سؤال لحوامل مكه اتفضلو

[وردة الجودي]

السلام عليكم ورحمت الله وبركاته....حبيباتي الله يخليكم ساعدوني الاتعرف( مستشفي الولاده ) كيف نظافتهم ومعاملتهم في التوليد والاهتمام اهم شئ ارجو انكم تفيدوني عشان انا احتمال اولد فيها ان شاء الله ولكم مني جزيل الشكر

[محبة التطريز]

حبيبتي انا ماقد ولدت في مستفشى الولاده بس اسمع انها اولا ما فيها نظافه تانيا ما في راعيه ولا اهتمام
بس نصيحه انك ما تروحي هناك
انا من اهل مكه
افضل المستشفيات في مكه بالنسبه لي بخش وباشراحيل والتونسي فقط فقط
انا كانت لي ولادتين في بخش انصحك فيه
وكمان اسعار الولادات مو مرة غاليه
واختي ولدت مرة في باشرحيل كمان مرة تمدح فيه
وولدت في التونسي بس السرير حقهم مو مريح
الله يقومك ويقومني بالسلامه
بس انا المرة دي ما راح اولد في مكه
راح اولد في مدينه ينبع الصناعيه
دعواتك

وشكرا

[وردة الجودي]

شكرا حبيبتي على الرد والله يقومك ويقومني بسلامهياااااااااااارب

[حمرة الورد]

معليش على السؤال بس اذا منتي مرتاحة مو لازم تردي ..

انت بدك تولدي فيها ليش؟ هل حالتك خاصة ؟

انا اعرف وحدة تولد فيها قيصري وتروح لواحد دكتور متابع حالتها وكم مرة ولدت عنده ويعطيها غرف ملكي وتمد فيها حتى كل اليي زاروها يقولوا الغرفة ما كأنها في مستشفى الولادة .

واختي ولدت فيها من 4 سنين عشان كتبوا لها تنويم من قبل الولادة .. ولا اتذكر اش كان السبب بس ما ارتاحت ابداً .. وللأسف كل مستشفيات الولادة والأطفال زي بعض .

وساخة وقلة عناية . انا ولدت في المدينة وبصراحة قمة في القرف وقلة العناية حتى خياطتهم بطالة .واعطوني غرفة خاصة قالك .. والغرفة بدون حمام .. وتعبت تعب ماقد تعبت زيه ولا في ولادة .

[وردة الجودي]

شكرا اختى حمرة الورده على الرد بس انا حملت قبل كدا مرتين في مستشفى حراء ان كان تعرفيها بس ياحبيبتي اهمال ومعامله سيئه لابعد الحدود قلت دي المره اغيرالمستشفى قلت اجرب الولاده لاني بصراحه ابغى مستشفى حكوميه ان كان تعرفي مستشفى حكوميه طيبه الله يخليكي لا تبخلي عليا وجزاكي الله خير

[حمرة الورد]

معليش تأخرت عليك .. كان عندي طوارئ .. كهربا وبلاوي في المطبخ ..

شوفي ياعمري أنا أصلاً من مكة بس تجوزت وعشت في جدة 3 سنين بعدين رحت امريكا 8 سنين ودحين رجعت من اقل من سنة .. لكن عمري ماولدت في مكة .

وانا زيك بصراحة ما ارتاح للمستشفيات ولا حتى المستوصفات الأهلية . افضل الحكومي وان كان كله متعب .

زي ما انت عارفة .. في مكة فيه مستشفى النور والششة والزاهر .. طبعاً الششة والزاهر دي مشطوبة من القائمة .. والله ماني فاكرة ايت فيهم اختي سوت فيها عملية .. كانت منتهى القذارة ..

ما اعرف اش المستشفى الجامعي في مكة .. لو هو النور فأنصحك تروحي هناك .. ولو مرة مقفلة .. ليش ماتشوفي لك تحويل بأي طريقة وتحاولي تفتحي ملف في جدة .

عندك الحرس والعسكري والجامعي الصراحة قمة في العناية .. بس المواعيد هلاك . انا باتابع في الجامعي وإن شاء الله اولد فيه وربي يسهل لي دكتورة طيبة وولادة سهلة وبدون طوارئ لأني عندي الضغط مرتفع .

اعرف وحدة تنومت في حراء عشان الضغط وكانت في التامن وجاها طلق وصارت تدق على الممرضات ولا وحدة جاتها ولا اعرف بصراحة هم كانوا محضرينها للولادة والا لا .. بس ولدت ومحد معاها .. وتقولي قعدت اتفرج على الولد ماني عارفة اش اسوي فيه . دا الكلام من 7 سنين .

كمان وحدة قريبتي ماشاء الله تبارك الله 5 مرات تولد في حراء ومرتاحة عليها ومرة ولدت فيها قيصري وجابت توأم خدج وتنوموا في الحضانة مدة ..

هي تساهيل .. انت كتري دعاء انه ربنا يسهل امرك ويسخر لك دكتورة طيبة تتوصى بك ..

والله الله يصلحهم في مستشفياتنا كرهونا في الحمل من سوء تعاملهم .

[وردة الجودي]

هههههههههههههههههه بصراحه معاكي حق كرهونا في الحمل عشان نشيل هم الولاده من سوء التعامل على العموم مشكورا حبيبتي ما قصرتي جزاكي الله خير والله يفرج علينا وعليكي ياااااااااااارب