عبيرك .. ولا نخيلك
ولا ساعة مغربية على ضفاف نيلك
ولا نجوم مضوية حوالين قمر ليلك
قوليلى سرك إيه
قولى يا صبية
حلف الزمن عليها ما يخطى
عاشت العمر أبية
وجبينها العالى عمره ما يوطى
لغيـــر الله
الله عليــك الله
يا حورية خارجة من كتاب حواديت
تزرع زهور الفرح فى كل قلب وبيت
وكفاية إنى منك وفى حضنك اتربيت
ومشيت على ترابك ومن نيلك ارتويت
وعنك يا ما لصحابى حكيت وحكيت
كنت أضحك مرة
ومرة تانية بكيت
قالولى يا مجنون أنا قلت دى بلادى
حبها جوايا موشوم بالدم فى فؤادى
لا تقولى قيس ولا ليلى
ولا روميو ولا جولييت
شايفها بعينى جنة وإن شوفتوها نار
مالها هى بحالنا بتعبها وتعبنا
بلاش تحملوها كل الأوزار
دى بلدنا يا أخونا
عزنا وأمانا
فى عيونها بتشيلنا
وقلبها لينا دار
شوفوا كام طماع جالها
مفتون بشبابها
يدق على بابها
ويقول دى من حقى
صبرتى سنين وسنين
يرحلوا الطامعين
وييجوا ناس تانين
ولسه بتقاوحى
تقولى لأ ارحل
ما تخطى على أرضى
ده أنا كلى لأولادى
دول أغلى ما عندى
ابعد وما تفكر فى يوم تتحدانى
لا صبرك قد صبرى
ولا عندك زى عندى
ويوم ما يواجهك جندى
هتهرب والتاريخ يشهد
على خزيك يا جانى
الله يا أمى على صبرك
فى وقت الجد تحمينا
تضمينا على صدرك
تطمنينا
أن الظلم مش هيطول
ولو محدش قال أنا لازم أقول
مش هاقول انتِ حبيبتى وأنتِ وأنتِ
أنتِ أكبر م الكلام
م الملام
لا عمرنا هنسب اسمك الطاهر
ولا نفكر فى يوم نسيبك ونهاجر
وهو حد يبعد عنك يبقى عاقل
يشرب المر فى غربة مالها آخر
فى بلاد غريبة مش شبهك
ولا ناسها زى ناسك طيبين
إن قال فى يوم آه
محدش يقوله أنت فين
وإن مد يوم إيديه
ما هيلاقى غير ايدين باردين
لا هتساعد ولا تساند
ولا تشده من الضلمة لقلب النور
انت رضيت تعيش غريب
وحيد حزين بجدر مبتور
ليه يا ابن بلاد الكرامة تعيش مكسور
ليه تستخبى قرب هنا
شوف مجدنا
تشهد عليه كل العصور
شوف أجدادك لما نشروا العلم والحضارة
وكانوا للدنيا المنارة
وقت ما غيرهم عاش فى كهوف
تعالى شوف
شوف فى السما لما النسور
قامت تدك العدا
والقلوب كانت فدا
وبالأيدين السمر هدموا السور
اللى قالوا ما ينهدم
وزرعوا فى القلوب الخوف
تعالى شوف
كله فى الكتاب مسطور
ده جدى وجدك .. دمهم هو دمك
عملوا اللى عليهم
ومش ذنبهم أن عليك الدور
لازم تسيب ذكرى لولاد ولادك
إن شا الله فكرة ولا حلم لبكرة
ولا طاقة أمل تهدى لقلوبهم نور
ارجع يا ابن بلدى لحضن أمك
هى وحدها اللى شايلة همك
وهى اللى فى صحتها ومرضها بتضمك
تنكر انك بتحبها غصب عنك
بتقولها ليه فى سرك
ما هى عارفة أنها حبيبتك
ومهما كنت بتدارى ولا مش دارى
هى حتة منك
وقبل ما انسى يا حبيبتى
من كتر ما بقولك حبيبتى
هو كان اسمك إيه
اسمك يا بلادى فى شهادة ميلادى
وعيون ولادى وتاريخ أجدادى
فى كل عصر
حبيبتى أنا اسمها مصر
بقلمى
تعليق