيشي قواعد زي ما تبي شكلي ويطلع عسل المهم مكونات تركب على بعض
والحق اني منحبش القلي ماشية على نظام الاكل الصحي
فممكن جدا تقليها بالدحي والخبزة وتدهنيها من الجناب بشوية مايونيز وتحطيها في الفستق يطلع منظرها حلو في المناسبات
وسلام يا عسل

[79nana]

ماما الاء والله استاحشت طرابلس والله اني طرابلسية من باب البحر واستاحشت البلاد هلللللبة ...
والله انت الي دوق لانك اخترتي التواجد امعانا ويارب انكون عندك حسن ضنك
وانت لو احتجتي لي شي في امريكا اني حاضرة بادن الله
ويارب انكون عند حسن ضنك

تحياتي ليك