ღ♥ تطبيق متقن ღ♥كيكة الأرنوب الجميلة ، مرة رح ينبسطو عليها الأولاد

صباح الخير

طبعا أنا مرة بحب أسوي كيكات للأطفال ، والصراحة أول مرة أسوي شي مرة حلو ، الله يعطيها العافية شيشن أعطتني موقع رااااائع وفي كل الكيكات ، وانصدمت إنه مرة سهلة ، بس لازم الواحد يكون عنده عزيمة ولا مافي شي صعب ، والي يبغا الموقع يراسلني على الخاص علشان أرسله اياه.

طبعا أنا احترمت قوانين المنتدى بإنه ما أحط صور لحيوانات ، علشان كذت طمست العيون وعلشان كمان ما نزعل أختنا الغالية حنان البحرين

ونبدأ بخطوات الكيكة السهلة جدا:

أول شي تعملي الكيكة إلي انتي معتمدتها ، وانا طريقتي إلي معتمدتها بتلاقيها بهالرابط وأنصحكم فيها لأني تعبت لين طريقة مرة طعمة وتضيع الواحد بين الجاهز وعمل البيت وأرجع وأقول الله يعطيها العافية مانو

ღ♥ تطبيق متقن ღ♥كيكتي المتواضعة ، مغطاة بعجينة المارشميلو

بعد ما تبرد الكيكة (الأفضل إنك لو مستعجلة تحطيها في الفريزر لمدة 45 دقيقة) تقسميها من النص (يكون القالب دائري) وبعدين تحطيها بشكل نص دائرة وهي واقفة ، نسيت للأسف أصور هالنقطة ، اذا ما فهمتوها بليز قولولي أحاول أصيغها بطريقة ثانية

بعدها تدهنيها بالكريمة إلي تبغيها ، انا استخدمت بيتي كروكر البيضا وحطيت لها صبغة


وهذي الوان للصبغات إلي بستخدمها ، وجبتها من تافولا


حطيت لها طبقة كريمة


وتدخليها شوي الفريزر علشان تمسك الكريمة ، وبعدها ترجعي تحطي كريمة مرة ثانية ، وانا عملتلها بطرف ملعقة الدهن بعض الحركات المموجة



وبعدها بدأت أشكل الأرنب واستخدمت لإذن الأرنب ورق مقوى وقصيته ، الأنف ميني مارشميلو ، الشوارب نوع من انواع الجلي وموجودة في الصورة (قصيتها) ، العيون ميني مارشميلو بس ضغطت عليه وحطيت في النص سمارتز (استخدمي الكريمة علشان تلصقيها)، الأسنان علك عادي ، الذيل عبارة عن مارشميلو كبير ، ويطلع هالشكل بس زي ما ذكرت إني خبيت العيون علشان لا أخالف القوانين ، والي حابة تشوف شكله كامل برسلها اياه على الخاص



وهنا من الجنب



وهنا من الجنب علشان تشوفو الذيل



وهنا بعد ما الأولاد فرحو فيها وأكلو الراس بالعافية عليهم
شوفو كيف شكل الكيكة مرة هش ومغري




وأي استفسار أنا جاهزة