مهم لكل الليبيات من هنودة

[ابريكه]

السلام عليكم ورحمتة تعالى وبركاتة
هذا الموضوع كورشة عمل لليبيات
بطلب من الغالية هنودة
كونها عندها فكرة وموضوع حابة تتعاونو معها
وتفتحوا ملف مميز
لأعطاء صورة مفصلة وبحثة عن تاريخنا وماضينا النير
والحافل بكل الفنون اليدوية والعادات والتقاليد في مناسباتنا

تعالو هنا أخواتي
ونبداء بأسم الله
وفقكم الله لما يحبه ويرضاة

[ابريكه]

رجاء من مشرفات الركن الغاليات عدم قفل هذا الموضوع
وبارك الله فيكم

[المطمئنه]

موضوع حلوه بريكه
انشاء الله نكون معكم

[hendaaa]

بارك الله فيك اخت بريكة على توصيلك الرسالة

طبعا على كلام زينب محمد نصيحتها


متستعجلوش على اقل من مهلنا فى الموضيع
باش يطلع الموضوع كامل مكمل

وكل ما تنتهوا من الموضوع ابعتوه للاخت زينب محمد عن طريق رساله باش اتشوفه
وتقوللنا شن ناقصها ولما نبدوا كنا جاهزين ناخدوه كوبى من الرساله وانحطوه فى يوم واحد وباقرب الاوقات

وبارك الله فيكم جميعا

[زينب محمد 2]

السلام عليكم و رحمة الله و بركاته

اسعد الله اوقاتكن بكل خير اخواتي

امس الاخت هند مشكورة ارسلت لي رسالة خاصة تدعوني فيها للمشاركة في المواضيع التراثية

و كان هذا جزء من ردي عليها

فكرة احياء التراث فكرة حلوة

لكنها تحتاج تنسيق و طولة بال

لا تبدوا في عرض المواضيع الا بعد ما تخلصوا كل شيء و يكون قي افضل صورة

لابد ان تكون المواضيع المطروحة قيمة جدا و متكاملة

اي يتم تغطية الموضوع المطروح من كل جوانبه

و الصور المعروضة من افضل ما يكون

انا عندي موضوع للزميطة و موضوع للسحلب

مصورتهم من شهر 11 لكن ما جتنيش نية نزلهم

باقي اكلاتنا الليبية و حلاوياتنا سبق و قدمتها

بالنسبة للزي الليبي

لو عرفت من ايام كنت صورتلكم ذهب اختي و بدلاتها

فذهبها كامل و من حوالي شهرين مغيراته كله و واخذاته نفس النقشة

لكن توا منقدرش لان شبانيها غدوة بيرقد في المستشفى بيدير عملية قلب

و معنديش خو متزوج حتى نصور ذهب زوجته

لو تفكرت حاجة ثانية نديرها

ما تنسوش تكتبوا اغاني البوطويل اللي يغنوها في العوالة

و القفة و القنديل و ارسلي لالاء ادعيها للمشاركة

مرة ورتلي سوابيت مولود موتينهم لخالتها

و قالتلي عندها صور عن المدينة القديمة و صور اثار

انا عندي صور بنوتات مجمعتهم من النت لابسات بدل كبيرة و صغيرة و بدلة الجلوة

نكرر اهم شيء ما تستعجلوش

بالعجلة عمرها ما تجي حاجة كويسة

جهزوا كل شيء و بعدين اطرحوا المواضيع

لاني سبق و شفت مواضيع طرحت و كانت ناقصة

ليش ما تديروا موضوع عن متحف السرايا؟

و لو قدرتوا اشتغلوا المواضيع على المسنجر قبل طرحها

يعني تشكلوا فريق و اللي بتشارك تضاف على مسنجر احداكن

و تجهزوا المواضيع و تطرحوها على المجموعة ككل عبر الايميل قبل طرحها في المنتدى

حتى اللي عندها اضافة تضيفها و يتغطى الموضوع من كل جوانبه

لانه مرات تكون فيه نقاط اغفلتها صاحبة الموضوع او نستها او لا تعرفها

و بهذه الطريقة ينبهوها لها الاخوات الاخريات و يضيفوها

هذه هي اقتراحاتي و لكن القرار

افضل ان يكون الشغل ضمن فريق الكل يتعاون فيه

و التي تضيف صورة تكتب عليها اسمها

و الموضوع يكون باسماء كل الاخوات اللاتي اشتركن فيه

كذلك الافضل ان لا تكون الصور من النت

بل تكون صور جديدة ان توفرت

كذلك نفس الشيء بالنسبة للمواضيع

الافضل ان لا تكون نسخ لصق من الشبكة

و لكن يمكن البحث في الشبكة ثم تتم كتابة موضوع بصياغة جديدة

كخلاصة لهذا البحث

و يوجد بالشبكة العديد و العديد من هذه المواضيع

التي تتناول تراثنا من جميع جوانبه

كذلك هناك قصص من التراث و الامثال الشعبية

و الاغاني الشعبية

الرحى و اغانيها

الحرث و اغانيه

تجبير الصغير و ملاعبته و مناغاته

اللحوس اللي يعطوه للطفل زمان

اغاني البوطويل كتابتها و لو فيه مقاطع صوتية لها

و غيرها

الاطباق التراثية

البركوكش

البازين بلوسة

البازين بالحسي

البازين باللبن

البازين بخلطة البقوليات

كسكسي السبول

كسكسي القمح

خبز الملال

خبزة الحماس

الشرمولة بالليم القارص و الفلفل الاخضر

و غيرهم

انا ذكرت بس اللي خطروا على بالي و ما نزلتهمش و انت زيدوا تفكروا

كذلك موضوع الخطبة و البيان والعرس بكل تفاصيلهم قديما و حديثا

و صور سوابيت البيان و صور السوابيت اللي يردوهم للعريس

و سوابيت القفة و القفة و ماتحتويه من مواد و اعشاب عطرية

و السوابيت اللي توتيهم ام العروس للبيبي الاول

و الاشياء اللي ترفعهم لبنتها لزوم العصيدة و الحلويات متع السبع ايام

و حلويات و مستلزمات السبوع

مواضيع عن المدن السياحية و المتحف الجماهيري

هذا اللي خطر ببالي الان

و ان شاء الله اشارك معكن باللي نقدر عليه

لانه لم تعد لي رغبة بتنزيل مواضيع

موفقات باذن الله

[زينب محمد 2]

و ما تنسوش الشاهي بالعالة

[hendaaa]

شن بنقولك يا زنوبه


ما قصرتى



مشاء الله افكار حلوة



المهم العالة على قولتك الى فى ليبيا يصوروهالنا بالطاسه الاولى والثانية والثالثة


انى عندى عالة لكن نسيت كيف يطبوا فيه الشاهى


وبالنسبة للزى الليبى صورت صور

بس مش ملبوسه وهيا محطوطه



............


وبالنسبة للاسبوع البيبى اختى اسبوعها السبت الى فات فى الصالة صورتلنا كل شئ


وهوا احد مواضيعى


بس محتارة شن اندير الموضوع


ز...........................




بارك الله فيك زينب على التشجيع




والله يوفقنا جميعا

[hendaaa]

وين الباقيات


والله غر الرسايل وخلاص



معاش نبى على الخاص
الهدرزة على هدا الموضوع


تعالوا هنيا باش نعرفوا ونجبوا افكار

[hendaaa]

بنات الى بديرلنا التصميم حق التوقيع


قالتلى




انديرلكم قروب الثراث الليبيى لسنة 2010


والى احنى انميزوها ينا



مميزة الثراث الليبى لعام 2010




والباقى مشتركة فى الثراث الليبى لعام 2010


...................




بصراحة انا افضل انحطوا فى التوقيع كنا قروب الثراث الليبيى والباقى مش لازم


لان كنا بنتعبوا ونكونوا المميزات


............


رايكم يهنا فى هدا الموضوع

[حبيبة زوجها2009]

ماشاء الله فكرة حلوة جدا
والافكار كتيرة ومتنوعة يارب انشارك معكم عن قريب ولو بشى بسيط

[ليبية طيوبة]

موضوع حلو انا عندى صديقتى اللى هى مصممة الازياءربيعة بن بركة الله يدكرها بالخير

لو خديت منها حاجات حنعرضها عليكم ونحطها انا من النوع اللى حشومية هلبة لكن انحاول

ومشكورين هلبة

[hendaaa]

بارك الله فيك



حبيبة زوجها

وان شاء الله انكونوا سعدين بموضوعك حتى ولو بسيط

معنى متاكده منك مرح يجئ شئ بسيط

الله يوفقك ويوفقنا جميعا

[hendaaa]

اهلا وسهلا بيك ليبية طموحه يا ريت


الاشياء الغريبة منها


وبجوده بيك وبصاحبتك


وبارك الله فيك


والله يوفقك ويوفقنا

[hendaaa]

اكيد اسم على من يسمى طيوبيه اكيد رح تكونى خجوله

ههههههه



الله يوفقك



موضوعنا يبى جرئه شويه شدى حيلك هههه

[hendaaa]

انى شفت هلبة ليبيات خشوا للموضوع ومطنشين

مش عارفه علاش
بس