ღღوصفات متميزةღღسفرتك الرمضانية لشهر رمضان المبارك "متجدد" ^^ الجزء الثاني ^^

**ماما الاء** · 19-08-2010, 12:19 PM

الله اكبر
بسم الله ما شاء الله
يا همي شنو هالتشيز كيك الخرافية يا هنو
سلم ايدياتك
ونورتينا والله ليك وحشة
وينك معاش باينة بكل غايبة علينا ومخليتينا بروحنا

كيتي يا كيتي صار المسير لعزوزتك واني قلت هذا الفلفل للشباب هههههه
اني نحب الحار على الاخر خصوصا المالح يعني مسير مش حار في ماكلة
اسمعي راني مش عارفة نتعامل مع الفوتو بكل شكله اصدارة جديدة وهبلتني
عندي صور للمرقد بطريقة اميمة الله يرحمها
والله فكرتيني بيه توة لان حتى هيا زمانات تحب اديره وتحطه في رمضان ويبدو عمامي يتعاركو عليه وياكلو فيه مع الشربة تقول ليهم ماما حرام عليكم بطونكم وهما شئ يبو المرقد ،،، الله على ايام زمان وحلاوة ايام زمان
يلا من غير تطويل سيرة احسن ما تقولو البنت قاعدة تغني على الاطلال وترغي ليه ليه

**هناء&خالد** · 19-08-2010, 12:28 PM

ألاء أنتي يلي وينك يابنت ليك وحشه كبيره والله وأني ياوخيتي متوفره هههههههههههههههه شوفي الجزء الأول توه تلقي سفيراتي كلهم
وأنتي هبلتيني بي مثرد البكلاوه وااااااااااااو نموت فيها ووتي روحك حتى أحني نبو عزومه عاد هههههههههه

**ماما الاء** · 19-08-2010, 12:40 PM

هنو متبعاتك والله ومتبعة سفراتك اخر سفرة اللي كان فيها الكباب يسهف
لكن ليك هلبة ما خشيتيش
اللي قاهرني في الموضوع انه مافيش حد معدل على ماكلتي يعني طيبت وانحرقت في المطبخ كله عادي بس بكلاوة المهلهل خذت كل العيون اه ياني اه

**هناء&خالد** · 19-08-2010, 12:54 PM

ههههههههههههههههههههههههه ضحكتيني يعطيك الهناء يارب ماهو يابنت عجبتنا البكلاوه لأنها من محل عمك ولأنه لو ماكنش عمك ماكنتش تكون البكلاوه حلوه زي بنت خوه هههههههههههههههه شفتي الغزل
وعاد فلاحتك من يومها معروفه وأنتي غنيه عن التعريف فالحه وخيتي وربي يعطيك الصحه يارب

**ماما الاء** · 19-08-2010, 01:10 PM

به يا هنو اني وين بنمشي من كلامك العسل
ربي يحفظك

هي تفرجي على تشيز كيك متاعي حتى اني راه فالحة خخخخخ

كيتي المسكينة كاتبة عليها ربي يصبرني واني نقوللها اجمعين يا رب
وهاتي الطاسة الثانية اللي مش عارفة وين هربتيها والدنيا صيام

**ميلا** · 19-08-2010, 01:14 PM

[QUOTE=هناء&خالد;10744810]

[CENTER]

واو
ما شاءاللله عليك شني هالصفرة اللي تفتح النفس اني لما شوفتها نحس في روحي شبعت ..
وخاصة التشيز كيك ياريت تنزلي طريقته

**ميلا** · 19-08-2010, 01:22 PM

[
[CENTER]

ماما الاء انتي حاجتك لايعلى عليها ..والتشيز امتاعك يجنن ومميز

مايوعجعك خاطرك عطيني طريقته توه نجربه حتى هوا

**kittygago** · 19-08-2010, 01:33 PM

هنو .... ما شاء الله تبارك الله يا عطيكم الصحة على الفطور السمح

لا لا لالا الباين بناخد اول طيارة و بنجيك نجري جري غادي

تعرفي تهبل

و التشيز كيك يهبل ما شاء الله

قوليلي كيف درتيهم قوار بالكوسة سلقتيهم و الا خليتيهم

لولو يا حبوبة .... يا عطيك الهنا ... اني لما بعثلك الصورة نوري فيك في مشاعري بس ... تمشي تحطيها يا عطيك الهنا

امالا ابعثي باقي الصور الثانيات باش نكملهم ليك

و قوليلي منو اللي مش معدل على ماكلتك .. يعني تعليقي على الشيش بروحه يقتل

و بالنسبة للبكلاوة راهو شبه ما فيه حد ما يحبهاش ... اني عيوووووووووووووني بكلاوة

**هناء&خالد** · 19-08-2010, 01:48 PM

ميلا وكل الحبايب خلاص بأذن الله نزل الطريقه بالصوربس بشرط طبقوها وتفرحوني
والي تبي طريقتها نكتبها عادي لو ماتبيش تستنا الصور والطريقه
وكيتي كلامك يهبل زيك ياريتك ديريها وتجيني يااااااااااااربت وبالنسبه لي قوارب الكوسا أيه تاخدي الكوسا تقصيها بي النص زي القارب وتسلقيها نص سلقها وبعتالي تحولي القلب وتحشي الكيما وتحطي فوقها الباشميل وتحطي في الكوشا وصحه علي قلبك

**ام ياسمين ليبيا** · 19-08-2010, 01:52 PM

مرحبتين يابنات
اول حاجة تسلم عليكم نانا هلبة وتقوللكم كل سنة وانتم طيبين ومستاحشتكم هللللللبة
لولو علاش يوجعك خاطرك في قولت هنو راك غنية عالتعريف والابداع مش غريب عليك
وعلى سيرة البسبوسة نعطيك طريقتي ونحصل نخدمك مريرة واحني اللي تعلمنا منك هلبة
وراهي حاجة ماشاء الله وعلى مسؤليتي ديريها وعينك مغمضة
2كوب سميد
كوب ياغورت
كوب سكر
ملعقة صغيرة بيكنج بودر
ملعقتين سمن او زبدة زي ماتحبي
تخلطي مقاديرك وتصبيهم في طاجين مدهون وعن نفسي البسبوسة ندهن طاجينها بالطحينة
وتخليها ترتاح على الاقل ستة ساعات علاش منعرفش"اني عادة انديرها في الليل وفي الصبح انحطها في الكوشة"
وبعد ماتتاح قصيها عالخفيف وزينيها باللوز وحطيها في الكوشة وامتى اتطيب ديريلها العسل
وكولي بالهني

**ام ياسمين ليبيا** · 19-08-2010, 01:59 PM

ام السنفور الدبلة حتى عندي لازم تكون محمرة شوييية هكي الجماعة ايحبوها
ام سومة كيف تلفي في الدبلة وتقلي فيها بالله اوصفيلي طريقتك
عشاي امس يابنات شربة حوت وبوريك بالكيما وبيتسة وطاجين حوت انودكم بيه
والحمد لله الذي اطعمنا وسقانا من غير حول منا ولا ولا قوة

اليوم ان شاء الله بنجرب قووارب حنونة والقزلامة سفهتوني فيها قلت انجربها

**ماما الاء** · 19-08-2010, 02:24 PM

عطيكم الهني يا بنات
والله حشمتوني على الاخر
اني متحشمة منكم لاني مقصرة ونحش روحي اخي عليا لين خلاص هذا علاش قلت هكي سامحوني بالله

كان تشوفو شكلي توة كلني ورق ورق ونكتب في البسبوسة في وراقي اللي يكتبو فيهم الطلبة ارقام الصفحات لما يطلبو التصوير هههههه

ان شا ءالله حندير طريقة ام يسمينة وطريقة نوسة في البسبوسة واني متشجعة على يسمينة لان مافيهاش جوز هند وبابا يحبها من غير جوز هني
ايه حقا خطرها مش اني ندير في البسبوسة بالدقيق
يعني طاستين سميد وطاسة دقيق زعمة هذا علاش تجي مش مزبوطة ؟؟؟؟؟
بنشكر كيتي لانها علمتني نقص حجم الصورة بالرسام
اموووووووواه

**النرجس الغالي** · 19-08-2010, 02:37 PM

مبروووووووووووك الجزء الثانى كيتى الغاليه اللى لامتنا على الخير ربى يلمنا عند النبى ان شاء الله
الاء الغاليه تعرفى ان حياتى مع صغارى هى برو حها بداع انى لما نطبق حاجاتكم تتغير هويتها فىبيتى ايديهم معاى وماتكملش لى حاجه ابد
هناء سفرة منورة بالابداع اللى فيها مشاء الله عليك حبيبه انى نستنى فى شرح التشيز كيك والكوسا بالبشاميل وعامر ان شاء الله سفرتك ديما يارب

**kittygago** · 19-08-2010, 02:52 PM

الله يبارك فيك يا هنو

ام ياسمين منورة بوصفة البسبوسة

النرجس الغالي نورتينا في الجزء الجديد

لولو .... ياعطيك الهنا و خلاص

موتيني بالضحك

خدمة و اكلات .... قداش الدماغ بيشد

راهو انراجو في الصواريخ اللي ريتهم

**النرجس الغالي** · 19-08-2010, 02:52 PM

كيتى وماما الاء تونى تذكرة لما شفت البوريك فى سفرة هنا ءيا بنات مش زابطه معاى ابدا
البيض يطلع من ورقة البوريك كيف نجحت معاك يا كيتى انها تكون فى الوسط وما تطلع
ساعدونى من شويه عندى طرفين درتهم لولدى كمان طلعو من الورقه وخاطرى ينجح معاى