اليوم هاشارك بطبق جديد وغريب وهوصينية السمك الفيلية بالبشاميل
الحقيقة إحنا مش بنآكل أسماك فى رمضان كتير وأنا شخصيا لا أفضله على الإفطار لأنه بيشعرنى بالعطش .. لكن مع إقتراب رمضان على النهاية بنكون زهقنا من المحمر والمشمر وبنآكل أسماك واليوم حبيت أقدم لكم طبق سمك جديد ولذيذ ومش بيعطش زى المقلى
المقاديـــر
٦ قطع سمك فيلية أى نوع أنا إستخدمت التالابيا اللى هو شبه البلطى
٣ أكواب بطاطس مقطعة - حوالى ٢ حبات بطاطس كبيرة
١ كوب فلفل رومى ألوان مقطع
٢/١ كوب كزبرة خضرا مقطعة
معلقتين صغيرتين ثوم مفري
٢ معلقة صغيرة كمون
بصلة صغيرة مقطعة جوانح
٤ معالق كبيرة زيت زيتون
ملح وفلفل حسب الرغبة
للبشاميل هنحتاج
٤ ملاعق كبيرى زيت زيتون
٣ ملاعق كبيرة دقيق - أنا إستخدمت دقيق أسمر !!! وطلع حلو جدا
٣ أكواب لبن حليب
الطــريقـــــة
فى طبق نخلط زيت الزيتون والملح والكمون والثوم جيدا ونقسمهم نصفين
نتبل السمك بنصف التتبيلة ونضيف النصف الآخر لخليط الخضروات ( الفلفل والبطاطس والبصل) وممكن تضيفوا حلقات طماطم لو حبيتو
فى صينية الفرن نضيف الخضروات ثم نضع عليها شرائح السمك
ندخلها فرن مسخن مسبقا على ٣٥٠ فهرنهايت ونتركها حوالى ٢٥ دقيقة
فى هذه الأثناء نجهز البشاميل بأننا نضع الدقيق فى الزيت على النار حتى يشقر لونه ثم نضيف اللبن الحليل واحدة واحدة ونقلب سريعا علشان ما يكلكعش
نخرج الصينية من الفرن ونضيف عليها البشاميل ونرجعها تانى للفرن
تبقى فى الفرن حتى يتحمر والوش بتاعها أو شوية كده ونفتح عليها الشواية
نتركها تهدأ قليلا ثم تقدم بالهنا والشفا مع سلطة خضرا وأرز أو عيش بلدى
وبالهنا والشفا ... عايزة رأيكم .. جربوه ومش هتندموا إن شاء الله وكل عام وأنتم بخير
الروابط المفضلة