بارك الله فيكم عزيزاتي على ما خطته أياديكم من
تحليلات و حلول و اقتراحات و بعتذر عن تأخري بالرد عليكم بس كان النت مقطوع
عزيزتي عيون 123
جزاك الله كل خير حبيبتي و حابة أوضح نقطة بأني
لما لقيت زوجي نام بغرفة أخته أكتر من مرة لم
أسئ الظن فيهم بس تضايقت لأنه بيعرف إني منتظرته
بالغرفة و كنت أقول له بأني حابة أتكلم معه بكذا موضوع
و كان كتير مرات يطنش .. و بالنسبة لمشاركتي معاهم
في ترتيبات الزواج ما قصرت و الله لا هو و لا أخته و لا
حتى مع أهله و زوجي عارف هالشي يعني ما قصرت
معه و لا مع أخته و لا حتى أهله بس كان جزائي
التطنيش التام
عزيزتي norway rose
ما قصرت و الله عزيزتي في ترتيبات الزواج معاهم و
كنت أساعدهم باللي بقدر عليه فوق تعبي مع أولادي
و بيتي و حملي
عزيزتي samya
عجبني كتير طرحك لحل مشكلتي و ريحني كمان
كلامك صحيح بإنه هذه أخته و رح تروح لرجل تاني و
شي طبيعي انه يغار زوجي و يقضي معاها وقت طويل
لأنه ما بيعرف كيف ظروفها و ظروفه هو كمان و متى
ممكن يلتقوا ببعض بس كمان من اي شايفته انه
تعلقهم ببعض مو طبيعي يعني حتى لاحظت انه زوجها
مرات بيتضايق بس هم مو حاسبين حساب هذا الشي
و من ناحية دوري بالتخفيف عنه حاولت و الله كتيييييير
حاولت ما أظهر ضيقي من الوضع و لا أزيدها عليه
بالعكس كنت كتير أمزح معه بشتى الطرق بس الي
كنت ألاقيه من زوجي الصد و اللا مبالاة و عدم التجاوب
يعني و لا كإني موجودة .. أما كلام صديقاتي فما أخدت فيو لأنه متل ما قلتي خفة عقل أنا هدفي أحافظ على بيتي و زوجي و أولادي مو أهدم كل شي بنيته بهال 4
سنين
عزيزتي DAHUBA14
و الله كتير فكرت اني أكلمها بس قلت لو كلمتها هي
رح تنزعجو بالتالي أخوها الي هو زوجي رح ينزعج أكتر
لأنه ما بيرضى لو تزعل شعرة وحدة(يعني تزعل ولو
بشيء يسير و بسيط) بينقلب يومي كله و الله
المهم تفاديا لكل هذا قررت إنه أرجع أقوي العلاقة بيني
و بينها لأنه ضعفت بينا فترة و الي قلتيه عزيزتي هو فعلا
الي حاسسته بإنه علاقتهم صح قوية بس زايدة عن حدها و تصرفاتهم مو منطقية بس مو بإيدي أعمل شي
صدقيني و برجع بقول ما فكرت لحظة أخرب هالعلاقة
بس كنت متمنية إنه علاقتي مع زوجي تكون قوية
متل علاقته مع أخته و يمكن أقوى بس ما قدرت و للعلم
قعدت فترة مطنشته يعني ما أمزح معه متل قبل و قللت
كتير من كلامي معه بس كمان ما اهتم
عزيزتي تلال رمادية
رجعت لنفس الشكوى حتى أوضحلكم بقية النقاط و أشرحلكم الوضع التعيس الي أنا عايشته
و الله كتير بقول انه حالي أحسن بكتير من زوجات تانيات
بس مو بإيدي يظهر تضايقي من الوضع لأنه ما تعودت
من زوجي هالتصرفات و عذرته مرات كتير و فكرت بوضعه
مرات كتير بس ما توقعت إنه يكون هيك الوضع يعني
حسيت حالي متل المصدومة و كتير مرات ما كنت بعرف
كيف أتصرف أطنش و لا أتضايق أو أقوله و لا ما أقوله
يعني عن جد ضعت
عزيزتي zineb gharbia
أنا توقعت عزيزتي بإنه ينشغل عني بس مو بهالطريقة
و عذرته مرات كتير و صدقيني ما أسأت الظن ولا مرة
بس يمكن متل ما قلتي انه هالشي مستهجن يعني
شي جديد علينا و معاملتي لها مو بس منيحة ممتازة
لها و لزوجها و الله .. ان شاء الله بطبق نصيحتك و
بقلل من تفكيري بالموضوع و غيرتي
حابة أضيف بعض النقاط :
هلا هي و زوجها عايشين ببيتي عشان ظروف زوجها
شوي صعبة و لما عرفت بالصدفة (مو زوجي الي قالي)إنهم رح يجوا
و يسكنوا معانا ما تضايقت و لا قلت شي بالعكس رحبت فيهم
و عايشين هلا كإنا عائلة واحدة و مو مقصرة مع حدا
فيهم بشي إلا شخص واحد هو زوجي و بعترف بهالشي و رح أخبركم ليش .. الوضع الي
مريت فيه عزيزاتي و الله صعب و اهمال زوجي لي
الفترة الي فاتت و صده لكل تصرفاتي من كلام و مزح
و حركات و لا مبالاته خلتني بحالة يأس و احباط و
الله مالي نفس أعمل أي شي يعني مو المفروض
الزوجة تعمل جو ببيتها لزوجها تنسيه همومه و تعبه
و تهتم بحالها و تضحكله و تفرفش و الله هالأمور هذه
مالي نفس أعملها ما بعرف ليش مع العلم إنه الفترة القريبة
الي فاتت صار زوجي يحاول يعوضني عن الفترة الي فاتت
و أنا عارفة هالشي و مقدرة بس حاسة حالي من جوا مكسورة و مجروحة
و كل ما أحاول أرجع متل زمان ما أقدر و أخاف يرجع زوجي ما يهتم فيني
و يهملني يمكن تقولوا عني ضعيفة
بس فعليا هذا الي صاير و بتمنى كتير انكم ترشدوني
هلا كيف أطلع من الحالة الي أنا فيها كيف أرجع زي زمان ؟؟
إضافة على الي قلته عزيزاتي
الي أثر فيني كمان إنه كان لي صديقات عزيزات
نتكلم مع بعض و نزور بعض و نطلع مرات بس مع
الوضع الي كنت بمر فيه هم ما عادوا متل قبل
يعني لا تليفونات و لا زيارات و لا شي اختفاء تام
و هذا كمان أثر فيني يعني لا زوج موجود و لا صديقات
يعني عنجد كنت عايشة بوحدة تامة و محتاجة
ولو لشخص أرتاحله و أفضفضله
و عالقليلة أقضي وقتي و أنشغل شوي و أرتاح
الروابط المفضلة