تويت
وينكم يابنويت خيركم مارديتوش عليا
-
-
جميلة الكون
مقادير عسل السكر ( العقدة):
لترين ماء + كيلو سكر + عصير نصف ليمونة .
و لو كنتي مستعجلة ديري المقادير واحد لواحد حتى يطيب بسرعة
يعني لتر ماء + كيلو سكر + عصير نصف ليمونة.
الطريقة:
حطي الماء و السكر في طنجرة على النار و حركي السكر حتى يذوب
و ضيفي ليه عصير نصف الليمونةو ماتلوحيش القشرة بعد ماعصرتيها حطيها
حتى هي في الطنجرة و خليهم على النار حتى يبدأ يطلع في كشكوشة
يعني يبدأ يدير في فقاعات و لو تشوفي لقشرة نصف الليمونة لو كان لونها اخضر
حتلاقيها صارت مصفرة و هذا يعني أن العقدة طابت
و ممكن تأخذي من العقدة شوية بملعقة و تبرديها و تمسيهاباصبعك
تلقيها سميكة ممكن تضيفيلها شوية عطر و خليها تغلي غلو
و اطفيء عليها النار و استعمليها.تعليق
-
مشكورة اختي زينب وبارك الله فيك
وشنوا وخيتنا زينب ماتبيش تعطينا حلويات جديدة ولا شنواتعليق
-
مرحبتين حبيبية
سامحيني جميلة الكون والله ما شفتك الا توة
اني عقدتي اندير فيها زي ناس زمان
يعني طاسة سكر وطاسة امية وعصرة ليمة
نخليهم يغلو فوق النار لين الليمة من الوسط تولي عسلية
والحق اني نراجي في العقدة لين يولي لونها عسل من الجناب ونطفي عليها ونخليها تبرد ونزيد عليها بعدين طاسة عطر نحلها بيها ونغليها غلو واحد بس فوق الناس مش تاخذ بعضها وفض عرس حمد
وزوبة عطاتك طريقة هيا مش بعيدة عليا بس شكلها منظمة اكثر مني ههههههههههه عطيها الصحة هالزوبة اعجوبة بجد
اي خدمة تفضلي حبيبية.. { إِنَّ رَبَّكَ لَبِالْمِرْصَادِ }..
تعليق
-
مساء الفل عليكم لو سمحتم يا قمرات كنت عايزه اعرف طريقة العصيده ؟؟؟؟؟؟؟؟؟؟تعليق
-
مرحبتين بضئ العين
والله رواد مدايرة العصيدة ومنزلتها على المنتدى بالصور والخطوات اني شفتها قبل بس والله مش عارفة وين وكيف نحصلها يا ريت حد من البنات يقولك رابط رووواد
ويكوووون ندااااااء لرواااااااااااااااااااااد
واني عليا نقولك الطريقة وان شا ءالله تزبطيها وفي اقرب فرصة نقولك كيف
المقدار
اربعة طواسي دقيق وثمانية طواسي امية رشة ملح ورشة زيت
تحطي المية مع زيت وملح فوق النار وتخليها تغلي
لما تغلي تصبي نص المقدار في طنجرة بروحها
صبي الدقيقللمية اللي تغلي فوق النار بعد ما تكوني غربلتيه (نخلتيه) وبالمغرف او كاشيك اللوح حركيه (عصديه) حتى ياخذ بعضه ونزليه لوطة وشدي الطنجرة بين رجليك وابدي عصديه بالمغرف لين تنحي كل كراكيب الدقيق ويولي خليط ناعم
ارفعي ثاني على النار وصبي فوقه نص كمية المية اللي نحيتها لما غلت من الاول لو تذكريها ونقصي النار وخليها تغلي على راحتها
لما تنزح المية نزلي الطنجرة ثاني وحطيها بين رجليك وعصديها من اول وجديد حتى تتمتزج مع بعضها وتبدا ناعمة
وركبيها من اول وجديد فوق النار وصبي عليها المية المغلية ونفس الشئ نقصي النار وخليها لين تنزح
نزليها لثالث مرة وعصديها بالمغرف بين رجليك حتى تمتج في بعض
وناس زمان يقولو علامة طياب العصيدة انك تسمعي صوت العجينة تطربق لما تعصديها زي اللوبان (العلكة يعني)
بعدين ملسيها في صونية وصبي في جنبها شوية عسل وسمن او رب وزيت زيتون
وان شاء الله تكوني فهمتيني
صحتين على قلبك.. { إِنَّ رَبَّكَ لَبِالْمِرْصَادِ }..
تعليق
-
الااااااااااااااااااء
الله يخليك يا سمحة
كانك تعرفي الفتات
كيف اديريه
ديرهولنا
والله جي خاطري فيه وجربته مرة وماطلعش لافتات
ولاحتي يقربلهم
الله يخليك يا حبيبة
اسعفينا بيه
تعليق
-
مرحبتين حبيبية
اني الفتات ندير فيه خبزة دقيق وامية زي عجينة الفطيرة بالزبط
يعني كيلو دقيق طاستين امية كاشيك ملح
نخليهم يرتاحو شوية ونقرصهم ومحلهم بالعصاة
بعدين يرتاحو شوية ونطيبهم في طاوة كبيرة من غير زيت بكل مش يجو جافات
ونحطهم طول في نايلو مش ما يتيبسوش
بعدين وتي مرقة لحم عادية مع البصلة زي مديري رز مسقي او كسكسي
قصي الفتات صغير صغير وحببيه بالمرقة وسقيه بالبصل واللحم وصحتييييييييييييييين
هذا فتاتي منعرفش البنات كيف يديرو فيه
يعين المطبخ اذواق
في جيرانا جبايلة يديرو في العجينة رطبة هلبة كانها سفنز وتبدا تتلصق بس اين نحبه هكي
وتفضلي اني في الخدمة.. { إِنَّ رَبَّكَ لَبِالْمِرْصَادِ }..
تعليق
-
سود الهدب مشكلتي معاش نطيب بكل الا جمعة وسبت
وصعب ندير كل شئ في اليومين هذو
والله نبي ندير عصيدة لاماني بس مشكلة الحوش كله صايم
وحتى الفتات يبي يوم جمعة ان شا ءالله الجمعة الجاية مش صايمين ونديره
والله سامحوني ومتحشمة منكم هلبة
الحق نوصل للحوش من الخدمة متاخر هلبة وصعب اندير حاجات زي هذي الا يوم راحة
ساااااااااااااامحووووووووني
ان شا ءالله ما نتحشم معاكم اكثر من هكي.. { إِنَّ رَبَّكَ لَبِالْمِرْصَادِ }..
تعليق
-
ان شاء الله ربي ما يحشمك يا حبيبة
وراني عارفة ومقدرة شغل وتعب وارتباطات تانية
ومش مستعجلة عليه
خودي راااحتك حتي الشهر الجاي ولا امتي ما تلقي
روحك فاضية وطاربة لديرته
لكن الي نعرفه
يتقرص كويرات وكل زوييز يتلصقو ببعض بخلطة
ويتاكل مع شاهي العالة
من غير مرقة
وسامحينا كثرنا علي ما وصوه
تعليق
-
يا حبيبة
راهو رقيق واجد وكيف يطييب
تجبدي الورق من بعضه
ارق واجد من الفطيرة
مش عارفة كيف نوصفه
تعليق
-
الاااااء
يتقرص كويرات صغيرة زي المشماش او اكبر بشوية
وتكون الخلطة جنبك مش سايلة هلبة متوسطة الرخوة متعها
تاخدي وحدة وتضغطي عليها تقريبا وتحطي فيها شوية
من الخلطة وبعدين تحطي عليها كويرة تانية ودوب ما تفطحيها
وتحطيها علي صفرة مزيتة
وبعدين ما نعرفش كيف يحلوه
لكن كيف تطييب عالنار ورقتين يبدوا لاصقات في بعض
وامتي ما اطييب ينفكوا وتطلع ورقتين شفافات
يديروا فيه مصراتة ومسلاتة
واكلته في حوش خالتي عزوزتها مصراتية
لكن للاسف
ما صدفش معاي
تعليق
تعليق