تجمع بنات بلاد الرافدين ادخلو ( دمج الدردشة العراقية )

[ام مرمر و ليلو]

السلام عليكم
شلونكم اخواتي الغاليات اليوم خطرت في بالي فكرة
بصراحة حبيت اعرف بنات وامهات وحوامل بلاد الرافدين في هذا المنتدى
لان بصراحة مااعرف غير اللي اسمها يدل على انها من العراق الحبيب
يعني اختي الغالية مشتاقة لبغداد ومهندسة عراقية
فحبيت كل وحدة عراقية تدخل وتعرفنة بنفسهة يعني من اي منطقة وين ساكنة حاليا متزوجة او حامل او كم عدد الاولاد .........الخ
بس على شرط انه يومية ندخل وحدة تسلم على الثانية وتطمن على الحبايب ونشاركم الافراح والله يبعدنا عن الاحزان
اوكي
يلة اني راح ابدي اول وحدة

اني ام احمد العراق طبعا هذا لقب لان اني بعد ماولدت مااعرف اذا بية بنوتة حتى اسميهة مريم واذا ولد فاسميه احمد انشالله
خريجة كليه الزراعة جامعة بغداد قسم علوم الاغذية 2006
من مواليد بغداد واسكن حاليا الامارات مع زوجي
امنيتي التعرف على اخواتي العراقيات بالمنتدى
والامان لبلدي الحبيب حتى كل متغربة ترجع لاحضان اهلهة وناسهة
وان يرزق كل اخواتي الحمل والولادة السهلة والزواج للمامتزوجات
يلة بانتظار اخواتي البقية

[ام مرمر و ليلو]

شنو معقولة ماكو ولاوحدة من العراق
هههههههههه احتمال اختفيتوا يلة خلي انتضر شوية بلكت احصلي على عراقية هههههههه

[مشتاقة لبغداد]

هلووووووووووووووو ام احمد موضوعج كلش حلو وان شاء يستمر وياريت المشرفات مو يلغونة لو ينقلوا الى غير قسم لان بصراحة اني افوت فقط على قسم الحمل والولادة
اني مشتاقة لبغداد والله حبيت اسمي بهاذا الاسم شكد ما مشتاقة اشوف بغداد ترجع مثل قبل واحسن
خريجة علوم حاسبات الجامعة التكنلوجية قسم نظم معلومات
متزوجة صارلي سنة ونص والله اكرمني بالحمل الشهر الي فات لكن الله ما قسمة الية ولحمد لله على كل شي
حاليا عايشة بالاردن
امنيتي نرجع لبلدنا واصير حامل والله يحفظ الي زوجي واهلي واهلة وكل الناس الي يحبوني
احب منتدى لك الى درجة ما تتوقعون واحب كل العضوات وياريت حتى البنات الى بالمنتدى يدخلون
احب اسلم على ام احمد العراق ان شاء الله الله يرزقج باحلى احمد او باحلى مريم وشكرا جزيلا على هذا الموضوع الحلو واحب اسلم على اختي المهندسة العراقية ويارب تقوم بالسلامة وتشوف بنوتها بين احضانها واسلم على النيرفا واسلم على نور لوي ويارب يرزقها الذرية الصالحة ان شاء الله وان شاء الله كل يوم افوت اسلم على احبائبي تسلمين اختنا الغالية ام احمد العراق على هذا الموضوع

[ام مرمر و ليلو]

ياهلة والله باختي مشتاقة لبغداد وربي يحققلك كل امنياتك واحلامك وتشوفين العراق وبغداد وتشوفين طفلك بين احضانك يارب العالمين ويحفضلك زوجك واهلة واهلك واهلا بيج وبكل اخواتي بالمنتدى

[ملك المالكى]

انا مش عراقية
بس انا حبيت اسلم على حبيايبى مهندسة عراقية ربنا يقومها بالسلامة
ومشتاقه لبغداد ربنا عيوضها خير قريبا انشاءالله ويرزقها الحمل
وانتى كمان ام احمد ربنا يقومك بالسلامة
ويرجعكم لبلدكم سالمين
ويزيل عنها الاحتلال
لا تستغربى قلة عدد البنات العراقيات فى المنتدى والله ان ل ما اشوف فى النشرات اكتشاف مقبرة جماعية فى العراق بيها مش عارف كام مية او كام الف جثة
اقول الله يستر هو كدة بقى فاضل كام عراقى
ربنا يرد كيد المحتلين عليهم يارب

[مهندسة عراقية]

هلة ومية هلة بأم حمودي ويا حبيبتي احلى فكرة واني فكرت بيها من زمان لما شفت اكو تجمع للمصريات والكويتيات والمغربيات بس قلت احنا قليلات وما اعتقد راح نكدر نستمر ولكن يا رب يكون هناك عراقيات واحنا مندري بيهم غير اللي ذكرتهم مشتاقة..
أعرفكم بنفسي: أنا مهندسة عراقية مواليد بغداد-الكرخ 1977 خريجة الجامعة التكنولوجية فرع ميكانيك اسكن في الإمارات في إمارة عجمان حاليا مع زوجي ولي سنتين ونصف منذ زواجي ومنذ تغربي حيث انني بعد زواجي باسبوعين سافرت للإمارات... حامل وسأدخل الشهر الخامس قريبا وحامل ببنت والحمد لله وسأسميها لمار بعون الله وكنت انوي اذا رزقني الله بولد أن أسميه أحمد وحتى مريم كان من الخيارات ولكن خالي سبقني وسمى ابنته وأنا لا أحب تكرار الأسماء في العائلة!!! هههههههه
بعد شنو اعرفكم عليه؟؟ هاااااااا اني حملي ما كان سهل وبعد أكثر من سنتين من الزواج سوينا حقن مجهري حتى صار الحمل والحمد لله.. ولكن عندي الوحم مشكلة كبيرة ولحد الآن ما راضي يتركني بحالي وآني من نوع وحامي لا أكل ولا شرب ولا نوم حتى الماء بالحسرة واريدكم تدعولي ان يخفف الله عني...
طبعا أحيي ومن كل قلبي مشتاقة لبغداد حبيبة قلبي ولو صارلي فترة ما حاجية وياها وطبعا قلبي وياها ويا رب يرزقها بالحمل ويفرح قلبها ونفرح وياها وأتمنى ان يستمر هذا الملف وما ينغلق او يننقل الى مكان ثاني وحتى يستمر لازم نكتب بيه ونناقش مسألة الحمل لأنه في صميم هذا المكان من المنتدى..
وحبيت اشكر ملوكة حبيبتنا والله ضحكتيني ومثل ما يقولون (شر البلية ما يضحك) لما تذكري المقابر ولكن العراقيين لا ينكسرون وسيأتي اليوم الذي نعود كما كنا ولو على الأقل في زمن أولادنا والله كريم.. وشكرا لدعواتك يا ملوكة وانت صاحبة واجب من قبل...
لكل عراقية مغتربة يا رب يردنا لأهلنا ونفرح بتربية أولادنا ويه العائلة وما نبقى هيجي وحدنا نداوي نفسنا واحنا كلنا ما نعرف شي لا أم ولا أخت ولا قريب تشكيله ويساعدج.. ويا رب نكون معا ونساعد بعضنا البعض الآخر

[مشتاقة لبغداد]

هلو حبابيي كملت غدة وجيت
هلو مهندسة عراقية شلون صرتي والله مشتاقين
تسلمين ملك المالكي على المرور الحلو
ام ام احمد العرقي (شفتي رب صدفة خير من الف ميعاد والله اختي لحمد لله زينة هسة تخرجت وكاعدة تشتغل والله كريم تريدين الصراحة كلش مشتاقة اشوفها )

يارب يستمر هذا الموضوع ويكون حلقة وصل بينا

[ام مرمر و ليلو]

ياهلا ومية هلا بملك المالكي واشكرك على شعورك الجميل وربي يعطيك كل اللي تتمنيه واهلا وسهلا بمهندسة عراقية تشرفت بمعرفتج وطلعتي وياي بنفس البلد بس اني ساكنة بالعين وربي يخفف وحامك ويسهل ولادتك واهلا بمشتاقة مو كتلج عندي شعور اني اعرف اختج والحمدلله ربي يخليه ويحفظهة واذا اتصلتي بيهة سلميلي عليه

[amoonlight]

هلة بأخواتي الغاليات ام احمد ومشتاقة لبغداد ومهندسة عراقية اني اختكم امون لايت اني خريجة كلية اللغات قسم اللغة الانكليزية وساكنة حاليا بمصر اني ام سما عمرهة حبيبة قلبي 3 اشهر الله يقومكن بالسلامة ويرزق كل وحدة يارب امين امنية حياتي ارجع للعراق واشوف اهلي صارلي سنة ونص ما شايفتهم يارب كلنة نرجع لبلدنة الحبيب ونلتم من جديد ماكو احلة من لمة اهلنة

[ام مرمر و ليلو]

هلة بأخواتي الغاليات ام احمد ومشتاقة لبغداد ومهندسة عراقية اني اختكم امون لايت اني خريجة كلية اللغات قسم اللغة الانكليزية وساكنة حاليا بمصر اني ام سما عمرهة حبيبة قلبي 3 اشهر الله يقومكن بالسلامة ويرزق كل وحدة يارب امين امنية حياتي ارجع للعراق واشوف اهلي صارلي سنة ونص ما شايفتهم يارب كلنة نرجع لبلدنة الحبيب ونلتم من جديد ماكو احلة من لمة اهلنة

ياهلا والله بأم سما ربي يخليهة الج وتشرفنه بمعرفتج والله يسمع منج بيوم نرجع كلنا لبلدنا الحبيب
ويارب يحقق اماني كل وحدة ويرزقكم على كد نياتكم

[راني راني]

ياهلا بيكم والله فرحت كثير لما شفت الموضوع انا ام سيف من العراق مزوجه من 3 سنوات ونصف ولي ولد ربي يحفظوا عمروا ثلاث اشهر
ماجستير هندسة كهرباء
اسكن بالعراق- بغداد واتمنه يجي يوم يرجع لبغداد كل الاهل والاحباب
واشكر كثير الاخت ملوكه واقوللها ان شاء الله العراق يبقه عامر باهله, وصدكيني اهل العراق ميخلصون واكبر مثال على ذلك اني كل يوم اطلع من البيت الساعه سبعه وربع حتى اوصل لشغلي على الساعه ثمانيه ونص وكله بسبب الازدحام وتخيلي بعد بغداد شكد بيها ناس

اللهم احفظ بلدنا الغالي ورجعله اهله امين يارب العالمين

[ام مرمر و ليلو]

صباح الخير على احلى اخوات
صباح الخير لمشتاقة لبغداد عسى ربي يكون نهارك سعيد
وصباح الخير لمهندسة عراقية انشالله نهارك سعيد وانشالله وحامك اليوم احسن شخبار البنوتة كاعد تتحرك
صباح الخير ياام سما اشلونك انشالله نهارك سكر شخبار سماوي
صباح الخير على ملك المالكي يارب تكونين باحسن حال

[ام مرمر و ليلو]

ياهلا بيكم والله فرحت كثير لما شفت الموضوعانا ام سيف من العراقمزوجه من 3 سنوات ونصف ولي ولد ربي يحفظوا عمروا ثلاث اشهرماجستير هندسة كهرباءاسكن بالعراق- بغداد واتمنه يجي يوم يرجع لبغداد كل الاهل والاحبابواشكر كثير الاخت ملوكه واقوللها ان شاء الله العراق يبقه عامر باهله, وصدكيني اهل العراق ميخلصون واكبر مثال على ذلك اني كل يوم اطلع من البيت الساعه سبعه وربع حتى اوصل لشغلي على الساعه ثمانيه ونص وكله بسبب الازدحاماللهم احفظ بلدنا الغالي ورجعله اهله امين يارب العالمين

ياصباح النور ياهلا والله بام سيف اتشرفنة بمعرفتك وربي يحفظك من كل مكروه ويخليلك زوجك وسيوفي على فكرة اني احب اسم سيف لان ابن خالي لصغير اسمه سيف ربي يحفظلك اهلك واهلي واهل كل الحبايب

[bennuna]

يا 100 اهلا وسهلا باهل العراق اني متابعه للمنتدى بس ما اشترك يعني اقراه يوميه بس عجبني اشارك بهالموضوع اني من بغداد وساكنه بغداد حاليا وعندي ولد احمد وعمرة 5 اشهر وصارلي سنتين مزوجه واني خريجه ادارة واقتصاد قسم ادارة اعمال ويا رب يكون وجه هذا الموضوع حاو على مشتاقه لبغداد وتحمل هالشهر واللة يفرحنا بيها وشكرا الج يا ام حمودي على هالموضوع الحلو وانشالله نستمر نتشارك بيه

[رحيق الورد]

السلام عليكم ورحمة الله وبركاته
انا اختكم ام انس عراقية ومن الموصل .. ساكنة حاليا الامارات . صارلي بيها 8 سنين ..
متزوجة وانا صغيرة ولهذا صار عندي3 اولاد الله يحفظهم .. اروى 7 سنين انس 6 سنين براء ولد مو بنية 3 سنين الرابع بالطريق ..

فكرة كلش حلوة يا ام احمد بارك الله بيج والله يرزقج احمد ومريم ويرزق كل المحرومات يارب ..

سلامي الى الكل وخاصة المهندسة العراقية لان ساكنة بالامارت على فكرة انا ساكنة بدبي ..