لحقووووووووووووووووووووووواعلي

السلام عليكم ورحمة الله وبركاته
أختي أحذرك من هذا الشيقور
اسمعي قصتي واحكمي قبل حوالي خمس سنوات كانت فيه زميلة لي تحكي عنه وأنها وضعته في شعرها وبالفعل كان لون شعرها يجنن وكانت مسميته (شاقور) وقالت إنه في بنات من أقاربها حطوه وصار شعرها على قولها شقاره جداً حلو.
المهم يا ستي طلبته أنا وزميلة أخرى وصاحبة المنتج قالت حطوه على الشعر لغاية ما يفتح للدرجة اللي تبغوها وبعدين تغسلينه عادي.
عاد أنا حطيته في شعري مساءً وفي الصباح الساعة (6) غسلته وكان لونه يجنن لأني كنت أول مرة في حياتي أغير لون شعري، وفرحت فيه فرحة لا توصف ، بس يا فرحة ما تمت بعد حوالي أكثر من شهر (يعني أنا حطيته في شوال) وفي شهر ذي الحجة لاحظت تساقط شعري بشكل رهيب، وكنت أكذب نفسي إلين ما قالت لي أختي (وكنت في ذيك الأيام مسافرة عندها في إجازة الحج) ترى شعرك صار منثر في كل البيت، وجوزي عمرة ما لاحظ حتى أحياناً أقص شعري وما ينتبه، ولما رجعت من السفر قالي شعرك إيش به صار خفيف، والله إنه صار زي ديل الفار وهو ملفوف في البكلة (كنت ألف المطاط الصغير حق الأطفال ثلاث أو أربع مرات عشان يمسك من خف الشعر)، وصارت نفسيتي في الحضيض، المهم لما سألت اللي اشترته معايا قالت لي نفس الشي أنا شعري تساقط، ولما سألنا اللي دلتنا عليه قالت أنا استخدمه أنا وبنات أختي ما صار لشعرنا شي، المهم رحت لطبيب جلدية وأعطاني أدوية طبعاً كانت غالية شوي، لكن مو مشكلة المهم شعري يرجع يطلع، وطبعاً بوصفة الدكتور أصبحت لا استشوار ولا شي، بس تمشيط ولم،(على فكرة الشاقور كان محطوط في قارورة زجاج زي قارورة المشروبات بس صغيرة وكان سائل مثل الماء تماماً حتى لونها ووضعته على شعري مثل ما توضع الصبغة بالتمام ثم لفيته بكيس نايلون حتى الصباح).
وبعدين سألت وحدة عن هذا الشاقور قالت لي هو أصلاً أكسجين لأنه بيفتح، على فكرة لما جيت أحطه على شعري خليت شغالتي تحطه قالت لي إنها حسب بوخز في يدها لأنها ما كانت لابسة قفازات طبعاً من قلة الخبرة في هذي الحاجات.
حبيبتي أنا طولت عليك بس حبيت أقولك القصة اللي خلتني أحذرك منه..... عشان يكون عندك دليل قاطع.
بس عندي نصيحة : خلي شعرك على طبيعته إذا كان لونه حلو وجذاب، وإذا مرة مرة سوي لون غامق ما يحتاج تفتيح واكسجين، أصلاً الموضة الغامق هذي الأيام،،،، وفقك الله.