المنسف الاردني

[ام ياسمين]

هذه الطبخه تنفع للعزايم ان شاء الله تعجبكم
رز كيلو من رز الاسترالي ( صن وايت ) نشا 3كيلو لبن الرايب لحمة قطع كبيره بعضمها
لوز صنوبر و بقدونس للزينه
تسلقي اللحمة وتنقعي الرز وتقشري الوز
جيبي اللبن وتضعيه بخلاط المولينكس مع 3ملاعق نشاوقليل من الماء وتخلطيه الى ان يصبح مثل الحليب, بعد هيك تضعيه في الطنجره على النار وضلك حرك فيه الى ان يغلي بس يوخذمنك وقت .
لاتتركيه يخرب اذا تركته حتى لو للحظه واحده, بعد ما يصير تضعي ملح وفلفل ابيض وحب الهال المطحون واهم شئ الكركم ( العصفر ) وتحركه مع بعض بعد هيك بتكون اللحمه صارت تضعي اللحمه مع اللبن وتخلطيه بالكفكير ثم ضعيه جانباً ,تبدائ بطبخ الرز ضعي ماء كمقدار الرز وملح وسمن بلدي او زيت ذرة خلي الماء تغلى بعد ما الغلى اسكبي الرز فوقه بس بعد ما تغسليه وتخليه يطبخ على نار هادئه بعد هيك تقلي اللوز الصنوبر وتفرمي البقدونس ناعم وتخلي على جنب
بعد ما يصير الرز تسكبيه في صدر وتضعي فوقه اللحمه وزينيه باللوز والصنوبر والبقدونس وتضعي اللبن بعد ماتصفيه في وعاء للشوربه وتقدميه
صحتين وعافيه
ان شاء الله تكون عجبتكم

[estrellas]

الله يسلم ايديك اختي ام ياسمين منورة الركن

[ام ياسمين]

واديك يارب
منوراه بوجودك

[estrellas]

تسلمي يارب كلك ذوق

[ساره الشامي]

ام ياسمين هون يامرحبا اقول ليش الركن منوررررررررررررررر اليوم ايه شو هاد طلعتي خطييييييرة
تسلمين يا عسل على المنسف الاردني اللذيذ وان شاء الله اجربه في اسرع وقت ممكن ....
الله يعطيك الف عافية......
في انتظار المزيد من اكلاتك الرهيييييييييييييييبة والطيبة....

[ام ياسمين]

منوراه بوجودك عزيزتي ساره والله يعافيك
والله لولا تشجيعك لي ما اكتب شئ لاني اخاف الحبايب يقومو ما يفهو شو هي الطبخات
و كمان ما القى تشجيع بس الظاهر كنت غلطانه
خذي بالك هو سهل ولذيذ يمممممممممممممممم
ان شاء الله انتظريني

[farahr]

يسلمو ام ياسمين على الوصفة وازيد معلومة حتى يمكس اللبن يمكن اضافة بيضة بدل من النشا او ملعقتين طحين واذا كان اللبن شوي ماسك يمكن انه تزيدي شوية ميه عليه حتى لما يغلي تتبخر المي ويظل اللبن وكمان اذا كان المنسف شوي حامظ يمكن تستعملي بطاطا مقشرة توضع مع المنسف بعد ان يغلي ثم تزال عندما تصل درحة الحموضة الدرجة المقبولة ويمكن ايضا استعمال الشنينة او (الجميد مع البن)

[ام ياسمين]

جزاك الله خير على اضافتك هذا الرد و كل هذا الحكي مزبوط
بس لما تعملي اللبن الافضل وضع النشا بدل من البيض لانه مرات يخرب وانا بعد التجربه بفضل النشا
والافضل من هيك هو طبخه بالشنينه بس عليك تحطيه بالطنجره وعلى النار بدون اي شئ وضلك تحركي فيه الى ان يغلى اذا كان بدو ميه تحطي عليه بس ما تخليه سائل كثير والمنسف يااختي farahr لذته بحموضته وممكن اضيفي على اللبن شويه( جميد ) خاصه اذا كان جميد كركي يعني مصنع بالكرك بس وين الجميد الكركي و وين حنا حنا باخر الدنيا لكي مني تحياتي farahr من ام ياسمين
دخلك سؤال هل انتي اردنيه

[ام بسام]

اهين..............ام ياسمين

الله يعافيك علي الطبخه الحلوه
بس احنا لما نعمل المنسف نحط خبز ونعملو طبقتين يعني خبز (شراك)
وبعدين رز مسلوق وبعدين طبقه خبز وبعدين طبقه رز وبعدها اللحمه
واللبن او (المرق) نعملو (باللقط) او النجيش او ( البقل)
اكيد عرفتيه لان طعمه احلي من اللبن
وبس وتسلمــــــين علي المنسف

[haneen]

السلام عليكم ورحمة الله وبركاته
يسلموا ايديك يا رب طريقتك مزبوطة 100%
بالمناسبة انا اردنية و راجعة هناك بعد اسبوع بإذن الله بعد غيبة 4 سنين متواصلة............بتوصي على شي

[ام ياسمين]

الله يسلمك يا ام بسام
انا اول مره اسمع بالطريقه هذه بس باين عليها لذذذذذذذيذه
ان شاء الله تصلي بالسلامه يا حنين بوصيك تبعثيلي كنافة نابلسيه من اربد من مطعم زياد حبيبة الى في شارع الجامعة ( جامعة اليرموك ) اذا كنت ساكنه في اربد ههههههههههههههههه بمزح ما بدنا غير سلامتك سلمي على اهل الاردن لك مني هذه الهديه

[farahr]

ام ياسمين يسلموا ايديك طبعا المنسف طعمته رائعه بلحموضه بس احيانا تكون زايادة عن اللزوم انا هيك بصير معي انا بعمل اللبن بالبيت واحيانا يكون حامضا جدا لدرجة يصعب اكله وهذا ما اقصده وكلامك كله على راسي ويسلموا ايديك ومستنا منك طبخه جديده شو رايك تعطينا وصفة المكمورة اذا سمحتي ان شاء بتكوني بتعرفيها بارك الله فيكي ورايحه اوصيلك على جميد كركي من الاردن مع مين ما يكون رايح على استراليا الله يهون علينا غربتنا

[farahr]

صحيح حنين اذا فيها تدخل وين ساكنه في امريكا ( في اي ولاية) انا في ميتشجان ان شاالله نشوفك