تويت
*طبق متميز*المقلوبة من مطبخي وعلى طريقتي
مسا الخير صبايا كيف الحال
المقلوبة عنا بفلسطين لازم تنطبخ كل جمعة وهاي عادة تقريبا تلات ارباع الناس بتعملها
حبيت اليوم اورجيكم طريقتي بعملها
وهي فعلا طبخة كتير زاكية خصوصا ازا كانت مطبوخة بنفس
انا بعملها دايما على باتنجان وهيك بحبها
قليل لا اعملها على زهرة
وازا عملتها على زهرة بعملها على لحمة خاروف
وبحط كمان جزر وحبة بطاطا ونص قرن فلفل بحرق
الجاج بسلقو عادي ومرات بحط حمص حب
بس في ناس بتقلي الدجاج قبل ما ينسلق
انا بقلي بعد السلق اطيب
بدو الجاج بطنجرة الضغط نص ساعة على نار هادية
وبقلي الخضار وبصفتها بالطنجرة
وما بصفي الخضار من الزيت لاني بحب المقلوبة مزيته
بعدين بحط مقدار مغرفتين من مرقة اللحمة على الخضار
وبخليها تغلي غلوتين مش اكتر
والرز بحط عليه ملح بس مش كتير لاني حاطة ملح بالمرقة
وبحط فلفل اسود وقرف مطحونة وبهار مشكل
وبحط بهار مقلوبة كتير زاكية وعصفر وشوية كركرم
وزنجبيل مطحون وهال مطحون وكله ربع معلقة صغيرة
وانا بدي احكي شغلة مهمة بالنسبة الي
اني بخلط للمقلوبة رز مصري ورز حبة طويلة
بخلي المقلوبة مش مخبصة وكل حبة لحال
وانا كمان بحط شعيرية للرز وطبعا بقليها بنفس الزيت
اللي قليت الخضار فيه وبديرها هي والزيت على الرز
والمرقة طبعا بصفيها من البصل والبهارات الصحيحة
وبحطلها معلقة ماجي بعطيها نكهة كتير زاكية
اسفة طولت عليكم بالكلام بس بدي اعطيكم الطريقة بالتفصيل
بس تغلى المرقة على الرز ونيجي نوطي الغاز بنحط قماشة
على تم الطنجرة وبنحط الغطاية فوقيها
وهي الطريقة بتخلي الرز يستوي على البخار وما بطلع مخبص
وهاي صورة الطبق النهائي وما تنسي تفرمي بقدونس على وجها
وتحطي صنوبر ولوز وبتتاكل مع اللبن النعاج والسلطة
بس انا بحب اكلها ناشفة علشان استطعم بطعمها
وما تنسوني من دعواتكم الحلوة
[
تعليق