[جهدملموس] برنامجي اليومي للحصول على بطن مسطح ومشدود
بروز البطن من أكثر المشاكل التي تعاني منها أغلب السيدات وخاصة بعد الحمل والولادة
وكمان أكثر شيء يفسد جمال المرأة مهما كانت رشيقة
ومعروف أن دهون البطن صعبة جدا في التخلص منها لكن أكيد مع الإرادة والمثابرة والإصرار مافيش حاجة
صعبة أو مستحيلة
ممكن أي واحدة تعمل بحث وتشوف ناس كتير كان عندهم بطن وحش جدا بس بعد ما اشتغلو عليها فترة بقت
مسطحة تماما... يعني الحصول على بطن مسطح ومشدود مش مستحيل وأكيد لو حطينا ده في دماغنا واشتغلنا
عليه هنحققه بإذن الله
أنا عملت برنامج يومي ألزمت نفسي بيه وبطبقه بحذافيره وبمشي عليه من فترة والحمد لله فيه فرق واضح جدا
وبطنى ابتدت تتشد
ححط البرنامج ده ولو عجبك ومستعدة تمشي عليه تعالي اديني التمام ونتابع بعض ونشجع بعض
ولو فيه أي جديد نحطه هنا وأي استفسارات أنا جاهزة وهدفنا دايما الاستفادة للجميع
عالريق اشربي كوباية ماء دافي عليه عصرة ليمون كل يوم ( فيه اللي بيقول ان ده مش ليه أي تأثير على البطن
بس أنا قريت إنه بينظف الكبد من السموم والكبد هو المسؤول عن تكسير الدهون في الجسم وأكيد ده حيخليه
يشتغل بكفاءة أعلى ) وبعدها ب10 دقائق اشربي لتر ماء هيخلصك من الامساك اللي هو من ابرز
اسباب بروز البطن وماتاكليش اي حاجة الا بعد 45 د
أول ما تصحي من النوم وانتى لسه في سريرك اشفطي بطنك جامد وكمان اشفطي عضلات البطن السفلية
( كإنك بتمنعي نفسك من التبول ) خذي شهيق عميق واشفطي وعدي لغاية عشرة واعملي زفير وارخي بطنك
اعملي كده عشر مرات
وبالليل وانتى في سريرك وهتنامي اعملي نفس الشيء عشر مرات كمان كل يوم واوعي تنامي على بطنك
إعملي شفط لبطنك وكإنك بتطلعيها فوق اشفطي جامد وارخي بشكل سريع ومتواصل 100 مرة الصبح
و100 مرة المساء و100 مرة بالليل ( أنا ابتديت ب 25 مرة وكنت بزود كل يوم لغاية ما وصلت 100)
قفي بشكل مستقيم على أطراف صوابعك ومدي ايديكي فوق كإنك هتلمسي السقف عدي لغاية عشرة
وانزلي اعملي كده 10 مرات على 3 فترات
الجلوس دائما يكون بشكل صحيح ضهرك مفرود
اول ما تصحي إعملي مغلي شومر وحطيه في ترمس وحطي عليه ملعقة صغيرة ونصف يانسون مطحون متوسط
واشربي منه 3 أكواب كل يوم ( كويس لطرد الغازات وازالة انتفاخ البطن )
اعملي تمارين لكل عضلات البطن ( العليا والوسطى والسفلية والجوانب) لأن تمرين عضلة واحدة مش هيجيب
أي نتيجة
ممكن أحط التمارين بس أنا أفضل إنك تعملي بحث في جوجل وتختاري التمارين اللي تعجبك وتقدري تستمري
عليها تمرين واحد لكل عضلة وتمرين للجوانب اعملي التمارين دي يوم بعد يوم ابتدي بالتدريج وزودي العدد كل
مرة واعمليها بهدوء من غير عنف
ولو عايزة أجيبلك التمارين حاضر أجيبهالك
الرقص البلدي مفيد جدا بس ركزي اوى على عضلات بطنك والخصر
ماتشليش حاجات ثقيلة وتجنبي تماما المشروبات الغازية
أتمنى الاستفادة للجميع ويارب تبقى عندنا بطون مسطحة ومشدودة وحلوة يارب
تعليق