السلام عليكم ورحمه الله وبركاته
انا طبعا كان المفروض اني ابدا الدايت من اول شهر اغسطس لكن حصلتلي ظروف صحيه خلتني ااجل الدايت لحد ما الدكتور صرحلي بالدايت واكد عليا اني لازم انزل 30 كيلو على الاقل
بيني وبينكم انا خفت امشي مع نفسي علشان ما اكسلش ورحت لدكتور يوم الاتنين اللي فات وعملي كشف كامل وسمع مني انا بحب ايه وبكره ايه وطريقه اكلي ايه وايه اسباب زياده وزني
وقلتله اني لما ياست من الريجيم فكرت اعمل عمليه تحويل المعده لاني بمل بسرعه وبلخبط الريجيم
فقالي اللي كتير من الناس مايعرفوهوش ان بعد عمليه تحويل المعده المريض بيقعد اسبوعين مياكلش غير سوائل خفيفه زي العصائر وشوربه الدجاج وبعدها اسبوعين سوائل كثيفه زي شوربه العدس وشوربه الفطر وبعدها لازم شهرين دايت فقالي ان كده المجموع 3 شهور دايت بعد العمليه فقالي متيجي نجرب 3 شهور واعتبري نفسك اتكلفتي تمن العمليه وعملتيها وانك مجبره تعملي الدايت
والله كلامه يابنات عجبني فقلت يعني هو لازم اكون فاتحه بطني وعامله جراحه علشان اعمل دايت اما اجرب
وهو قالي اني لو التزمت بالدايت حرفيا متوقع ان خلال 3 شهور وزني ينزل من 30 ل 40 كيلو بمشيئه الرحمن
فانا قررت اني اكتبلكم النظام الاسبوعي اللي الدكتور هيديهولي واكتب يومياتي واللي حابه تشارك معايا ونعمل فريق نسميه فريق العزيمه لمده 3 شهور اهلا وسهلا بها
ومعلومه مهمه
هو قالي ان اهم اسباب رجوع الوزن هو عدم التثبيت وقالي ان بعد ال3 شهور دول هنمشي على نظام تثبيت لمده شهر علشان مارجعش اتخن تاني
انا بروح للدكتور يوم الاثنن يعني كل يوم اثنين هنزل الدايت الجديد باذن الله واللي حابه نتضم للفريق كل يوم هنتجمع نكتب يومياتنا بكل امانه واحسن جايزه هنحصل عليها باذن الله هي الرشاقه مع حلول العام الجديد باذن الله
على بركه الله نبدا
الروابط المفضلة