اكواب الكنافة المحشية **بالموز و التفاح متهنيه **طبق اليوم لشهر الصوم
ازيكم اخواتى فى الله يا رب تكونوا كلكم بخير و كل سنة و انتم طيبين
ان شاء الرحمن هتكون دى مشاركتى الثالثة لطبق اليوم لشهر الصوم و هى
اكواب الكنافة بحشوتى الموز و التفاح بالقرفة
و يا رب تنول رضاكم ان شاء الله
المقادير
نص كيلو كنافة مفتته ( بشيلها فى الفريزر قلبها بيوم و ساعة الاستخدام بكسرها بايدى بتكون سهله)
كوب سمن سائح
نص كوب سكر بودرة ( لتماسك الكنافة )
شربات او شيرة
و( انا هنا استخدمت نص كمية الكنافة اللى فى المقادير)
الحشو
شرائح موز
تفاح متقشر و متقطع مع شوية سكر و رشة قرفة على النار لحد ما الميه اللى فيهم تتشرب
الادوات المستعملة
صوانى الكب كيك
او
علب التونة الفارغة طبعا
انا هنا كنت بشيل علب التونة و بعمل بيها حاجات كتير ( دى حته تدبير منزلى
)الطريقة
هسيح السمنة (مش هسخنها هسيحها بسسس ) و اضيف عليها الكنافة و السكر البودرة و اقلبهم فى بعض كويس
و بعدين هجيب علب التونة و احط جزء من الكنافة و اضغط عليه بصوابعى و بعدين احط الموز او التفاح
و بعدين احط باقى الكنافة و اضغط بصوابعى عليها كويس جداااا
و طبعا يكون الفرن سخن من الاول و احطها فى الفرن و لما تحمر احطلها الشربات و اغطيها
و تقلب الاكواب او علب التونه عتد التقديم
يارب موضوعى البسيط يعجبكم
فى رعاية الله و حفظه
احبكم فى الله
تعليق