هاذا الركن للمغربيات خصوصا ولمن تود المشاركة عموما!!..يالاه أ البنات دخلو ودردشو!!

[lolla_82]

ايوة صباح الخير

شكون صايمة فيكم؟ ياله اللي في الدار توجد لينا شي فطور باش ناخد فينا اجر حيت اللي صايمة و هي خدامة و ما كتخرج من الخدمة حتى 7 ديال العشية و ما كتوصل للدار حتى 8 و نص غادية تفطر؟ راها غادية تتعشى خخخخخ

حتى أنا أختي صايمة، غير أنا اليوم خدامة غير الصباح...يعني حدي 12 مانفوتهاش
إيوا الله يعاونك أختي مع خدمتك و الله يقبل
و مرحبا بنجية و الله يبارك فيك أ الزين

[latyfa]

Latyfa مرحبا بيك وحنا هنا راه صحابات كاملين، إلا احتاجيتي شي حاجة فأي موضوع راه حنا موجودين

rabbi ikhalik akhti lolla

[زينة المغرب]

ها واحد السلام عليكم البنات سافا عليكم؟؟؟
بغيت نسولكم الا كان ممكن وحدة فيكم تساعدني وتقولي كيفاش كتحطو صورة جنب النك تاعكم يعني كيفاش ندير شي صورة جنب سميتي زينة المغرب احم احم ولكم خالص الشكر

[halloula]

السلام عليك زييييييييييييييييييييييييييييييييييييييييينة المغرب و انا معاك في هدا السؤال
اختي لولا حتى انا وراجلي من تاني عيد و احنا كنصومو الله يتقبل للجميع
البنات واش شفتو الخبار ديال الواحدة خخخخخخخخخخخخخخخخخخ مرا مسكينة من تطوان عملت عملية ديال المرارة في تطوان و نساو لها المقص في كرشها حنا كنا كنقولوها كنكتة بينوها مسكينة مشات عند شي طبيب في طنجة و عمل لها الراديو و قال لها للا واش عندك شي سوارت في جيبك قالتلو لا يا ولدي تم زبطها و عمل لها راديو تاني و قالت بنتها تما شفنا مققققققققققققققققققققققققققققققققققققققققص مقص اوا هدي قضية مسكينا بينوها في الخبار

[nana1970]

اختي زينة المغرب سيري لوحة تحكم العضو وكليكي علي تغير صورة واختاري الي عجباتك والا ماعجباتك حتى وحدة عملي باركورير وقلبي على صورة في الجهاز ديالك
وكليكي على حفض التغير وصافي غير جربي راها ساهلة

[nana1970]

ياك انا ماشفتش او الواحد ولا يخاف يمشي لعند الطبيب غير الله يفض وخلاص شفتي اختي هالولة هاد الأخطاء الطبية كترات

[nourita]

السلام عليكم

السلام عليكم البنات كيدايرين لباس عليكم؟ اللي صايمة الله يتقبل صيام ديالها و اللي مازال مابداتش الصيام آش كتسناو؟راه دابا نهار قصار.
البنات العضوة (زينة المغرب) راها ختي جريتها معايا لهاذ الركن، غير هيا ساكنة ف مدينة آخرى بعيدة عليا بشوية، و مرة مرة كنتوحشها خخخخخخخخ

[nana1970]

او مرحبا بختك معلنا

[halloula]

nana1970 اختي علاه باش مات با الحبيب مسيكين غير بخطا طبي مشا على رجليه وانا بقيت من ورائه حمقا شحال وانا مريضة حيت انا اللي ديتو للطبيب بقيت شحال و انا كنقول انا سبابو غير سكتي يا اختي حرقتو بقيا فيا ولاد الحرام كيشوفو غير الفلوس عندهم الناس كيف والو ...............ايوا خليها على الله دابا ما كتحلى ليا حتى حاجة جاب الله انتوما كنفوج معاكم
نوريتا مرحبا باختك معانا

[زينة المغرب]

مساء الخير عليكم يا بنااااااااات شكرا بزاف على الترحيب الحار بلا حرور فيا
مشكورة يا نانا عالمساعدة مممممواه انشاء الله تكون عجباتكم الصورة تاع علمنا المغربي،، وديما ديما المغرب هههههههههههه، وانتي يانوريتا كتوحشيني غير بعض المرات بنتي على حقيقتك الخايبا شهدو عليها يالبنات،ختها يا حسرة هههههههههههه لا غير كنضحك معاك مممممممممممواه يلاه االبنات نشطو الركن شويا ماتبقاوش ناعسين

[بنت عشرين]

السلام عليكم يا مغربيات

بعد ما تفطروا أعزموني على فنجال شاي وكيك

سلام

[lolla_82]

السلام عليكم

كيدايرات أ البنات؟؟
ماكاين مشكل أختي Latyfa، هانتي كاتشوفي البنات كلهم ناشطات و منسجمات..
مرحبا ب"زينة المغرب" أخت Nourita معانا..
أختي Halloula مايبقاش فيك الحال، راه المكتاب ما منو هروب..و الوالد ديالك مسكين انتهى أجلو و احنا شادين نوبتنا..الله يجعلنا من أصحاب الجنة..قولوا آمين
والأخطاء الطبية فين ما مشيتي كاينة حتى فالدول المتقدمة..شفت واحد النهار واحد البرنامج وثائقي على الأخطاء فالولايات المتحدة الأمريكية!! كايخلع..

أختي "بنت العشرين" طبعا إنت معزومة بعض الفطور، حنحضر لك إلينتي عايزاه..أشنو رأيكم أ البنات هههههههه

[زينة المغرب]

هاااي دبدوباات، الله يرحم موتانا يارب هم السابقون ونحن اللاحقون
ازيكم كلكم يا بنات قلبتها مصري شنو رايكم يا بنات كل وحدة تقول هي من اي مدينة وكيف الجو عندها، نبدا انا احم احم انا يابنوتات من اكادير الجو اليوم عندنا ماهو هكا ولا هكا مابانتش فيه الشمس مانخبيش عليكم راني صايمة ودارلي هاد الجو النعاس يلاه في ديكم تفيقوني دبا

[lolla_82]

أختي زينة المغرب واخا هاد القضية ديال المدن لي قلت عليها درناها شحال من مرة..ولكن ما كاين باس بما انك جديدة معانا غانفيقوك من النعاس..
أنا من بني ملال، واليوم سخون الحال شوية..حتى برد واحد الوقت وطاحت الشتاء فهاد الأيام الأخيرة ورجع تاني الصهد..

[halloula]

شكرا لولا و زينة على المواسات
زينة المغرب راه درناها شحال من مرة و لكن كيف قالت لولا مشي مشكل نعاودوها انا من مدينة فاس لكن ماشي فاسية انا اصلي من مراكش و لكن خلقنا في الدار البيضاء خوتي و عائلتي و دارنا كلهم في الدار البيضاء و انا تزوجت في فاس الجو هنا غير سكتي الصيف ما بغا يتقاضا واحد الشمس كتهرس الراس