تويت
*وصفات متميزة*الفراخ المتبلة=4 أطباق من طريقة واحدة "من مطبخ كريس"
الفراخ المتبلة=4 أطباق من طريقة واحدة "من مطبخ كريس"
مساء/صباح الخيرات على أحلى القمرات،اليوم معايا طبق بجد تحفة وينفع تعملى منه 4 أطباق مختلفة كلنا بنحبها،ومن غير ماتضيعى وقت كبير وتوفرى كمان مجهودك وهترضى كل الأذواق فى نفس اليوم.
الطبق الأول والأساسى فراخ متبلة.
الطبق التانى فراخ مقلية بالنكهة المتبلة.
الطبق التالت فراخ مقلية أحلى من دجاج كنتاكى.
الطبق الرابع .....فراخ مشوية....يم يم.
نبدأ بسم الله
المطلوب :
· فراخ حسب عدد الأفراد
· بصل مخرط ....مش مبشور
· فلفل اخضر مخرط قطع
· طماطم مخرطة مكعبات صغيرة
· ملح وفلفل أسود
· توابل أخرى/اللى تحبيه...بستعمل خلطة مكونة من القرنفل والقرفة والكبيبة الصينى
· مرقة دجاج فورية...حسب رغبتك
· عصير ليمون أو خل
· بطريقتى بستخدم لكل فرخة 4 بصلات متوسطة،1حبة طماطم، 1 فلفل اخضر،عصير ليمونة،ربع ملعقة صغيرة خليط من (القرنفل والقرفة والكبيبة الصينى مطحونين وممزوجين)،ملح وفلفل أسود،كيس مرقة فورية.
الطريقة :
اغسلى الفراخ بطريقتك وحضريها.
خرطى البصل وضيفى عليه المرقة الفورية والملح والتوابل وعصير الليمون ،لكن حاذرى وانتى بتضيفى الملح لأن المرقة الفورية فيها ملح ،افركيهم الى ان يدبل البصل ويتشبع بالتوابل.
صورة كيس المرقة الفورية
..................................................
ضيفى عليه طماطم وفلفل أخضر واستمرى فى الفرك وتأكدى من ضبط طعم الملح.
.................................................. .
ضيفى قطع الفراخ للخليط وقلبيها و زيدى عليها كوب ماء واتركيها لليوم التالى فى الثلاجة/البراد.
.................................................. ..
وقت الطهى ضعيها فى حلة/طنجرة/جدر وغطيها واتركيها تنضج على نار هادئة،لوجفت ضيفى القليل من الماء.
بمجرد أن تنضج :
1.أصبح عندى طبق فراخ متبلة شهى ولذيذ وتتبيلته ألذ ..وما أطعمها بالخبز.
.......................................
2.ممكن أزيل التتبيلة من عليها وأقليها فقط فى زيت من غير تغطيتها بأي شىء لا بيض ولا بقسماط وبتكون مقلية بالنكهة المتبلة.
.................................................. .................
3.ممكن أغمس قطع الفراخ من غير التتبيلة فى الدقيق/الطحين ثم البيض ثم البقسماط الناعم ولو كان كورن فلكس بدل البقسماط تطلع كرسبى اكتر واجمل من دجاج كنتاكى.
.................................................. .....................
4. اخيراً لما أحبها مشوية بسويها بس 3/4 سوا فى الحلة وبعدين بوزعها فى الصينية اللى بنعمل فيها البسبوسة أو صاج الفرن وبفرش تحتها الخلطة عشان مش تحترق وعلى الفرن مباشرةَ وهى ساخنة أو تحت الشواية...على فكرة الفرن احسن من الشواية ولما تشويها وهى ساخنة تطلع أطرى ومش ناشفة ،ولما يحمر الوجه بقلبها على الوجه التانى.
.................................................. ....................
مشوية مع صلصة التتبيلة وشرايح الخيار
.................................................. .....................
مشوية مع المكرونة
.................................................. .......................
مشوية مع الرز بالمزاليكا/الكبد والقوانص
.................................................. ..
والمفاجأة انك ممكن لو مش محتاجة التتبيلة المطهية ،تاخدى جزء منها وتضيفيها مع الماء للرزالأبيض ..واستمتعى بالطعم، خاصة أنها غنية بخلاصة الفرخة المركزة.
فكرة إضافية:ممكن تستعملى نفس الخلطة/التتبيلة (دون طهيها) مع فرخة كاملة وتبيتيها فى الثلاجة وتشويها فى شواية الفرن تانى يوم.
...........
ادخلى الرابط اللى تحت،لو تحبى طريقة عمل الرز بالمزاليكا
*طبق متميز*عشان خاطر عيون أم لمى ولمار "فراخ محشية بطريقة سهلة وجديدة" ............
الحمد لله خلصت.. بتمنى أكون وفقت وأطباقى نالت رضاكم وتوفر مجهودكم،وبعتذر عن عدم وضوح بعض الصور...دمتم بخير
..............
إذا كنتى زائرة أو عضوة وأردتى نشر الموضوع فى منتدى آخر، فأرجو من الله ألا تنسى وتكتبى أنه منقول.
تعليق