ღღوصفات متميزةღღسفرتك الرمضانية لشهر رمضان المبارك "متجدد" ^^ الجزء الأول ^^

**ام تدليل** · 19-08-2010, 12:57 AM

شوفي ياستي هده امتع منال العالم اللي بالقشطة تقدري اديريها من غير قشطة وكبري الطاجين يعني بش ماتجيكش غليظة

1 ك سميد خشن
1 ك سكر
1 ك جوز الهند
1/2 ك زبدة طرية
3/4 ك زبادي
1 بيضة
1 م /ك باكنج باودر
فانيليا

الحشو كوب وثلاثة ارباع من الحليب
3 ملاعق كبيرة نشا
نص ملعقة صغيرة فانيليا
كوب قشطة او قيمر

ياستي 1- الحشوة

يخلط الحليب مع النشا ثم يوضع في طنجرة على نار قوية حتى يتماسك شوية ثم تضاف الفانيليا و القشطة أو القيمر و يخلط جيدا و تترك ثواني على النار حتى تتماسك

2- البسبوسة

تذوب الزبدة على نار هادئة

يخلط السكر و جوز الهند و السميد و البيكنج بودر ثم تضاف البيضة و الفانيليا ثم الزبدة و الزبادي ( الروب ) و تخلط حتى تصير عجينة لينة
3- يوزع 2/1 مقدار السميد في طبق بايركس زجاجي ثم توزع القشطة دون الوصول للأطراف ثم يوزع باقي السميد مع الإبتداء من الجوانب
4- تخبز في فرن حرارته 180 من 20 : 25 دقيقة حتى يصير لونها ذهبي
5- تصب الشيرة على البسبوسة و تزين بالفستق
وتقدري القشطة تفوتيها

**ابريكه** · 19-08-2010, 12:59 AM

ماشاء الله ماشاء الله
ابدعات كل يوم جديد وكل يوم ابداع
منورات بنات بلادي
الله يعطيكن الصحة
والله ما نبي نكتب بالاسم لان الكل ابدع
امس فطوري
بوريك البطاطا لكيتي وزايد من كفتة الدجاج
وحتى اليوم درتة ومعاة بيض محشي ومعاة قلاية
ان شاء الله انصورهم وانزلهم بعدين
وصحة فطوركم

**SwEeT BeBa** · 19-08-2010, 01:06 AM

السلام عليكم يا احلي واروع ستات بيوت

كيف كل الغاليات وصحة فطوركم وربي يزيدكم من نعيمـــــــــه

نشوف في ناس مطنشين ومش معدلين ... اه يا لولو ...

مكانش العشم ... هههههههه

ومع هذا ليك وحشة بجد وربي يسعدك ويهنيك وتسلمي علي هالروائع اللي ابدعتينا بيها

نوسة صحتين المحشي طالع من ايدك تحفة الله يبارك

حنونة بسم الله ماشاء الله تسلم هالايدين الحرير ياقمر

ام سومة سفرة دايمة وربي يزيدكم من خيره ... ماشاء الله روووعة

يابنات خايفة ننسي حد ماشاء الله عليكم الحق مبدعات دون منازع

تفضلوا سفرة فطوري ليوم امس وتتكون من

شربة خضار
سلطة خيار بالزبادي
سلطة خضار
مبطن في الفرن
فطائر السبانخ
بيتزا
منسف
وعصائر وفواكه بالعصير والمكسرات

**ام تدليل** · 19-08-2010, 01:07 AM

البسبوسة التانية امتع البندق

كوب ونص سميد خشن/كوب سكر/ربع بيكربونات صودا/نص كوب جوز هند/ربع كوب سمن /كوب زبادي /ملعقة صغيرة فانيليا / نص كوب بندق محمص انصاف /وكوب ونص قطر

تخلط المقادير كلها ماعدا البندق ونخلط المكونات بملعقة خشب وعند سكب الخليط في الصينية اطرقي الصينية علي الطاولة عدة طرقات بهدوء مش اطيحي فيها تخبيط ههههههه وبعدين وزعي انصاف البندق علي الوجه واتركيها ترتاح لمدة ساعة في مكان دافي لتتجانس المكونات ثم للفرن وتم تسقى بالقطر بارد وهي ساخنة وتترك الي ان تبرد وكولي واشبعي يالولو

**أمـ ساره** · 19-08-2010, 01:14 AM

السلام عليكم ورحمة الله وبركاته

فطوري اليوم بسيط جداً عملتها لي ولأم زوجي وسلفي

وحبيت اجرب طبق الحلو الزقلامة بس طلع اي شيء غير انه يكون زقلامة

ممكن لأن عجينتي كانت رطبة شوي المهم اني جربتها وكان طعمها حلو

وعملت بيتزا ككل يوم لكن هالمرة هذي عملتها ميني بيتزا

ومن نفس العجينة جربت حشوة الجبنة لكن بطريقتي الجديدة حبيت اغير

وكانت لذيذة

وطبعا عروس السفرة الليبية الشربة

والصور بالمفرقات

وصحة شريبتكم

الملفات المرفقة

نوسة* · 19-08-2010, 01:14 AM

ملكة بنقابي هادي طريقة ناجيت الدجاج
صدور دجاج مقطعة مكعبات صغيرة نقعيها في زبادي او حليب مع ملح و فلفل اسود
و زعتر و زنجبيل و توم مهروس خليه في التنقيعة على الاقل ساعة
بعدين جيبي صونية حطي فيها دقيق و ملعقة صغيرة بيكنج بودر
مع نفس البهارات اللي فوق
بعد ما يتنقع الدجاج غمسيه في خليط الدقيق بعد ما تكملي التغميس
غمسيه مرة تانية في الدقيق و اقليه في زيت عميق

**ام تدليل** · 19-08-2010, 01:15 AM

ماعاش ولا كان ياسويت اللي يطنشك

سويت حبيبتي ربي يعطيك الصحة علي الفطير اللي يفتح النفس حبيبتي نبي طريقة شوربة الخضار شكلها يهبل وانا شادتها علي الشربات البيض والله الشربة العربية ماعاد نقدرها ونبي طريقة عجينة البينزا شكلها رطبة وتهبل

**SwEeT BeBa** · 19-08-2010, 01:16 AM

سفرة فطوري لليوم تتكون من

شربة عدس
سلاطة مشوية
بوريك بالبطاطا والجبن
كيكة السلك من اختراعاتي ههههههه
طبيخة سبانخ

والحمد لله

ونشكر الله على واسع فضله ونعمائـــه

وصحة فطوركــم

**omsuma65** · 19-08-2010, 01:19 AM

الله وماشاء الله على فطورك ياسويت
تسلم ايديك يافنانه

**SwEeT BeBa** · 19-08-2010, 01:28 AM

تسلمي حبيبتي ام تدليل هذا من ذوقك ياقمر

بالنسبة لشربة الخضار ساهلة جدا والاحلى انها مفيدة للصغار وتحطي فيها كل الخضار ولا يبان شن فيها
تأخدي كل الخضار المتوفرة عندك ( طماطم اخضر _بصل _ بطاطا _ قريعة حمراء _ ثوم _ كرنب زهرة _ واي شي تحبيه من الخضار ) شوفي بالنسبة للمقادير اني نستعمل في طنجرة صغيرة والمقدار يعمل حوالي 6 فناجين شربة
وكمية الخضار نستعمل كل نوع منه حبة الا الثوم راسين والقريعة طرف صغير
نحط زيت زيتون والخضار بعد منقطعها حجم كبير مش مهم التناسق لانها حتنفرم نضيف ليهم 3 ملاعق عدس اصفر وملعقتين كبار كرافس مفروم ونحطها علي النار شوية ومعها نصف ملعقة صغيرة ملح بعدين نضيفلها ماء مغلي حوالي 3/4 القدر ونخفف النار ونخليها تغلي لمدة نصف ساعة وتكون الخضار استوت نتركها تبرد شوية وبعدين نفرمها في خلاط الفروبي وتكون خاثرة شوية

وبالهناء والعافية واي خدمة اتدللي

**omsuma65** · 19-08-2010, 01:39 AM

بنات هذه بكلاوتي للعيد
ان شاء الله تعجبكم

ღ♥ وصفة مبتكرة ღ♥البكلاوه الليبيه بقلاوة العيد تعالوا شوفوا طريقتي - منتديات لكِ النسائية - الأرشيف

http://www.lakii.com/vb/showthread.php?p=10742123&posted=1#post10742123

وصفات وأطباق لحلويات شرقية وغربية من حلى سفرة , كيك ,كب كيك , حلى قهوة , وأطباق لمناسبات كحلويات للعيد وحلويات رمضانية

**SwEeT BeBa** · 19-08-2010, 01:42 AM

تسلمي حبيبتي ام سومة هذا من لطفك ..

ماشاء الله على هالبكلاوة .... يمي يمي تهوس الله يبارك وربي يعطيك الصحة ...

وكل عام وانتِ واحبابك بخيروسعادة

**ام تدليل** · 19-08-2010, 01:51 AM

تسلمي حبيبتي علي الشربة و بااذن الله غدوة انديرها وانزلها اهني صحيتي وربي يعطيك اللي في بالك امين والصراحة من كتر ماطلبت منك حاجات والله لين تحشمت لاكن شن بندير انتي فنانة وافتكاساتك تهبل ماشاء الله لاقوة الابالله

**SwEeT BeBa** · 19-08-2010, 01:58 AM

لا حبيبتي متقوليش هكي ...بالعكس يسعدني اني نساعد باي شي ولو خاطرك تسألي اي حاجة تفضلي تحت امرك

**ام تدليل** · 19-08-2010, 02:05 AM

تبي الحق نبي نقولك كيكة السبانخ بعدين تحشمت قلت يامرا تو يسئلوها وياسر وانتي تسئلي هلبه مش مني الفن هدا كله مانقدرش نشوف ونقعد ساكته مانسئلش

ღღوصفات متميزةღღسفرتك الرمضانية لشهر رمضان المبارك "متجدد" ^^ الجزء الأول ^^

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق

تعليق