بسم الله الرحمن الرحيم
سلام الله عليكم اخواتي العزيزات واسعد الله صباحكم ومساكم
ح احكيلكم قصة وصول ابني الاول بشار
كعادي من يوم مادخلت التاسع وانا يوميا بأمشي على كورنيش جدة
ومسافات لابأس بها
المهم يوم السبت لمن رحت امشي حسيت بخفة ف المشي ومررة مافيني تقل انبسطت ومشيت اكتر من الايام اللي راحت
رجعت البيت وطلبت من زوجي الجماع (للمعلومية السائل المنوي يلين جدار الرحم) بعدها اغتسلت
وغليت قرفة مع يانسون وحليتو بالعسل << من يوم دخلت التاسع وانا اشرب كوب يوميا
وسبحان الله كنت حاسة بخفة ف الحركة عجيبة بس روحاتي للحمام تزيد
المهم شفت ماجاني نوم قلت امشي ف البيت وفعلا رايحة جية و ف الاستراحة اشرب كوب قرفة << يومها عبيت ثلاجة او ترمس
وانا امشي بذكر الله من الاذكار اللي كنت اقولها (ياحي ياقيوم برحمتك استغيث اصلح لي شأني كله ولاتكلني الى نفسي طرفة عين) و(لااله الاانت سبحانك اني كنت من الظالمين)
الساعة سارت 3 قريب الفجر قلت ببدأ ف قراءة سورة البقرة الين يأذن الفجر اصلي وبعدها انام
صليت صلاة الحاجة وطلبت من ربي يفرج همي وييسر لي امري وبدأت ف قراءة سورة البقرة
ماكملت نصها جاني النوم ونمت
بعد صلاة الفجر حسيت نفسي بروح الحمام كتير وف نفس الوقت فيه الم بيروح ويجي
آخر مرة رحت الحمام وانسدحت حسيت بألم مرة قوي وبيتكرر كل عشرة دقايق انا كنت ماسكة نفسي بس من قوة الم بكيييت وقتها صحي زوجي على صوت البكا
قاللي ايش فيك؟؟ قلتلو حاسة بوجع ,, يقوللي فين؟ قلت ماادري وانا خلاااص مو قادرة امسك نفسي
راح الحمام الله يكرمكم ,, اما انا الفترة اللي بين الطلقات سرت امشي ف البيت بس رحت اول شي المطبخ وغليت قرفة وحليتو بالعسل ووقت الطلقة اوقف وامسك نفسي زي كأني (بقضي حاجتي اعزكم الله)
وانا بمشي سرت اقرا سورة الزلزلة ويدي على بطني وكل طلقة اقوى من اللي قبلها ,, وقت الطلقة بس اقول (يااارب يااارب يااارب)
وانا بشرب القرفة افتكرت كلام ماما عن زيت الخروع اخدتللي ملعقتين ووراها قرفة وانا بمشي ولبست عبايتي وجهزت شنطتني
واتصلت على ماما تجههز نفسها نمر عليها قبل المستشفى
خرجنا من البيت ومرينا ماما والطلقات سارت كل خمس دقايق وصلنا المستشفى (بقشان) دخلنا طواريء كانت فيه ممرضة كشفت عليا ولقيت الرحم مفتوح 2سم اتصلت ع الدكتورة وشافت ملفي والدكتورة قالتها طلوعوها غرفة التوليد
طلعنا فوق كشفت الممرضة طلع 3 سم بعدها اعطتني زي التحميلة قالت عشان يطلع (البراز) اعزكم الله وفعلا رحت الحمام واعطتني غيار المستشفى
وانسدحت على سرير الولادة وماما وزوجي معايا ف الغرفة بس بيننا ستارة
المهم اعطوني كمامة اكسجين وقالو كل طلقة حطي الكمامة واتنفسي بدأت احس بقوة الطلقات لدرجة مو قادرة امسك الكمامة وقتها خلو زوجي يمسكلي هيا
وانا مع قوة الطلق سرت اصيح ماابغا الكمامة بس زوجي حطها ومافككها سمعتهم يقولو انفتح 5 سم شوية قالو 8سم طلبو من زوجي يخرج مو برا بس خلف الستارة جات الدكتورة وبدأت تشجعني يلا حبيبتي مابقي شي امسكي نفسك وانا خلااااص حاااسة بفتووور ومو قادرة اسوي شي
وهي تقوللي يلا لمن اقولك ادفعي بتدفعي ولمن بدأت وانا مو قادرة تقوللي يلا خلاص الراس نازل نبغا قوتك فين ارادتك تبغي تشوفي ابنك
استجمعت قواي كلها ودفعت بقوووة حسيت بالراس لممن خرج وسمعت صوتو يبكي
وقتها خلاص حسيت ااني انتهيت الحمدلله اتطمنت عليه وانا مع التعب جاني النوم بس حسيت بالخياطة والدكتورة بتسويها
الحمدلله على كل حال
انا اقولكم يابنات ترى مافي شي سهل وربنا مايضيع الاجر
والبركة ف ماما الله يعطيها العافية اللي ماسكة القران والاذكار وبصوتها تقرا
الله يهوون عليكم يااارب
وعن ازنكم بشار بيبكي
الروابط المفضلة