معجنات تقليدية من كل البلاد العربية **المسابقة انتهت انتظرونا قريبابحفل التكريم**

أولا" بدي اعتذر من أم الأمورات لأني فقعتها و مللتها و أنا أوعدها بالموضوع.
بس والله كان وقتي مضغوط شوي و ما حبيت نزله عالسريع و كيف ماكان...
بحب أعمل الشي على رواااااااااااااااق..

و الأن أقدم لكم أشهر المعجنات الموجودة في مدينة أبي الفداء و مدينة النواعير حماة و هي

السيالات
بالنسبة للعجينة فمقاديرها سهلة
طحين....سميد...ماء
بمقادير متساوية...نضيف لها الخميرة و نخلط حتى يتشكل لدينا عجينة شبه سائلة متل عجينة القطايف
رح حط صور تطبيقي و صور العمل على أصوله لأحد أشهر المحلات في حماة
لأنه بالبيت عملتها على التيفال ماعندي الحجر يلي المفروض تنخبز عليه
هي صورة العجينة:

الخطوة التالية رح نصب العجينة على الحجر الحديدي الكبير و تحته بتكون النار و الصب بيكون بإبريق خاص و رح نعمل شكل الرغيف الكبير
و نصب من برا لجوا حتى تستوي العجينة كلها مع بعض

هاد ابريق الصب و الآن شوفوا طريقة الصب




قبل ما تستوي السيالة رح نرش عليها الجوز المفروم و نغطيها بشكل كامل
عملنا هيك حتى يلتصق الجوز بالعجين

و الآن صور تطبيقي المتواضع

بعد ما غطينا السيالة بالجوز منكون محضرين السمن الحموي الأصلي
نحمي السمنة على النار و نكوي السيالة فيها( هيك بيقولوا) يعني نسقي السيالة بالسمن المحمى
الآن نرش السكر عليها و نغطيها تماما"
و بعد السكر نرش القرفة المطحونة

نكون قد حضرنا سيالة أخرى بس بدون ما نضع عليها شي

رح نستخدمها كغطاء..للسيالة الأولى
نضعها عليها


و نقدمها بالهنا و الشفا


يلي بيحب الحلو زيادة ممكن يحط عليها قطر
الجماعة عندي حبوها بالقطر أكتر..
صحة و مية هنااا


بعد ما درنا شوي بين المدن و بين الريف حبينا نطلع على البادية و نشوف شوفي عندهم ..
وللا البدو مالهم دور بالمسابقة
بادية الشام بتشكل حوالي ربع البلد يعني إلهم حق
و كمان منطقة حوران جنوب سوريا تشتهر بهذه الأكلة
خلصينا بقى قولي شو عندك

خلاص يا أم الأمورات رح قوووول

اللزاقيات
العجينة كمان سهلة و متل عجينة القطايف
طحين و ماء بكميات متساوية و شوية خميرة
صار عنا عجينة سائلة نتركها شوي تتخمر و بعدين نخبزها على فرن الصاج و نكون مشعلين الحطب تحته
و بيتشكل عنا رغيف كبير..رح تصير شبه السيالات الحموية

نقوم بخبز عدة أرغفة
و ندهنها بالسمن العربي ( سمنة غنم) و هي ساخنة

الآن الاختراع بطريقة التقديم...
توضع الأرغفة فوق بعضها بعد دهنها بالسمن و بعدين حسب رغبة الموجودين إما...
* نرش الجوز و السكر و نضع عدة طبقات فوق بعضها حسب الرغبة ، ثم تقطع قطع صغيرة و ت}كل باليد.
* تدهن بالحلاوة و الحليب.
* تدهن بالدبس .
* السكر فقط.
أنا عملت الطريقة الأولى
عملت 3 أرغفة و حطيت بينهم جوز و سكر و طبعا" أول شي دهنت بالسمن العربي و هي ساخنة


نطبق الأرغفة و نقطعها ...ثم نقدمها بالصحة و العافية


ولإضافة اللمسة الخاصة نرش الوجه بالفستق الحلبي المطحون..
اللزاقيات غالبا" تقدم في رمضان بعد وجبة الإفطار.
و مع تطور الزمن صارت تقدم في جميع المناسبات السعيدة و صاروا يضيفوا عليها أشياء حشوات جديدة متل الفستق الحلبي و اللوز و السكر الناعم و بما أنه البدو تمدنوا فصاروا ياكلوها بالشوكة و السكين مشان ما يوسخوا ايديهن..
تمنياتي للجميع بالصحة و السلامة

تخافوا من هالأكلات
لا بتضر و لا بتسمن لأنها تعتمد على خيرات الطبيعة الأصلية

*