ღღوصفات متميزةღღسفرتك الرمضانية لشهر رمضان المبارك "متجدد" ^^ الجزء الأول ^^

[ام اسيل وايه]

ام السنفور وهنا مشاء الله علي صفرتكم اتهبل
صحه وهنا علي قلوبكم يارب

[ام السنفور]

السلام عليكم

فرفورة لما اديري الشربة وبتحطى حبوبها شوفي بالكاشيك كان لقيتيها اميتها هلبه حولى المغطى وخليها تنزح اميتها شوي وكان لقيتيها خاترة زيدي شوى امية لين توصلي في الختورية المطلوبة الحمص ماتكتريش هلبه والحبوب انى ندير في داب نفرين الشربة نحط في كاشيك وشوى حبوب

السبرنق رول يبي قلي وقتى ولو تبي تسخنيه سخنيه في الكوشة مش المايكرويف لانه المايكرويف يخليه رطب
المعجنات التانية كان طيبتيهم بكري وتبي تسخنيهم تقدري تسخنى في المايكرويف ولا الكوشة بعد تسكريها حطي فيها الحاجة وماتخليهاش اطول في الكوشة لان لو طولت تجف وتبدا جافة ومرات يابسة

عجينة المعجنات العجينة اللي تمشي معاك اعتمديها
انى ندير فيها عينى ميزانى وهى دقيق وندير فيها حليب بودرة وملح والخميرة ندوب فيها في امية دافية وسكر ونعجن العجينة بعد نحسها شدت بعض ماتكونش رطبه طبعا المهم لما تشد نصب حوالي كاشيك او كاشيكين زيت زيتون ونعجن ونخليها تخمر
كان تبي مقاديرها لكل كيلو دقيق يبي حوالي كاشيك خميرة وكاشيك سكر وملح وكاشيشكن حليب بودرة

[ام السنفور]

نوسة وام اسيل واية الله يسلمكم يارب
ام اسيل اشيه علي البوريك كيف درتيه ورق البوريك وكان ع التصوير ركبي الوصلة متاع التلفون للكمبيوتر
نوسة ماقلتيش شنى فطوركم كان؟

[FARFORA]

نوسة وام السنفور صحيتوووووووعالطريقة متاع الشربة باهي عندي استفسار

المعجناات اول مااطيب نغمها و حتى لما نسخنها لازم نغطيها ولا عادي


والفركاسيه نقليه وناكلوه وقتي ولا عادي ينقلى بكري ونسخنه في الكوشة

ام اسيل كيفك ياحبوبة

[نوسة*]

فرفورة المعجنات الافضل لما اطلعيهم من الكوشة غطيهم
بمنشف او منديل لان كان غطيتيهم بمغطة او سلفر هكي بيولي عليهم
البخار و يولوا مرطرطات هلبة لكن لما بتسخنيهم كان في الكوشة
مش لازم تغطيهم و ما تخليهمش يطولو في الكوشة باش ما يبسوش
الفركسيه الصراحة ما عمريش امدايراته لكن نفس فكرة المعجنات اعتقد

ام السنفور احني اليوم اول يوم رمضان مش امس
ان شاء الله باندير بيتزا و امبطن و سكالوب دجاج و اكيد شريبة
كان سخر ربي ان شاء الله نصور فطوري و انزله

[ام السنفور]

فرفورة المعجنات كان طلعتى من الكوشة وغميتى تتعجن لان البخار يولى عليها
لوكان عندك شباك متاع القرل لما اطيبي معجناتك خليهم علي الشباك باش البخار مايوليش عليهم ومايجوج مرطرطات فهمتى كانا هادا حطي علي مفرش مطبخ جاف وخليها تبرد ولما بتسخنيها تانى مادا بيك تحلي صيامك وتحطيها في الكوشة تصلي المغرب وتجي تحوليها من الكوشة بحيت ما اطولش في الكوشة وماتبيش غم الا في بعض المعجنات زي الفركاسي في الكوشة هداكا لوكان تحسي عجينته يابسة لما اطلعيه من الكوشة حطيه في فوطة مطبخ نظيفه وحطيها في كيسة نايلو طبعا بخاره يولي عليه لاكن لان ملفوف في فوطة جافه فا ماينديش البخار عليه ويبدا رطب
الفركاسي عادى اقليه بكري وسخنيه بعدين بس سخنى الكمية اللي بتاكلوها بس في حالة مدايرة هلبه

ايي استفسار تفضلي

[ام السنفور]

نوسة انتى وين امالا؟
صحتين فطورك مسبقا

[hananlibya]

السلام عليكم و رحمة الله و باركاته

امس اول يوم برمضان نفطروا بطبيعة الحال عند حوش اهل زوجي و رفعت معاي حويجتين وحدة مالحة و الثانية حلوة

و كانت السفرة ماشاء الله زاخرة بما لذا و طاب
طبعا التمر و الحلوى الشامية و الحليب و العصائر و المية
و الشربة العربية نوعين وحدة بالحوت حاشا عيونكم و الثانية باللحم
و البوريك المقلي بالدحي و البيتسا و شاورما مدايرتها سلفتي
و مكرونة بالبصلة
و السلاطة العربية و المسير

و الحلو كان عبارة عن لقمة القاضي مدايراته سلفتي و الفطيرة المعسلة و تورتة

و هدي الحويجات اللي من عمل ايديا صورتهم قبل لا نرفعهم معاي و ان شاء الله نصورلكم سفرتي الليلة

بوريك الجبدة هدي طريقة زينب محمد و الله كل ما انديره ندعيلها ربي يحفظها الحق مهشهشة و روعة و قبل كنت اندير فيه بالدقيق الايطالي زيرو زيرو و هالمرة قلت خلي نجربه بدقيق الجمعية لاني لحظت انه ناعم و بالفعل جاني رووووعة

و هدي طريقة زينب محمد و اني سبق و انني طبقتها و هذه كانت مشاركتي

و هدي القزلامة من الحلويات التركية و اللي من عوايد العويلة اننا انديروا بالمواسم و باول يوم من شهر رمضان المبارك
و تلقوها بهالرابط

كنت شاركت بيها في برنامج صيفنا ابداع السنة الماضية

نزهات صيفية و إبداعات لا تنتهي

و جبتلكم الطريقة ثاني قلت يمكن التصفح يكون رزين علي ملف النزهات

ماما الآء عاش من شافك
الثومة تسلم عليك و تقولك هيا بعد ما انجف شن اندير هههههههههههههههههه

[ام السنفور]

حنونة صحة قطوركم
البوريك شكله يجنن خاطري نجربه بس مش اليوم لان خايفة مانلايمش نديره وهي العجينة تبي الراحة مرات غدوة كان ربي عطانى عمر
واليوم نخمم والله شكلي الحلو بندير جبنية والحار بيتزا و اشبح مرات ندير اسكالوب علي خاطر السنفور وعندى طروف امبطن من امس

[hananlibya]

اهلين سنفورة اني اليوم ان شاء الله حطيت الشريبة باللحم عالنار و تبلت شرايحاللحم و قطعت البطاطا ان شاء الله بنشويها بالزيت و الاكليل و سليطة
و درت وريقات البوريك الملصوقة طبعا سفرتي ما تستغناش عليها هههههه كل يوم بالدحي لين نكاكو زي الدجاج خخخخخخخخخخخ
و فاضل بيتسا من امس و بوريك الجبدة
و وتيت العصير الرمضاني sunquick و حليته بالمية و حطيته بالثلاجة

و الحلو فاضل عندي من القزلامة و التورتة و الحمد لله هدا هو

بوريك الجبدة متاع زينب جربيه مش حتندمي الحق يهبل
اسمعي بالرابط فيه حنى طريقة ماما الآء ماشاء الله سبق و اني جربته و جاني روعه الحق
عندك الحق يبي وقت اني ننصحك تعجنيه و تلفيه بنايلون و تخليه بالثلاجة و غدوة كمليه باش تكسبي الوقت
و صححيحتين