السلام عليكم و رحمة الله و بركاته
عرايسنا الحلوين... أكيد أغلبكم تعرفون الكريب... فجبت لكم طريقة لذيذة و سهلة... لكن في النهاية يكون الخيار لكم تغيرون في الحشوات اللي تحبونها على حسب ذوقكم...
نبدأ بسم الله...
هذي الكمية تكفي شخصين، و تسوي 4 أقراص كريب...
عجينة الكريب:
نصف كوب طحين
ملعقة كبيرة سكر بودرة
نصف كوب حليب
بيضة
ملعقة و نصف زبدة سايحة
رشة فانيلا
رشة ملح
نخلط هذي المقادير مع بعض بالخلاط اليدوي، و طبعاً العجينة بتكون سائلة أخف من عجينة البان كيك...
نجيب مقلى تيفال و نذوب فيه قطعة صغيرة زبدة على نار هااادية، و نصب فيه مقدار من عجينة الكريب بحيث نغطي قاعدة المقلى...
بمجرد ما تتماسك و تنشف شوي، نقبلها عالجهة الثانية... و ننتبه ما نحمرها كثير... و هذا شكلها...
بعد ما نخلص من عجينة الكريب، بنستخدم نفس المقلى مرة ثانية عشان نسوي الصوص...
الصوص:
ملعقة كبيرة زبدة
2 ملعقة كبيرة سكر بني
3 ملاعق كبيرة كريمة
رشة قرفة
نحرك هذي المقادير عالنار لحد ما تغلي و تثقل... و ما تاخذ وقت طويل يعني يمكن دقيقتين...
الحين نجهز حشوتنا:
موزتين نقطعهم إلى نصفين بالطول
كاكاو نوتيلا
نصف الموز في المقلى اللي فيه الصوص و نخفف الحرارة و نخليه تقريباً دقيقتين و نقبله مرة وحدة بس خلال هالفترة، و نحاول بالملعقة ناخذ من الصوص و نصب عليه...
الحين نبدأ التجميع
ناخذ قرص الكريب و ندهنه بالنص بكاكاو نوتيلا... و بالملعقة و بحذر، ناخذ شريحة موز و نحطها فوق الكاكاو و نصب فوقها شوي من الصوص...
نلف القرص و نحطه على طول في صحن التقديم و نصب عليه باقي الصوص... و نقدمه طبعاً على طول وهو دافي...
و ألف عافية على قلوبكم
الروابط المفضلة