حصاد .. رمضانك غير ... بتجهيزك لشهر الخير

كتبت موضوع طويل وللأسف ماأدري كيف اتمسح لذلك سأختصر لأني تعبانه بسبب الوحام ... كنت وعدت إني بنزل طريقة فرزنتي للسمبوسه لكن وجدت الموضوع مغلق
في البداية هذي الحشوة




مقادير الحشوة :-
لحمة مفرومة كيلو أو حسب حاجتك - ثلاث بصلات مقطعه قطع صغيرة - ثلاث جزرات صغيرة مبشورة أو اثنين كبيرة - بيض ثلاث حبات - بقدونس حزمة صغيرة - قليل من البصل أخضر -قليلمن الكزبرة - قليل من الشبت - بهارات وملح وزيت للتشويح ..
نبدأنشوح البصل لين يصير ذهبي وبعدها نحط اللحمة ونحاول نطقطقها عشان ماتتكتل يعني ماتحطيها وتتركيها لأ حاولي تحركيها وتفتفتيها زي ماقلت عشان ماتتكتل .. ولمى يروح المويا تبعها تبدأي تحطي الجزر وتحركي لين تحسيه ذبل واستوا بعدها تخلطي البيض في صحن وتضيفيه على اللحمة لين يستوي تبدأي تحطي البهارات ملح فلفل أسود وكمون وكزبرة مطحونه وبهارات مشكلة وقليل جدا من الهيل المطحون حتى يعطيها رائحة زكية وبعد ماتحطي البهارات تحركي وتخليها دقيقتين وتبدأي تحطي الخضار اللي هيا البقدونس والكزبرة والبصل والشبت وتكون مفرومه فرم ناعم وتضيفيها عليهم وتخليه لمدة دقيقتين وتطفي النار عشان ماتفقد نضارتها وتحتفظ بطعمها وممكن تقطعي فلفل حار قطع صغيرة وتضيفيه للحشوة وهذا حسب رغبتك ...
كان ودي أصورلكم المقادير والخطوات حق الحشوة بس الوالدة سوتها وأرسلتها ليا وأنا حشيتها في البيت عندي ..
وأي استفسار أنا حاضرة ... وجربو طريقة الحشوة ذي ماراح تندمو لذيذة ...
ونبدأ باللف بسم الله

وهنا بعد مالفيت شوي



وأنا ما استخدم الإ عجينة مخابز مرحبا وموجود في جدة فقط على حد علمي ...
وهيا أفضل عجينة بعد عدة تجارب مثل سويتز ولوزين والدانوب وغيرها وميزتها ماتشرب زيت ومقرمشة


.
وهنا بعد ماانتهيت من كمية
.

.
وهذي الحشوة وأمامي مشوار طويل
.

.
وهنا بعد ماحطيتها في الأكياس
.

.
تقريبا سويت سبعة أكياس وهيا لأهلي وليست لي وماعاد قدرت أصور الباقي وعند وضعه في الفريزر بسبب تعبي اعذروني ...أنا لسى ماسويت شي لنفسي بس أنا وزوجي اثنين مافي شي كثير ويحتاج يتفرزن زي أهلي الله يحفظهم ...

وشكرا لكم واعذروني على التقصير والإطالة....
انتظروني قريبا في طريقة ووصفة سرية لمعجنات لذيذة ..
دعواتكم لي بثبات حملي وقدرتي على الصيام بإذن المولى وكل عام وأنتم بخير..