السلام عليكم ورحمة الله وبركاته
الى كل ملوك النظافة والتنظيف والتنظيم والى كل واحدة تعرف حل لمشكلتى
انا فى بيتى حشرة فظيعة غريبة اسمها ( قمل الكتب ) الحشرة دى موجودة فى الشقة من اول يوم اتجوزت فية ... تخيلوا شقة عروسة
وانا والله وحدة شاهد عليه نظيفة جدا جدا جدا .... وانا مش لاقية حل ليها تعرفوا هاعمل اية هاعزل واسيب بيتى ... لانها كرهتنى فى بيتى ... ودايما اتختنق مع زوجى بسببها ... يقولى تكيفى تعيشى معاها ... وانا رافضة بشدة
يقولى كل اللى فى اسكندرية عندهم الحشرة دى بس مش واخدين بالهم منها عشان هيه بتحب الرطوبة ... أقوله استحالة
انا بسأل لو فى حد اسكندرانى عندك حشرة هى فعلا نوع من القمل بتظهر على الحيطان وخصوصه فى الاركان وحروف السيراميك والرخام ولونها شفاف وبعدين تبقى بنى ... انا اخدتها وروحت كلية الزراعة قالولى دى قمل كتب وبتموت بأى مبيد بس عندى مش بتخلص

مشوار كفاحى مع الحشرة انا بقالى 6 سنين متزوجة

السنة الاولى : جبت شركة رش رشت البيت كلة والعفش
والنتيجة عفشى اتبهدل وظهرت فى السنة التانية

السنة التانية : نجدت الانترية وهو جديد ورميت القماش عشان قلت يمكن من التنجيد ... وظهرت السنة اللى بعدها

السنة التالته : نجدت كراسى السفرة .. وجبت رش كيماوى ورشيت بنفسى وجالى تسمم وكان ابنى صغير خفت علية جدا بس الحمد لله ربنا ستر

السنة الرابعه : المحاربة بالجاز رش جاز كل يوم على كل شىء قماش وخشب
وظهرت مرة اخرى
وكل سنة فى غسيل للسجاد حوالى مرتين ورشة بالمبيد
وكل حته فى البيت الدولاب وتحت السراير نفتالين

السنة الخامسة : رميت حمولى على الله وبصلى وبدعى انه يشيلها وكنت حامل فكان ممنوع عنى المبيدات والحركة الكتير

السنة السادسة : اللى انا فيها بطلب من زوجى اعزل وبنحاول فعلا عشان اعصابى تهدى
معرفش اشيل كرتونة اى حذاء او كرتونة للعب ابنى على طول تلاقى فيها الحشرات دى وهى بتظهر اكتر فى الصيف ايام الحر والرطوبة ... وفى الشتا بتستخبه
وهى فى حجم القمل صغيرة جدا اصغر من النمل

اللى تعرفها او اللى شافتها فى بيتها وعرفت تقضى عليها تقولى ... وربنا يحفظ الجميع