تكملة لملف السفرة الرمضانية لشهر رمضان يوميا و لجيمع الأطباق

[ميلا]

بالنسبة ليا
درت الفطور طبعاً شربه ، فركسي ، فطائر الكباب ، وبيتزاء البطاطا ، والحلو كنافة اختي الغالية ميمي جت تهبل
وبس

وشهيه طيبه ، وصحة شربتكم

[shantal]

صفره دايمه يا شنتال صفره روعه
وتعرفي المبطن البدنجال درته الايام اللي فاتو لما حطت طريقته هنو بس جاني شارب زيت
وقالي شنبيري هفتي روحك من غير اختراعات زايده خاليك على البطاطا هههههههههههه
بس منظره متاعك حلو مدايرتيه في الكوةشه؟

بالنسبة للباذنجان الحمد لله مش شارب الزيت وفعلا بعد القلي حطيته شوية في الكوشة وهذه طريقته

http://www.lakii.com/vb/showthread.php?t=591694

واحنا عكسك قلنا احلى من مبطن البطاطا واسهل واسرع ومن كثر ما عجبنا قعدنا نخططوله ونقولوا المفروض انديروه في المناسبات مع الرز بدل امبطن البطاطا

[shantal]

اني اليوم مادرت شي غير اللحم المكمور
معزومه بره بنرفعه معايه وبنزينه بحركات

سلمهووووووووولي متاع الحركات انت يا صقع


بريكة لازم تصوريه ما تيأسيش أكيد حتلقي حل للكاميرة متاعك ويجي يوم وتهجمي علينا هجوم عنيف بابداعاتك

[حره فوق رأس حر]

مبروك علينا التجمع الجديد وان شاءلله بالخير والصحه ع الجميع يارب
والله انكم ابدعتو ابدعتووووووووو

الليبيه والله موتت من الضحك على شارب زيته انا كل مانخش على راجلى ونقوله بتتطلع يقولى شنو جديد المنتدى يضحك عليا
وهدا حد الجهد والله

[libyaa2]

انا الحق ماجربتاش في الكوشه بس حنعاود نجربه بس المبطن البطاطا نحس فيه لا يعلى عليه
ممكن لاني نحب البطاطا نفسها
وصحتين على قلوبكم

[حره فوق رأس حر]

اكيد المبطن البطاطا لا يعلى عليه انا اصلا مانحبش البدنجان نهايئا ؟

ممكن هدا ليش مجزفتش ودرته

[libyaa2]

ام السنفور ممكن تكتبيلي طريقه المنسف؟

[shantal]

صحة ليك أختي شانتال صفرة تهبل وتجي في الخاطر بالنسبه لعجينة البوريك جاهزة ولامدايرتيها ، ياريت تعطيني عجينة الشورما ..

وصحة علي قلبك ،

هلا بميلا
حبيبتي بالنسبة لورقة البوريك زمان كنت اندير فيها في الحوش بس توة تنبلت وقعدت نشري فيها من محلات الرشدة والمعجنات بس هي معمولة يدويا مش الياً زي الملسوقة التونسية( سبحان الله بنة حاجة الحوش بروحها ) ولو تبي طريقتها هذه طريقتها للغالية زينب محمد

http://www.lakii.com/vb/showthread.php?t=487009

أما عجينة الشاورما اليوم خديتها جاهزة لاني طلعت للسوق وماكان عندي وقت نديرها في الحوش بس لما اندير فيها انديرها على طريقة الفطيرة المغربية وعجينتها عبارة عن دقيق وملح وتعجن بالماء وتكون عجينة لينة تشكل على هيئة كرات وتترك لترتاح
تم تجهزي صحن صغير فيه زيت وتحطي فيه ايدك وتفردي العجينة لين تولي شفافة وتدهنيها بالزيت واطبقيها عدة طبقات وتخليها ترتاح وبعدها تفتحيها مرة تانية واطيبيها على الجيهتين في مقلاة تيفال سخونة ولو احتجتي للزيت ممكن ترشيها رشان بواسطة صوابعك يعني تغطسيهم في الصونية وترشي بيهم الفطيرة وهي في المقلاة ولما اطيب تغطيها بكيس بلاستك حتى يرجع عليها البخار وما تيبسش وتحطي التانية فوقها وهكذا



وبالنسبة للحشو جهزته من امس وهو عبارة عن صدر دجاجة قطعته قطع صغيرة طوليا وليس مكعبات وحطيت في الخلاط بصلة وتومة وقرن فلفل اخضروطماطمة خضرا وزعتر جاف وخل ( ما كانش عندي ليم قارص) وزبادي طبيعي وملح وبزار وفلفل اسود وتابل وكروية وضربتهم مع بعض في الخلاط ونقعت فيه الدجاج وبيته في الثلاجة
واليوم طيبت الدجاج بتتبيلته وبعدها حطيت فيه جمرة وحطيت عليها قطرات زيت وغميته حتى يا خد من نكهة الشواء

دهنت الفطيرة بالهريسة والحمص بالطحينة ( ممكن تستعملي بدله مايونيز) وحطيت الدجاج واصابع بطاطا مقلية وطماطم اخضر وسلاطة خس وكاتشب ولفيتها

[ميلا]

[quote=shantal;8863185][center]er]

[ميلا]

شكراً لكي حبيبتي ربي يطول في عمرك
وإن شاءالله صفرتك ديمة عامرة انتي وعويلتك وموله بيتك ياربي ويحفظكم
اجمعين ..