" عروسات المستقبل تعالوا اقولكم".. جزء ( 4 )

[هنودة هنانيدو]

انا عاوزة اشكرك اختى هنودة هنانيدو وكل البنات اللى موجودة فى المنتدى جداااااااا وربنا يجعلها فى ميزان حسناتكو ,,لانى مكنتش بهتم بنفسى خالص(مطنشة ومكسلة ) كنت بقول لما اتجوز هبقى اهتم بنفسى براحتى فبيت جوزى,,,,
وبدأت على ايديكو عند اول مطب ليا لما اكن فيه مشروع خطوبة اتعرفت على المنتدى و عليكو ومش عاوزة اقولكو انه هو اللى كان بيقولى لازم تعملى اظافرك و تحطى مانيكير و ميكب ولازم ولازم وكده لان اى راجل ده مطلبه مش انا بس ومسمعتش الكلام اوى وقولت لو هيحبنى يحبنى زى ماانا وبعد كده ههتم بنفسى ,,بس الحمد لله الموضوع اتفركش مش بسبب الموضوع ده كان السبب ظلم ليا ,,,
المهم انا مستمرة على كل حاجة دلوقتى وبهتم بنفسى اوى
ونصيحة من اختكو المبتدئة اول حاجة لازم تعملوها هو جدول اسبوعى للاهتمام بالنفس ,,لان ده اللى هيخليكو تواظبو و متكسلوش ,,لان الوصفات و الماسكات كتيرة جدا فى الاول حاولوا تجربوا كذا حاجة وبعد كده تثبتوا فى الجدول المناسب معاكو و تواظبوا عليه انا بدأت بحاجات بسيطة لحد مبطل كسل وبعد كده هتوسع

منورة معانا يا قمر يارب تكونى مبسوطة معانا انتى كلامك مظبوط لازم نحدد ونعمل جدول عشان مش نتوه فى بحر الماسكات وان شاء الله نشوفك عروسة جميلة قريب وتعزمينا

[هنودة هنانيدو]

اهلا يانودي وحشتيني
ربنا يجازيكي كل خير
بصراحة يانودي انا فية حاجة جربتها مرة واحدةوحسيت اني بقنع نفسي بيها وخلاص
وهيا انك تجيبي خميرة ع عسل وتخفيفهم شوية ب ماء ورد وتحطيها قبل السويت
هما بيقولوا انها بتشيل الشعر الصغير بس بصراحة انا ماحسيتش كدةخااااااااااااالص
يمكن تكون بتساعد السويت ع شيل الخلايا الميتة بس
عامة ان شاء الله هجربها تاني واشوف عشان اتاكد

وانا كمان ياميويا جربتها بس مش عارفة زى مبتقولى محستش انها فرقت انا عملتها مرة واحدة بس مستنية لو جربتها تانى قولينا

[هنودة هنانيدو]

بجد ياهنوده شرحك للموضوع رائع رائع رائع مشاء الله عليكى ياقمر
وطبعا بالنسبالى انا كمان مفيش احسن من السويت وشرائح الشمع كويسه بردو
وانا جربت الترمس المطحون وزيت الزيتون بعد ماعملت من اسبوع كده والحمد لله مفيش شعر لحد دلوقتى مع انى كنت بلاحظ الجذور بدات تظهر بعد كام يوم

ووشى طبعا احسن حاجه الفتله مع ان بشرتى حساسه جدا بس لازم اعمل ايه وبعدها وشى بيحمر جدااااااااااااااااا بشكل يفجع بس بعمل ماسك ماء ورد وبودرة تلج والحمد لله الاحمرار بيروح

حلوة تجربتك يا بينك عشان كلنا نستفاد ممكن تحطى تلج علةى وشك بعد ما تخلصى الفتلة بتريح وتهدى

مبروووووووووووووك الجزء الجديد والاخت إللي سألت عن زيت اللوز طبعا الحلو للشعر والمر للبشرة

الله يبارك فيكى ياعهد وميرسى ياقمر على نصيحتك

[ميويا86]

ازيك يانودي عاملة اية؟
ازيكو يابنانيت اية اخباركو؟
يانودي احنا ماتكلمناش ع الشعر اول ما يبتدي يطلع نعمل اييييييييية؟
وكمان ف حاجة بتضايقني شخصيا انا عندي شعر ف كل ايدي وش وضهر فهماني ؟ففي مناطق مش بعرف اجيبها لوحدي تفتكري كدة لااااااااازم حد يساعدني ولا ممكن بالخبرة تيجي؟
هو الشعر طبعا اقل كثافة ف ضهر ايدي بس فية شعر فكرك يانودي يكون عندي لخبطة ف الهرمونات ولا اية؟

[هنودة هنانيدو]

ازيكم يا بنوتات ايه رايكم نهاردة نتكلم على العناية بالقدم

اوقات كتير نهنتم بالبشرة والجسم وبجد ننسى القدم اخرها معانا ماء وخلاص وبعد فترة نفتكرها نلاقى القدم مش حلوة ونقول ليه حصل كدا
ونطلع نجرى على كوافير نعمل باديكير وتواظبى مرة وتانى مرة تكسلى وترجعى تانى تنسى رجلك وهكذا وهكذا
بس فعلا لو تلاحظوا ان لو رجلك شكلها حلو بتحلى منظر عام شكله حلو يعنى بتخلى احساسك انك كلك انوثة عشان كدا لازم نهتم بيها

خلينا واضحين اننا لو روحنا مرة نعمل باديكير تانى مرة حنكسل صح ؟؟؟ عشان كدا خلينا نهتم برجلنا فى بيوتنا ونخليها جزء من اساسيات اهتمامنا بنقسنا
والطريقة بسيطة اوى وسهلة مش محتاجة تحسى ان موضوع كبير بس محتاج تعود مش اكتر ؟؟؟ تعالوا نبتدى ؟؟؟؟

الاول اول مشكلة ممكن تبقى موجودة اسمرار الاصابع واحيانا لون الاظافر بيبقى مش فاتح وده بسبب حاجتين

اسمرار الاصابع يبقى بسبب الماء انك مش تنشفى رجلك كويس بالتالى كتر الماء بيخلى فى سواد فى الاصابع
يبقى اول حاجة لازم تهتمى جدا بتنشيف الرجل كلها وخاصة عند الاصابع وبين الاصابع لان اوقات الماء بتعمل التهاب بين الاصابع نتيجة بكتريا ولو حصل كدا يبقى انتى محتاجة مرهم مضاد حيوى وطبعا ده دكتورة جلدية اللى تقولك عليه

اوقات يبقى لون الاظافر مش فاتح يبقى لونه غامق وده بردو بسبب عدم الاهتمام وكمان اوقات بيبقى تحت الظفر فيه فطريات وبكتريا بتخلى شكل اللون غامق وده بردو محتاج دكتور جلدية عشان تاخدى مرهم مناسب يخلصك من الفطريات ديه

طيب اسهل حاجة عشان ترجع لون الاصابع والاظافر للونها بعد ما عالجتيها من اى فطريات او لو مكنش عندك التهاب او فطريات بس السواد نتيجة الماء وعدم الاهتمام يبقى

الليمووووووون

كل يوم امسكى ليمونة وامسحى بيها على صوابعك كلها وتسبيها تنشف وبعد كدا اغسليها بماء عاجية ونشفيها كويس بعد اسبوع حتشوفى الفرق وعلى فكرة ديه وصفة سهلى تاخد منك دقيقة واحدة يعنى مفهاش كسل اوك ؟؟؟

نيجى لمشكلة تانية انك كعب الرجل فيه تشققات وانه خشن واواقات فيه كالو ده حله مش حيبقى بمرة واحدة ده محتاح انك تلتزمى بطريقة فى الاهتمام برجللك مرة كل اسبوع او مرتين

الطريقة هى طريقة باديكير بس بشكل بيتى سهل

الاول اعملى ده مرتين فى الاسبوع لغاية مارجلك تبقى كلها انوثة وبعد كدا خليها مرة ماشى ؟؟

الاول حنجيب طبق كبير بلغة مصريين كروانة بلاستيك ونحط فيه ماء بملح وتكون ماء دافية مش باردة عشان الدافية بتهدى وتريح الجلد اكتر بتطريه والملح بيطرى بشرة الرجل عشان تقدرى بعد كدا تكملى الباديكير كمان الملح منظف للبشرة يعنى بيخلصك من بكنريا كانه غسول .. تسيبى رجلك لمدة ربع ساعة

نشفى يالالا رجلك كويس زى ما اتعودنى وتجيبى الحجر الاسود او المبرد بتاع الرجل او الحجر الخفيف بس فعلا الافضل الحجر الاسود حتلاقيه فى محلات التجميل والعطارة ورخيص جدا

وحتبتدى بالحجر تفركى كعب رجلك وكل رجلك من تحت وتركزى على الكعب لغاية ما تحسى ان لون رجلك بقى وردى وتحسى ان ملمس كعبك بقى انعم .. طبعا هو فايدة الحجر ايه ؟؟؟
اولا بيشيل كل خلايا ميتة اللى بتعمل خشونة فى الكعب وبالتالى حتخلصى من طبقة الخشنة وتلاقى طبقة ناعمة تطلع
ثانيا بتنشطى دورة دموية وبكدا الدم حيتجدد وتلاقى لون الكعب وردى
ثالثا لو عندك كالو او اى حاجات صغيرة بارزة فى باطن الرجل الحجر مع ماء وملح حيذوبها مرة بعد مرة ..كدا خلاص من الحجر

حتبتدى تقصى اظافرك وتحاولى تقصيها الاول من نص الظفر وتكملى عشان يطلع شكله مستوى ميبقاش جزء من الظفر اطول من جزء ولو مش بتعرفى تعمليه كدا مرة بعد مرة حتتعودى

تجيبى مبرد بتاع الظوافر وتبردى صوابعك عشان تبقى متساوية ومتبقاش حادة فيه انواع من مبرد يبقى فيه جزء لتلميع الظوافر ودهخ موجود كتير فى محلات التجمبل ورخيص يبقى جزء مبرد للاظفر زجزء ملمع الاظافر ده اعملى بيه اظافرك عشان يشيل بردو طبقة الخشنة الغامقة من فوق

كدا انتى قصتى ظوافرك وعملتيها بالمبرد ولمعتى ظوافرك بعد كدا حتجيبى مبرد بيبقى مخصص لتنظيف الجلد اللى بين الاصابع لو مش عندك هاتى مبرد عادى اللى بيبقى فيه زى جزء حاد من قدام زى سن كدا وتنظفى بيه بين الاصابع حتلاقى كل جلد ميت بيطلع معاكى

بعد ما تخلصى كل ده نظفى رجلك بالفوطة عشان تشيلى اى بقايا من خلايا او الاظافر مكان القص وكدا

وتيجى بقى للترطيب لانه يعتبر نص مرحلة اللى فاتت انتى خلاص نظفتى لازم بقى ترطبى

زى ما اتفقنا لو انتى حتعملى مرتين فى الاسبوع خليها مرة ماسك طبيعى ومرة يبقى كريم جاهز

نيجى للماسكات ميزتها طبعا طبيعية وتنظف وتنعم وتغذى الجلد لان بطبيعة الرجل خشنة لازم نرطبها عندك
زيت اللوز لوحدة تهدنى بيه رجلك وتسبيه من غير غسيل
زيت اللوز + ماء ورد + ليمون ده بيرطب وبيفتح
جلسرين سائل + ليمون وده من وصفات اللى فعلا بتنعم وتفتح جدا

طيب تانى مرة حتجربى كريم جاهز عندك انواع كتير
كريمات مخصصة للقدم من ماركات كتيرة
فازلين روعة
كريم جليوسليد او ممكن يتضاف عليه زيت اللوز او الليمون

سواء كانت ماسكات او كريمات تسبيها على رجلك من غير غسيل يعنى بعد رجلك ما تمتصه البسى شراب عشان يقفل ومسام تتفتح وتستفاد البشرة اكتر بس ممكن تكونى مش بتحبى الشراب زى حالتى خلاص مش لازم تلبسيه بس خلى رجلك شوية تتشرب الكريم او الماسك قبل ما تتحركى

كدا النتيجة بجد حتبقى حلوة وحتعجبك ةبعد كام اسبوع انتى بنفسك حتشوفى الفرق

كمان وانتى لما تحطى كريم او الماسك طبعا بيتحط على كل الرجل والاصابع وكله حاولى تعملى تدليك بسيط زى مساج للرجل بمجرد حركات بسيطة بايدك على الكعب وعلى الاصابع عشان تحركى دورة دموية ويمتص اكتر كريمات

لو بتخرجى وتلبسى صندل مفتوح يبقى لازم تحطى صن بلوك على رجلك قبل ما تطلعى فى الشمس عشان الشمس حتخلى لون رجلك جزء فيه غامق وجزء افتح ويبقى مفيش لون موحد للرجل

لما ترجعى من اى مشوار وحاسة ان رجلك مرهقة حطى رجلك فى ماء دافيه واو شاور حطيه فيه وخلي رجلك فيه ربع ساعة تريح الجلد ويشيل التعب كمان الاحلى من الشاور انك تحطى زيوت اللى بتهدى وتريح القدم زى النعناع او البابانوج هاتيهم من العطار وحطى منهم كام نقطة على ماء دافية وسيبى رجلك فيها وكل ما تحسى ان رجلك ناشفة حطى كريم عليها عشان تبقى رطبة اكتر لان الحر والصيف بزود الخشونة

[هنودة هنانيدو]

ازيك يانودي عاملة اية؟
ازيكو يابنانيت اية اخباركو؟
يانودي احنا ماتكلمناش ع الشعر اول ما يبتدي يطلع نعمل اييييييييية؟
وكمان ف حاجة بتضايقني شخصيا انا عندي شعر ف كل ايدي وش وضهر فهماني ؟ففي مناطق مش بعرف اجيبها لوحدي تفتكري كدة لااااااااازم حد يساعدني ولا ممكن بالخبرة تيجي؟
هو الشعر طبعا اقل كثافة ف ضهر ايدي بس فية شعر فكرك يانودي يكون عندي لخبطة ف الهرمونات ولا اية؟

ميويا ياقمر اول ما الشعر حيطلع زى ما قولنا لو ةانتى فى اول الجواز حتضطرى تعملى سيلكم ابيل مفيش حل تانى غيرها لانها هى اللى بتشيل الشعر القصير اما لو دلوقتى وانتى لسه مش متجوزة يبقى عادى سبيه يطلع عشان تعملى بالسويت وبردو بعد الجواز لو شعرك من نوع الخفيف سبيه يطلع شوية واعملى سويت لازم زوجنا يفهم بقى ان ده امر طبيعى بس واحدة واحدة عليه هههههههه

الشعر اللى فظهر ايدك قصدك اللى فى ظهر ذراع صح ؟؟؟ لو ده عادى وموجود عندنا كلنا وبيبقى خفيف ومش محتاج حد يعمله ليكى واحدة واحدة حتعرفى وبسرعة حتخلصيه

[امامة محمد]

حلو اوى الموضوع فعلا جزء كتير بيكسل عنه زى كده الف شكر يا قمر

[سماح عزت]

والله ما قصرتى يانودى ياسكره ولوحصل منناتقصير يبقى احنا الى نستاهل واجمل حاجة فى كلامك هى البساطة ولو طلبناه فيديو مش هيكون احسن منك فى توضيحك ياقمر..نفسى اعرف بتشتغلى ايه يانوده لان بصراحة مش عارفة خبراء التجميل تيهين عنك فيناللهم لاحسد.. ربنايبارك فيكى..نودى انا لما بعمل سويت تحت الابط مش بلحق افرحعشان المكان بيكون لونه غامق كان الشعر لسه موجود مع انى مش بعيد كتير والله وكمان لما بيبدا يطلع بيبقى عامل زى الشوك..وكمان الرؤوس السودة الى فى الانف حلها ايه يا جميلومعلش اخر حاجة منطقة السرة الى فى البطن ايه اسهل طريقة لتنظفها؟؟وجزاكى الله خيرا ويرزقك طولت البال عشان تستحملينى

[ميويا86]

ميويا ياقمر اول ما الشعر حيطلع زى ما قولنا لو ةانتى فى اول الجواز حتضطرى تعملى سيلكم ابيل مفيش حل تانى غيرها لانها هى اللى بتشيل الشعر القصير اما لو دلوقتى وانتى لسه مش متجوزة يبقى عادى سبيه يطلع عشان تعملى بالسويت وبردو بعد الجواز لو شعرك من نوع الخفيف سبيه يطلع شوية واعملى سويت لازم زوجنا يفهم بقى ان ده امر طبيعى بس واحدة واحدة عليه هههههههه

الشعر اللى فظهر ايدك قصدك اللى فى ظهر ذراع صح ؟؟؟ لو ده عادى وموجود عندنا كلنا وبيبقى خفيف ومش محتاج حد يعمله ليكى واحدة واحدة حتعرفى وبسرعة حتخلصيه

ااااااااااااااااااااااااااااااااااااااااااااه انا كدة فهمت يعني نضحك عليهم ف الاول وبعدين
عووووووووووووووووووووووووووووووووووووووووو
يلاقي واحد صاحبه قاعد جانبة ههههههههههههه
عارفة يانودي انا بس اللي قالقني من السيلكابيل ان الملمس مش ناعم بس ربنا يسترها بقةاه صحيح هيا بتاعتك رقمها كام يانودي وجايباها منين وبكام؟
بصي انا كان قصدي الشعر اللي ف ظهر الذراع عشان مش بعرف افرد السويت وبعدين اشيلها بس شكلها هتيجي بالتعود ان شاء الله

[slavotta]

ازيك يا هند عايزة اسألك على التشقير بيتعمل ازاى عشان شعر الضهر و البثور السوداء اللى فى الانف و فى الوش حلها ايه كمان انا الحبوب مبهدلانى و مش نافع معاها فيوسيدين و مش عارفه اعمل ايه هيا حبوب رفيعه بس كتير فبدأت اغسل وشى بصابونه بروتكس فهيا هتضرة؟ و عايزة اعرف لو اكسفولياتف او كلينسر كويس يبقى ايه و اخر حاجه انا جبت خل التفاح من العطار لونه برتقانى زى لون ميراندا و بيلون الايد فهو كده سليم و لا ؟ معلش طولت عليكى و ادعيلى اخر ماده تعدى على خير و اتخرج بقى

[pink_heart]

هنودة فعلا الموضوع ده مكنتش بهتم بيه خالص زى ماقولتى رجلى اخرها معايا شويه ميه وخلاص
انا مش عارفه اقولك ايه على مجهودك الجميل ده بس انا متاكده ان شاء الله انك حتكونى احلى عروسه فى نظر زوجك عشان روحك الجميله دى

[ملوكة 12]

أولا الموضوع جميل جداااااااا
بصى فعلا يا هنودة انا عملت كده وزيت اللوز
مع كريم جليسوليد جميل جدااا ومن أول اسبوع
يعنى بجد مجهووود منك رائع جدااااااااايا هنودة ربنا
يجعله فى ميزان حسناتك

[غيوووره]

مشكوره على المعلومات المفيده

[سماح عزت]

ازيكم يا قمرات ان شاء الله تكونوا بخير وربنا يسعد ايامكم كللللللللللللللللها ويجمعنا على خير برفقة سيدنا محمد صلى الله عليه وسلم فى الفردوس الاعلى <ياترى القمر هنودى مش ظهرت النهارده ليه ؟ يارب يكون خير يانودى طمنينا عليكى ياجميل >

[امامة محمد]

ازيكوا يا عروسات يا قمرات

هنودة عاملة ايه ياجميل مستنين تألق اليوم يارب تكونى بألف خير و سعادة