السلام عليكم
غبت فترة الى فاتت علشان الامتحانات وأدم كان تاعبنى
شكرا لكل إلى أرسل رسائل يطمن عليا
والله أسعدتمونى جداا
___________________________________
قلت أكتب بقى ملخص الشهرين الى فاتوا مع أدم علشان أى أم جديده وعلشان أحتفظ بيها كذكره ليا أنا
أدم الحمد لله عنده دلوقتى شهرين و 9 أيام بالظبط
_____________________________
فى العشر أيام الأولى :
:
1 ) السره : كنت مرعوبه جدا وبخاف من تنظيفها بس الحمد لله أتشجعت ومسحتها
بالكحول وأهتميت بيها
لأن تلويثها يسبب ليه الصفرا ومغص شديد
ودى الأسباب الى خليتنى أتجرأ وأجمد وأمسحها جامد
ولما وقعت الحمد لله كان مكانها أسود ولدلوقتى لسه بمسحها بكحول
2) طبعا المغص
كنت بمسك أعصابى جدااا وكنت بعمل الى يهدئ أدم مش الى يريحنى
يعنى كنت أتمشى بيه فى الشقه هو كان بيحب ينام فى الكارى كوت
كنت أنيمه فيه وأتمشى فى الشقه
أديه نقط سبازموتال للمغص وأدفئ بطنه
وأنظف سرته وأهدى الجو حوليه
وأبعد أى حاجه تزود المغص
3) الصفراء:
نسبتها مش كانت كبيره بس وهو عنده 13 يوم زوجى صمم نروح نكشف وروحنا لدكتور ( ربنا يسامحه ) أعطاه أدويه منها منشط للكبد
المهم طبعا بعد الحاح من زوجى اعطيته الدواء بس لمده 3 ايام بس مقدرتش اكمله ليه
وراحت الصفرا
بس المنشط تعب معدته ولخبط نظام الاكل خالص
كان كل الرضعه يستفرغها على طول
بس انا اصريت واكترت من رضاعته رغم ترجيعه المستمر
ضعف جدا
ونزل كتير
والحمد لله بعد شهر كامل بدء ترجيعه يقل لحد ما انتهى تماما
الغازات
حبيبى كان بيحزق خالص ووشه يحمر لدرجة إنه كان بيرجع من كتر حزقه
واظبت ليه على دواء جميل جدا إسمه سويت بيبى
ريحه تماما بس بعد فتره طويلة حوالى شهر برده
كنت أنيمه على بطنه
وكنت بالليل أخده فى حضنى
علشان حزقه يقل شويه
كنت طول الليل منيماه جنبى فى حضنى علشان يستريح
وأقلل رضاعته بالليل شويه
مع بداية الشهر التانى بدأ الأمساك
وااااااااااااااااااااااه من الأمساك
أخذت أنا ملين أعشاب طبيعيه علشان الامساك الى عندى مش يزود الى عنده
وحافظت انى اشرب سوائل كتير
وجبت ليه لبوس جلسرين اطفال
لما ارفع رجليه بضغطه خفيفه ناحية صدره دا ساعده انه يخرج الغازات وكمان يقلل الامساك
كنت افضل ماسكه رجليه وادعك ليه بطنه لحد ما يعمل
واعطيه اللبوس كل يومين لو مش عمل فيهم
يقوم يخرج اليوم الثالث أفضل رافعه رجليه وادلك بطنه
يقوم يخرج الى فى بطنه
بعد حزق شديد حبيبى
والله طبعا كان راعبنى جدااا
وكنت بمتحن
فكنت خلاص
بس الحمد لله من 4 أيام بدأ ينتهى الأمساك ويارب يخف منه بقى
المهم
كنت بزهق جدااا من الرضاعه لمده طويله
فكنت بأخذ أدم فى حضنى و أرضعه وأنا نايمه بس أكون رافعه رأسه على إيدى وحضناه
الوضع دا ريحنى جدا
والحمد لله ريح أدم كمان
أدم حصل ليه إلتهاب فى عضوه
مع بداية الصيف والحر فكان مش طايق نفسه
كشفت عليه وأخذ مضاد حيوى بس معملش اى حاجه
المهم استمريت على المرهم الى الدكتور كتبه
وبقيت أحميه مرتين كل يوم
وأشطفه على طول
وأهتم بالحفاظه
بس سبحان الله
رغم كل دا جيه ليه التهاب الحفاظات
كنت فى سباق مع الزمن
أعمل ليه نشا
وأسيبه أطول فتره من ير حفااظه
وااااه من كميه الغسيل الى كنت بغسلها
التهابات الحفاظه راحت الحمد لله
بس التهاب عضوه خف بس من الحر ممكن يتعبه
علشان كده لسه مستمره إنى أحميه كل يوم على الاقل مره
أدم جسمه مش بيطيق الحر ولو يوم مش استحمى تظهر ليه حبوب الحراره على طول
كنت بدهن ليه دهان جميل اسمه ديرمو كالم
بس عرفت ان احسن من الحموم الطبيعى مفيش
طبعا السهر بلليل مقرف جداا
بس بدأت أتغلب على الحكايه دى
إنى أخلى نوم النهار بتاعه مقطع
يعنى كل ساعتين نوم بالنهار اصحى ارضعه
ألعبه شويه علشان يفوق
أشغل ليه اناشيد اطفال بصوت عالى
واغنى معاها
يقوم يصحى
ولما ينام تانى ساعتين بالظبط واعمل كده تانى
وبالليل الساعه 9 أحميه وأرضعه والنور مطفئ وانا نايمه وهو نايم جمبى
اوقات ربنا يهديه وينام
واوقات يصحى اعرف وقتها ان دا مش ميعاد نومه خلاص مش هينام
أقوم واخداه وطالعه على الصاله أرضعه مثلا وانا قاعده على الكمبيوتر او بقرأقصه علشان مش ازهق و اتنرفز عليه
ومن سكوتى وسكون البيت ينام
اوقات بعد ساعه واوقا بعد ساعتين واوقات الصبح
بس رغم كده محافظه على النظام دا احاول الساعه 9 مش انام يبقى يرضع وانا بعمل حاجه وساكته
ولما ينام اهدئ الجو حواليه خالص
واقوم ارضعه كل ساعتين فى هدوء شديد
علشان مش يصحى من الجوع
من يومين خليته يمص تفاحه كنت باكلها
عارفه انه لسه صغير
بس والله كنت مبسوطه جدا
ومص عنبه كمان
والحمد لله دلوقتى احسن كتير
وبحاول انظم يومى علشان الاقى وقت فاضى كبير اقدر اعمل كل حاجه
اليومين دول ماسك عاده غريبه ولسه بدرى اوى عليها
بيمص ايده واوقات يحط الاثنين ويمصهم
وانا اهو صابره عليه افضل اطلع ايده
واوقات لما ازهق احط ايديه جنبه وادخلهم فى البنطلون
شكله يبقى يفطس من الضحك
بس المهم مبيعرفش يشيل ايده يمصهم
دعواتكم بقى ربنا يهدى أدم
ويهدينى ليه
الروابط المفضلة