تويت
فطور مبتكر من آخر إختراعاتى ..... شوفوا افتكست إيه...
صباح الخير عليكن ........
الموضوع ومافيه ان بقالى كام يوم عماله أجهز حاجات وأشيلها فى الفريزر علشان رمضان كل سنه وأنتن طيبات ومن ضمن الحاجات تبلت كمية كبيره من الفراخ الفيليه علشان أعملها بانيه وكمان اللحمه علشان أعمله بفتيك وطبعا التتبيله كانت عباره عن بصل ولبن وطماطم وخل وليمون وملح وفلفل وبعدين ابتدبت أحط الفراخ واللحمه فى الدقيق والبيض والبقسماط وبعد ماخلصت لقيت فايض عندى كميه لابأس منها من خلطة التتبيله وشوية دقيق على شوية بقسماط وباقى بيض كمان ورحت حاطه كله على بعضه وبصراحه ريحتها كانت تهبل وقعدت أفكر أعمل بيها إيه لحد ماهدانى تفكيرى وكنت لسه على الصبح يعنى لسه مافطرتش وقلت أفتكس فطور ماحصلش رحت حاطه كمان بيضتين على الخليط وزودت ملح وفلفل وقلبت كويس
وبعدين رحت فارده الخليط كويس فى الصينيه ورشيت رومى مبشور على الوجه
وهوب على الفرن وقعدت أشم فى الريحه الفظيعه وأنا مستنياها تحمر بفارغ الصبر لغاية ماربنا نتعها بالسلامه وطلعت صينية بيض بالبصل والخلطه تهبل
وآدى أول ساندويتش وبجد بجد طعمه يهبل وعن إذنكم حاروح أطحن باقى الصينيه
تعليق