ركن خاص ببنات المنصورة_ واهم اماكن للتجميل والشراء(الجزء الرابع)

[بنت أصول]

بت يا جومانة أوعي تتطلعي واد انتي كمان ههههههههه


بصي بقى يا سيتي
انا ممكن أعملك مفرش صالون باللون اللي يعجبك وكمان الخامة اللي تحبيها
وعدد 5 قطع كمان مش 3
2 خدادية و2 طقطوقة ومفرش
والحجم كبير 75سم *75سم لو مربع
أو متر*50سم لو مستطيل
ومش مطالبة إنك تاخديه يعني لو معجبكيش متاخديهوش لأنك طبعا مشفتيش شغلي
وعشان خاطر ما اتأخرش عليكي
نتفق على معاد انزلك فيه الصور
ولو عجبك نتفق على طريقة أوصلهولك بيها

ودي خيارات اختاري بينها

الحجم:
مربع 75*75
مستطيل 100*50

الخامة:
أورجانزا
ستان
تفتاه
شيفون

اللون :
بيج
بني
نبيتي
زيتي
أو دمج لونين
أو مربعات ألوان

مطرز بخرز تشيكي أصلي لا يفقد بريقه
والله شارية الكيلو ب70 مع إن المصري العادي ب 12
وكمان بالأحجار
وخرز خشب لو حبيتي

وبفكرك ان لو معجبكيش مش لازم تأخديه بس قولي طلباتك ويلا نبدأ بيكي وربنا يسهل

ها عرفيني لو عجبك عرضي أحسن نظام الكمية صعب عليا لوحدي
إن شاء الله لو الموضوع مشي هبقى اشغل معايا بنات و يبقى عندي مشغل

[بنت أصول]

وتأكدي إن السعر هيكون أحسن بكتير من اللي شوفتيه

[jomana8090]

أة صح انا كنت كتبت لكم انة ولد بس المندى هنا مكانش لسة فية الاوبشن بتاع حفظ الكومنتات

بصى يا بنت أصول انا مش بفهم ف الخامات بس عايزاكى تنقى لى الآفضل
انا الآنترية بتاعى بأذن الله هايبقى نبيتى ف دهبى
والستاير برضة نبيتى ف دهبى
فعايزة المفرش يبقى برضة نبيتى ف دهبى بس يبقى كله شغلة
والتربيزة هاتبقى بأذن الله مستطيلة
بس بصراحة لسة معرفش مقاسها أد اية
وعايزة يا دوب 2 مفرش طقطوقه بس يبقى شغلهم من ع الآطراف بنبيتى لآن هايبقى فوقهم الاباجورات
بس يا ستى شوفى كدة الموضوع هايتكلف كام وقوليلى ويا ريت لو كنتى خلصتى حاجة تعرضيها علشان كلنا نتفرج
أتفقنا؟

[بنت أصول]

خلاص اتفقنا يبقى
أور جانزا نبيتي في ذهبي شغل ثقيل نبيتي في ذهبي مستطيل مع اثنين طقطوقة مطرزة من الأطراف وبلاش خداديات
حقيقي انا لسة مخلصتش حاجة لأني مكنتش ملتزمة مع حد بمواعيد لكن ان شاء الله مش هتندمي و هيعجبك الشغل .
ميعادنا إن شاء الله بعد اسبوع يعني الخميس القادم هكون خلصت الشغل إن شاء الله وهنزل صوره .
بالنسبة للسعر طبعا انت عارفة انا مايهمنيش دلوقتي الربح قوي قد ما يهمني النجاح عشان كده كفاية أوي 150 جنيه سعر نهائي إن شاء الله .
قوليلي ها اتفقنا كده ؟
مستنية ردك..........

[jomana8090]

أتفقنا يا ستى خلاص
بس أهم حاجة يكون شغل شيك ورقيق هو الانترية نظام امريكى على فكرة
وبجد مش هاوصيكى أتفقنا؟
واول ما تخلصى حاجة اعرضيها لنا نشوفها
ويارب شغلى يبقى فاتحة خير عليكى
(اللى بيشوفنى بيقول ان وشى حلو ع الناس واللهى)

[بنت أصول]

خلاص أوك
على معادنا إن شاء الله
بس متذيعيش السعر عشان ده دسكاونت عشانك مخصوص لأنك أول حد استفتاح يعني .

[بنت أصول]

بصي يا دودو سما
انا ممكن اسأل جوزي ولو وافق هاخد منك إن شاء الله
بس أصلك عارفة دي حاجات محرجة شوية وممكن جوزي ما يوافقش
انا بيتي في منطقة مليانة محلات ملابس إسلامية وفيها أقسام للنساء بيبيعوا فيها لانجريهات وإسدلات ونقابات وكدة يعني
ممكن يمشي بينهم الموضوع ده
بس انا مكسووووووووووووووووفة جدا بصراحة

هفكر كويس واستشير زوجي وأقولك

[رجائي رحمة ربي]

معلش انا بنت أصول بس كتبت بإسم أختي بالغلط أصل انا عند ماما والكمبيوتر عامل رممبر مي لأسم أختي من أيام قبل الجواز

[بنت أصول]

أيوا
كنت عاوزة اسألك يا جوجو عن التباستري اللي شوفتيه في المعرض السوري
أصل باين كده هو ده الشغل اللي انا حابة اشتغله وعاوزة اتأكد منك ممكن توصفيه ليا شكله وحجمه وسعره
بصي انا هعمل المفرش بالنظام اللي كنت وريتو ليكم قبل كده في أول الموضوع وعلى فكرة ده في نظري أنسب على انتريه أميركان من شغل الزخارف الهندي العادي
وعلى فكرة ده هيكون تداخل خامات مش أورجانزا بس يعني أورجانزا على ستان على تفتاه وهو ده التباستري الهندي اللي لقيته على النت

وحجات بالطريقة دي زي اللي كنت وريتها لكم قبل كده... أتفرجو كده

وبيعملو منه كمان مفارش سرير .بصو ده

[jomana8090]

بصى يا ستى
انا مش عارفة اوصفلك اللى عايزاة شكلة اية
هو كلة عبارة عن شغل والقماش نفسة لونة يبقى بأذن االله نبيتى
هاقولك حاجة
لو كنت روحتى المعرض السورى وانتى داخلة على طول هتلاقى ناحيتين
الولد الللى بيبيعة ف الناحية اللى ع اليمين وهو اول محل شمال اول واحد خالص وهتلاقية عارض مفارش نبيتى هو دة الشغل اللى عاجبنى اوى

[بنت أصول]

طيب بصي يا ستي أنا هشتغل على ذوقي وإن شاء الله هيعجبك لأني صعب أنزل والأمورة بنتي معايا ، وأنا كده كده باعمل مفارش ، ولو معجبكيش ما تخدهوش مش مشكلة .
حتى انا عاوزة أشتغل حاجة مش متكررة .
خلاص استنيني بقى.........

[jomana8090]

أتفقنا يا ستى هاستناكى

[سلسبيل المصريه]

السلام عليكم
معلش دخلت الموضوع كده واقتحمته
بس انا عايزه بصراحه مفرش منك
انا الانتريه بتاعى موش امريكى وعايزه بنى فى دهبى فى اصفر والخامه اورجانز
والتربيزه مستطيله وتالصغيرين مربعات
ياريت تردى عليا

[بنت أصول]

طب انتي منين يا سلسبيل يا ترى من المنصورة برضو زينا ولا منين في مصر ؟

[بنت أصول]

وعاوزا المفرش امتى ؟ بعد قد إيه يعني ؟