السلام عليكم ورحمة الله وبركاته
عاملين إيه يا أخواتى .. ندخل فى الموضوع على طول
الحكاية بقى إنى الحمد لله حامل فى الشهر الخامس أوشكت إنى أدخل فى السادس بإذن الله .. ومن ساعة ما عرفت إنى حامل وأنا عمالة أثقف نفسى عن الحمل والولادة وما بعد الولادة
....... والنتيجة .......
إنى الحمد لله عرفت معلومات كتير أفادتنى فعلا مهمة ( دى النتيجة الإيجابية )
(النتيجة السلبية بقى ) إنى من كتر ما عرفت عن الولادة الطبيعية إترعبببببببببببببتتتتتتتتتتتتتتت وقلقت جدااااا
فأنا حاليا محتارة مابين طرق الولادة كلها ومش عارفة أعمل إيه وزوجى سايبلى الإختيار علشان متعبش أعصابى وكل نوع من أنواع الولادة فيه حاجة مخوفانى
أولا وبإختصار : الولادة الطبيعية طبعا غنية عن التعريف .. مش متخيلة نفسى فيها خالص دانا لما بيجيلى إمساك بحس إنى بموت ولا مغص الدورة الشهرية كان بيتهيألى إنه أصعب من الولادة .. وكمان حاجة أنا زوجى دكتور أطفال حديتى الولادة .. وبيقول إنه لازم يحضر الولادة علشان هو إللى يعمل لإبنه اللازم .. وأنا مش متخيلة إنه يشوفنى فى الوضع ده حتى الدكتورة بتاعتى بتنصحنى إنى مولدش قدامه .. لأنها برده مرت بنفس التجربة وزوجها ولدها مرتين وبتقول مكنتش تتمنى إنه يشوفها فى الوضع ده ( وطبعا مقدرش أمنعه من حضور العملية لأن ده إبنه وده تخصصه وهو ميستأمنش حد تانى عليه )
ثانيا : الولادة القيصرية .. أخويا دكتور وبيخوفنى منها وبيقولى إن الطبيعى أحسن منها لأنها بتكون جرح فى الرحم وده خطر وبيتعب فى الولادات إللى بعد كدة .. وبتبقى عملية وبتخدى فترة عما ترجعى لطبيعتك ومن الصعب إنى أولد طبيعى بعد كدة
ثالثا : الولادة بدون ألم : كويسة مفيهاش مخاوف عندى , بش المشكلة فى دكتور التخدير .. معندناش دكتورة تخدير .. وزوجى بيقولى إن دكتور التخدير بيبقى موجود طول عملية الولادة علشان المخدر بيتاخد جرعات .. وأنا منتقبة وخلاص الحمد لله إتعودت على الستر ومش متخيلة إن راجل غريب يشوفنى فى الوضع ده وكمان دكتور التخدير زميل زوجى .. يعنى الموضوع محرج جدااااا ومحير
طبعا أنا بستخير ربنا .. ولسة كمان هصلى إستخارة كتير لحد معاد الولادة إن شاء الله
بس قولت آخد رأيكم ورأى المجربين أنا عارفة إن عضوات لكى أخواتى الأعزاء كرماء ومش هيملوا من كلامى الكتير وهتحسوا بيا وتساعدونى إن شاء الله .. بشرح كل واحدة فيكم تجربتها بعيوبها ومميزاتها
مستنياكم على أحر من الجمر
الروابط المفضلة