ازيكو يا احلى امهات قريبا ان شاء الله
والله كلكو وحشتوني من دون ذكر اسماء
الف مبروك لحكيمة ومستبشرة وميرو تيفا وام جنا
وان شاء الله يارب ابارك للباقي قريب باذن الله
ومتشكرة جدا لمايا لانها بجد ونعمة الاخوات ربنا يكرمك يا مايا ان شاء الله قريب بالذرية الصالحة
لاني مش بدخل كتير في الركن هنا وهي الحمدلله ربنا يباركلها قايمة بالواجب وزيادة وبتنقل كل الاخبار الحلوة بتاعتي هنا لاني الفترة اللي فاتت كنت بدخل ركن التغذية فقط
النهارده لما دخلت هنا لائيت بنات جديدة يارب ما يطول اعتدكو هنا يارب وتنتقلو جميعالا لركن الحوامل قريب يارب ان شاء الله
الف شكر لتيته لانها دعتلي ان ربنا يكرمني
ام انا يا بنات عن اخباري الحمدلله مطمنة لحدا ما لاني كلمت الدكتور بتاعي وقالي اعمل التحليل الرقمي والحمدلله عملته والدكتور قالي لو النسبة 25 يبئى حمل
والحمدلله ولا حولة ولا قوة إلا بالله
النسبة طلعت 30.14 وبعدين عملت تحليل تاني للتاكيد وطلعت الحمدلله ولا قوة إلا بالله 78.72
يعني الحمدلله انا حامل
يارب عقبالكم جميعا
بس عايزة اقولكم علي حاجة
بامانة ولا الدكتور ولا الدوا ولا العالج
لما ربنا بيريد والله ما في مفر من قدره بجد
اكيد اغلبتكو عارفين قصتي واد ايه انا تعبت ولفت علي دكاترة ياما
بس الحمدلله انما امره اذا اراد شيئا ان يقول له كن فيكون
هقولكو انا عملت ايه الشهر ده يمكن يكون فايدة ليكو ويارب ينفعكو باذن الله
انتو طبعا عارفين ان ربنا من عليا من شهر بالعمل لاني كنت تعبانة جدا من اعدة البيت
وكان شعلي 4 ساعات في اليوم لاني اشتغلت ادارية لفريق كرة طايرة في نادي الشمس
بس اهم شئ عملته اني وظبت علي الصلاة وخاصة قيام الليل والاستغفار
وفي يوم من الايام قرات قصة السيدة اللي راحت لسيدنا موسى وطلبت منه انه يقول لربنا انها نفسها في الذرية ولما عرفت السبب اللي ربنا ادها الذرية علشانه بئيت بعمل زيها
كنت في كل صلاة وانا سجدة اقول
يا رحيم لا تجعلني عقيم
في كل سجدة 3 مرات
وبعدين في مرة كنت بتفرج في التلفزيون علي قصة السيدة مريم وكانت حلقة ولادة سيدنا عيسى
لائيت نفسي من غير ما اشعر ببكي جامد جدا وبقول دعاء عمري في حياتي لا سمعته ولا قلته بس لائيت نفسي بردده وكان المغرب بياذن
الدعاء كان كالاتي:
يارب كما وهبت لزكريا يحيى وهو شيخ كبير وامراته عاقر اوهب لي الذرية الصالحة , وكما وهبت لمريم عيسى من دون اب اوهب لي الذرية الصالحة, وكما نجيت سيدنا ايوب من بلاء المرض نجيني من المرض واوهب لي الذرية الصالحة , وكما نجيت سيدنا محمد من اذى اليهود نجينا من ما انا فيه واوهب لي الذرية الصالحة
وفضلت ابكي وفضلت اردد الدعاء ده كان عندي يقين جامد بالله انه هيكرمني الشهر ده
عايزة اقلكو اني الشهر اللي فات كنت متابعة مع دكتور جديد وكنت رايحة عنده بغرض انه يعملي التلقيح الصناعي بس الحمدلله ربنا اكبر من كل ده وكريم واكرمني وان شاء الله هيكرمكو باذن الله عن قريب
علي فكرة جوزي الشهر ده كان بيقولي خلي عندك يقين وانتي بتصلي انك اول ما تخلصي الصلاة ربنا هيديلك كل اللي انتي عايزاه
وفعلا ده اللي عملته الشهر ده
واهم نصيحة انا عارفة انها صعبة بس ان شاء الله ربنا يقويكو عليها
انكو تحاولو تتنسوا الموضوع مش تنسوه لان نسيانه صعب انا عارفة
بس والله ده اللي انا عملته فعلا تناسيت الموضوع بس مع ربنا بس كنت بفتكره وان شاء الله هتشوفو الفرق قريب باذن الله
وعليكو بقراءة القران
عايزة اقولكم ان الدكتور منعني من الحركة والاعدة وطول الوقت وانا نايمة علي السري
بس بصراحة حرام عليا يكون عندي نصيحة وابخل بيها علي اخواتي
انا اسفة طولت عليكو كتير
بس ده لاني بحبكم
ارجو منكو الدعاء لي ان ربنا يكملي علي خير واني اشوفه بصحة وعافية باذن الله ويارب يفرحكو عاجلا غير اجلا باذن الله يااااااااااااااااااااااااااااااارب
بارك الله فيكن جميعا واعطاكن ما سالتنا
النجم الفضي
كتبت بواسطة أيمان عامر
أعضاء قرؤوا هذا الموضوع: 0
الروابط المفضلة