ركن الجمال المصرى ..(نرحب بالضيوف)

[يُسر الرحمن]

ربنا يكرمك يا ام على والف مبروك ليكى يا قمر مرة تانى
وشكرا يا جميل على زوقك
انتى ايه اخبارك يارب تكونى بخير

[ccadbory]

الاخت ام على المصرى ربنا يخليلها على وابو على يا رب
فعلا والله انا ماكنتش اعرف ان المصريات فى المنتدى هنا كتار كده خمسه وخميسه
والله انتى العسل كله وصباح الخير عليكى يا قمر
بالنسبه لصاحبتك انصحك الاول انها تروح لدكتور تغذيه عشان تعرف طبيعة جسمها ايه
لان مش اى جسم يمشى معاه اى ريجيم
المهم انها تحدد نوع الريجيم اللى هاتمشى عليه وبالنسبه للاعشاب:
بذور الرجله(شكل الشاى)الكيلو ب 20 جنيه بس هى الاول تستخدم 4/1 كيلو بس و تطحنها فى الكبه وتشيلها فى برطمان وقبل كل وجبه بحوالى ربع ساعه تاخد ملعقه منها وتشربها بميه
الكابلى(شكل التمر الناشف)2 جنيه يجيبولك حبه كويسين المهم هو طعمه مر علقم فأنا كنت بقطعه بأسنانى
قطع صغيره واسيب البذره واشربه بميه كأنه اسبرين قبل كل وجبه برضه وزميلة ماما قالتله اان هى طحنته بالبذره
وكان طعمه مر فى الاول وبعدين اتعودت عليه
بذرة الكتان(شكل السمسم ولونها بنى /2 جنيه برضه يجيبولك حبه حلوين)دى بئه لازم تطحن قبل الاستخدام على طول لان المفيد فيها هو الزيت ولو اطحنت واتسابت مده الزيت بيطير فلازم تطحنيها قبل الاكل مباشرة فى الكبه
لو مكسله فى الكبه ممكن تطحنيها ببؤك لانها مالهاش طعم
انا عن نفسى حطه بذرة الرجله فى برطمان
بذرة الكتان فى برطمان
الكابلى فى برطمان
وقبل الاكل باخد ازازة ميه وابلبلع التلاته وترزعى الوجبه من هنا ولا تحسى انك كلتى حاجه
غير كده مره فى مره نفسك هاتتسد خااالص
انا عدى عليا ايام ماحتطش فى معدتى حاجه خالص وماكنتش تعبانه ولا حسيت بهبوط بالعكس
وعلى فكره الحاجات دى ليها فوايد تانيه كتييييييييييير مش للتخسيس بس
عشان كده لو ما فادتكيش مش هاتضرك وان شاء الله تخس وتدعيلك بأذن الله
وأى اوامر انا فى الخدمه
تمام يا فندم

[ccadbory]

بمناسبة سيرة خلطات الشعر
انا حاليا حطه على شعرى صفار بيضتين +3 ملاعق عسل بيقولو بيطرى الشعر وبينعمه
وعلى وشى بياض بيض وعاوزه اولع فى نفسى
بس يارب يجيب نتيجه ادعولى

[حنان فاروق]

بسم الله الرحمن الرحيم
السلام عليكم ورحمة الله وبركاته

اختى الحبيبه خادمة القرأن ما شاء الله اخت الحبيبه ادعو الله ياختى الحبيبه ان يرزقنى بحفظ القرأن وان يسبب لى كل السبل للطريق اليه كنت اتمنى ياختى الحبيبه انك تكونى جنب منى مكنتش سبتك الا وانا حافظه .
انا عندى فكره عن احكام التجويد وكيفية التطبيق وكل ما احتاجه اخت دارسه اقرا عليها لتصحح لى وانا الان اعلم صديقاتى فى النادى كل ما تلقيته من احكام وعلى فكره انا امى معلمة قرأن بس للاسف انتى عارفه ان الام مش بتعرف تدرس لاولادها ولكن كل ما تعلمته منها انقله لاخواتى فى النادى فخيركم من تعلم العلم وعلمه ادعو لى اختى الحبيبه ان الله يسخر لى من يعلمنى .

[حنان فاروق]

بسم الله الرحمن الرحيم
السلام عليكم ورحمة الله وبركاته
اختى الحبيبه ccadboryما شاء الله عليك اول مره تدخلى الركن وعامله جو ايه مش ممكن شكلك كده دمك خفيف وهحبك على طول.
شكرا على وصفاتك الهايله للتخسيس وشكلك مدوخه نفسك من التخسيس بس على فكره انا اول مره اسمع عن الكابلى
وياترى الوصفه اللى انتى قولتيها من غير رجيم وخسيتى اد ايه عليها انا الحمد لله جسمى كويس مش محتاج بس اختى محتاجه تخس .
جزاك الله خيرا على مجهودك واتمنى منك حضور دائم انتى مش ضيفه انتى صالحبة بيت نورتى الركن

[حنان فاروق]

بسم الله الرحمن الرحيم
السلام عليكم ورحمة الله وبركاته
رب اشرح لى صدرى والله اسم جميل بتاخدى عليه حسنات والواحد كل ما ينطقه يدعى ربنا انا مبسوطه انك معانا ومش كفايه انك تتبعينا من بعيد عايزنك معانا

نيروز ..العفو حبيبتى انتى تامرينى وان انفذ على طول انتى عارفه انا بحبك اد ايه

اختى الكريمه يسر الرحمن ربنا يكرمك ويخليكى والحب ده بكم انتم بالنسبه لخلطة الشعر وللتساقط وهتخلى شعرك حلو هتكون وصفة النهارده.

[حنان فاروق]

بسم الله الرحمن الرحيم
السلام عليكم ورحمة الله وبركاته
بناء على طلب اختى يسر الرحمن
وصفه سهله لتساقط الشعر وتقويته

حزمة جرجير
الطريقه
تفرم حزمة الجرجير فى الخلاط
تعصر بقطعة شاش ويؤخذ العصير الناتج ويدلك بها فروة
الراس وتترك للصباح وتعمل يوميا ويفضل الجرجير يكون طازه
حقيقى ياجماعه الوصفه دى هايله والدكتور اللى قال عليها لاخت شعرها كان يبتساقط ولما استعملتها الشعرنبت من جديد

[ccadbory]

الاخت حنونه انا والله اللى حبيتك موت من اسلوبك ومن طيبة قلبك ويارب مانتحرمش منك ابدا ولا من حنيتك
على فكره انا مش تخينه بس محتاجه انزل 2 كيلو بس لانى 62 كيلو وطولى 160 واعتقد ان بطنى هى السبب
بس للاسف انا عندى اميبا مزمنه يعنى بطنى دايما مليانه غازات
وانا بستخدم عامة الاعشاب دى من غير ريجيم لانى عمرى ماعرفت امشى على ريجيم بس هى فعلا بتسد النفس جامد
هى زميلة ماما زى ماقلتلك عملت ريجيم وماما قالتلها على الاعشاب دى فراحت لماما بعد اسبوع هاطير من الفرحه
وبتقولها انها نزلت 13 كيلو بالاعشاب دى مع الريجيم طبعا فى اسبوع واحد
وغالبا التخان اوى بينزلو بسرعه الاسبوع الاول
والاعشاب دى لو تعرفى الدكتور عبد الباسط دكتور الطب البديل والعلاج بالاعشاب هو اللى أوصى بالاعشاب دى
والدكتور دا ما شاء الله غظم الله من اجره معظم وصفاته رائعه وبأدله من القرآن والسنه
يارب اكون افدتك ولو عاوزه اى سؤال احنا خدمه 24 ساعه
وسلميلى على اختك كتير وربنا يقدرها وتخس يا رب

[ام علي المصري]

السلام عليكم ورحمة الله وبركاته
اختي ccadbory ازيك ياعسل الف الف شكر علي الوصفة واليوم طيران علي صحبتي عشان ازفلها الخبر وهي وشطرتها علي فكرة هي بتعمل رجيم لكن عمرها ما خست الا شوية وترجع تاني
وانا مبسوطة اوي من ردك عليا وربنا يخليلك حبايبك يارب

[akak]

اخواتي في الركن المصري شكرا لجهودكم الكبيرة وخدماتكم للجميع
وعندي كم سؤال لأزالة الشعر فأنا اعاني من شعر كثيف في كل اجزاء جسمي ما عدا رأسي

سؤالي الأول شو افضل طريقة لأزالة الشعر من على البطن والظهر والصدر ؟
سؤالي الثاني شو افضل إزالة شعر الوجه بالشمع ولا الخيط؟
سؤالي الثالث هل ماية الترمس تنفع للوجه حتى يخف شعر الوجه؟ " في منتدى قرأت فيه ان وضع الترمس المر المطحون مع ماية الورد كقناع على الوجه يصفي الوجه فهل بيخفف الشعر بعد" وهل في طريقة ثانية تخفف شعر الوجه .

س 4 قرأث بعد ان دهن الجسم بزيت الزيتون يخفف الشعر بعد ازالته بس كم دقيقة احطيه ولمدة كم يوم ؟