رباعيات صلاح جاهين --الجزء الثانى--

[أكرم شهاب]

43

انا الذي عمري اشتياق في اشتيــاق

و قطر داخل في محطة الــــفراق

قصدت نبع السم وشربت ســـم

من كتر شوقي وعشمي في التريــاق

عجبي !!!

44

انا الذي عشت الزمن مضيعــه

بروح حزينة معفنة مضعضعــه

زرعتشجرة سنط لجل انجــرح

لقتها شعر البنت و مفرعـــه

عجبي !!

45

لو فيه سلام في الأرض وطمان و أمن

لو كان مفيش و لا فقر و لا خوف جبن

لو يملك الانسان مصير كل شــــئ

انا كنت اجيب للدنيا ميت ألف ابــن

عجبي !!

46

العشب طاطا للنسايم و نـــــخ

أخضر طري مالهش في الحســن أخ

عصفور عبيط انا .. غاوي بهجه و غنا

ح انزلهنا.. و انشا لله يهبرني فــخ

عجبي !!!

47

أوصيك يابني بالقمر و الزهـــور

أوصيك بليل القاهرة المسحـــور

و إن جيت في بالك .. إشتري عقد فل

لأي سمرا.. وقبري إوعك تـــزور

عجبي !!!!

48

غمض عينيك و ارقص بخفة و دلع

الدنيا هي الشابة و انت الــجدع

تشوف رشاقة خطوتك تعبــدك

لكن انت لو بصيت لرجليك ..تـقع

عجبي !!!

49

حاسب من الاحزان و حاسب لها

حاسب علي رقابيك من حبلـها

راح تنتهي و لابد راح تنتهــي

مش انتهت أحزان من قبلهــا؟

عجبي !!!

50

يأسك و صبرك بين إيديك و انت حر

تيأس ما تيأس الحياه راح تــــمر

أنا دقت مندا ومندا عجبي لقيــت

الصبر مر و برضك اليـأس مــر

عجبي !!

51

ولدي نصحتك لما صوتي اتنبـح

ما تخفش من جني و لا من شبـح

و ان هب فيك عفريت قتيل إسألـه

ما دافعش ليه عن نفسه يوم ما اندبح

عجبي !!

52

ولدي إليك بدل البالون ميت بالـون

انفخ وطرقع فيه علي كل لـــون

عساك تشوف بعينك مصيرالرجـال

المنفوخين في السترة و البنطلــون

عجبي !!!

53

خوض معركتها زي جدك ما خـاض

صالب و قالب شفتك بامتـــعاض

هي كده...ما تنولش منها الأمـــل

غير بعض صد ورد ووجاع مخاض

عجبي !!!!

54

كام اشتغلت يا نيل في نحت الصخور

مليون بئونه و الف مليون هاـــتور

يا نيل أنا ابن حلال و من خلفتـك

و ليه صعيبه علي بس الأمـــور

عجبي !!!



55

منين أجيبها كلمه متألمــــة

لعيبه فايره حايره و مصممـــه

منين اجيبها كلمه تكون بنت ارض

تشفي اللي ما شافهوش كلام السـا

عجبي !!!

56

أنا قلت كلمة و كان لها معنييـن

كما بطن واحده و توأمين زي وشين

لو دنيا شر.. التوأم الخير يمـــوت

لو دنيا خير. الشر ح يعيش مــنين

عجبي !!



57


أنا اللي بالأمر المحال اغتــوي

شفت القمر نطيت لفوق في الهـوا

طلته ما طلتوش إيه انا يهمنــي

و ليه .. ما دام بالنشوة قلبي ارتوي

عجبي !!

58

بره القزاز كان غيم و أمطار و برق

ما يهمنيش أنا قلت و لا عندي فرق

غيرت رأيي بعد ساعة زمـــان

و كنت في الشارع .. و في الجزمة خرق

عجبي !!!



59

عيني رأت مولود علي كتف أمـه

يصرخ تهنن فيه يصرخ تضــمه

يصرخ تقول يا بني ما تنطق كـلام

ده اللي ما يتكلمش يكتر همــه

عجبي !!!!

60

يا عندليب ما تخافش من غنوتك

قول شكوتك و احكي علي بلوتك

الغنوه مش ح تموتك إنمـــا

كتم الغنا هو اللي ح يموتــك

عجبي !!!

61

ياللي بتبحث عن إله تعــبده

بحث الغريق عن أي شئ ينجـده

الله جميل و عليم و رحمن رحـيم

أجمل صفاته .. وانت راح توجده

عجبي !!!

62

حقرا و فوق كوكب حقير محتقـر

في الكون تكون دنياكو إيه يا بـقر

رملايه من صحرا ؟ لكين إيش تقول

و الكون بحاله جوه عقل البشــر

عجبي !!

63

لا تجبر الانسان و لا تخــيره

يكفيه ما فيه من عقل بيحيره

اللي النهارده بيطلبه و يشتهـيه

هو اللي بكره ح يشتهي يغيـره

عجبي !!


64

ياللي في حماه الشمس تلقي الملاذ

و ألف بكره و بكره. في ضلوعه لاذ

مين أنت ؟ مارد ؟ رب ؟ قال لأ ده بس

انا اللي باروي القمح و اسقي الفــولاذ

عجبي !!!

65

غسل المسيح قدمك يا حافي القـدم

طوبي لمن كانوا عشانك خـــدم

صنعت لك نعليك أنا يا أخـــي

مستني إيه .. ما تقوم تدوس العدم

عجبي !!!!

66

البط شال عدي الجبال و البحـور

ياما نفسي اهج .. احج ويا الطـيور

أوصيك يا ربي لما اموت .. و النبي

ما تودنيش الجنه . . للجنه سـور

عجبي !!!

67

ياللي بتبحث عن إله تعـبده

بحث الغريق عن أي شئ ينجـده

الله جميل و عليم و رحمن رـيم

أجمل صفاته .. وانت راح توجده

عجبي !!!

68

حقرا و فوق كوكب حقير محتقـر

في الكون تكون دنياكو إيه يا بـقر

رملايه من صحرا ؟ لكين إيش تقول

و الكون بحاله جوه عقل البشـر

عجبي !!



69

عجبي علي العجب العجيب العجاب

لما الحقيقة تطل بعد احتجاب

و تروح و تحلا وفجأة تصبح مفيش

كمثل طراطيش بحر ياما خد و جاب

عجبي !!!


70

في الهو ماشي يا بهلوان إش إِش

يا فراشة منقوشة علي كل وش

شقلبت عقلي و عقلي شقلبني

و كنت باحسبني بقيت ما اندهش

عجبي !!

71

وقفت ساعة الصبح باغسل سناني

قالت لي شايف قوتي و لمعاني ؟

إيش تطلب اليوم مني ضحكة أسد ؟

والا ابتسامة اعلانات أمريكاني ؟

عجبي !!

72

الحلو يم اليم صابــح رايح

سارح في حضن الميه سابح سايح

الحلو داب في البحر , قلت أدوقه

وجدت لسه البحر برضك ماـلح

عجبي !!!



73

يا كل كلمة للعجب في قامـوس

انسكلوبيديا لسان العرب أو لا لاروس

تعالوا نجدة . ده لسه في عصــرنا

الشمس و البحر العريض بالفـلوس

عجبي !!!!

74



الموج تلول تهبط وتطلع تلـول

يا بحر خدني الشط صاحبك ملـول

و الا بلاش الشط ح اعمل به أيــه

ده ريحته طحلب مهري و ام الخلـول

عجبي !!!

75

ما آنتاش بتلعب ليه يا روح بابـا ؟

و لا عسكري و لا لص في عصابة ؟

إلعب أسد أو ديب رهيب أو غـزال

دي الدنيا في نهاية المطاف غابــة

عجبي !!!

76

ورد في ورق سلوفان يا حلوة اهديلك ؟

و الا انقله بالطين في الشتلة و اجيلك

الأولاني لو وحا بحنــانـي

عجبي علي التاني بإيــه يوحيلـك

عجبي !!

77

أنا قلبي كوكب و انطلق في المدار

حواليكي يا محبوبتي يا نور ونـار

يلف مهمـا يلف ما بيكتفـفيش

وتمللي نصه ليل و نصه نهــار

عجبي !!



78

الأرض شوك أيوه لكين هايش

و الحمرة مش يعني الطريق حايش

دي دمنا السيال .. وبشرة خيــر

ان انتي عايشة و ان كنت أنا عايش

عجبي !!!

79

إيه اللي خدته من مرور السنــين

يا قلبي الا دمعتك و النيــــين

بتئن و ترجع و بتفرح و ترجع تحــن

مع إن مش كل البشـــر فرحانين

عجبي !!!!



80

اوقات أفوق و يحل عني غبــايا

واشعر كأني فهمت كل الخبايـا

و افتح شفايفي علـان اقول الدرر

ما أقولش غير حبة غزل في الصبايـا

عجبي !!!

81

عيني رأت مخلوق في غاية البشاعة

أنا قلت له لما تأملته ساعـــة

اللذه و الموت علموك اللــزج

و انا علموني الفلسفة و الشجاعـة

عجبي!!

82

غطس وقب الموج نهود بمبي

من ألف جيل جمالات ما تعلم بي

يا قلبي عيب دول امهاتنا القدام

أستغفر الله العظيم ربـــي

عجبي !!

83

علقت في المسمار قناع مهزلة

ومعاه قناع مأساة بحزنه ابتـلا

بصيت لقيتهم يشبهوا بعضهـم

واهو ده العجب يا ولاد و الا فلا

عجبي !!

84

ظهر المسيح الحي علي سفح ربـوة

و نزل بهالة الضي و قعد في قهـوة

بصوا.. تعالوا.. قالوا خليه في حالـه

الناس في حالهم يا بني. مالهمش دعوة

عجبي !!!


85


لولا اختلاف الرأي يا محـترم

لولا الزلطتين ما لوقود انضرم

و لولا فرعين ليف سوا مخاليف

كان بيننا حبل الود كيف اتبرم ؟

عجبي !!!!


86


يا وردة قلبي معاكي في الريح لعب

لا تعبتي م الريح و لا قلبي تعـب

احنا كده : نرتاح في صخب الجنون

و في السكون بنخاف قوي و نترعب

عجبي !!!


87


مركب ورق من نفخة تتطـوح

ركبتها و الكل بيـلوح

سوحت فيها اتنين و خمسين سنـه

للآن . و لا بتغرق و لا تـروح

عجبي!!



88


عالجسر فت الصبح تحت الضباب

بين اللي لسه بينغرس و اللي طاب

ما اهتز قلبي لنبت طالع جديـد

قد اللي ماشي.. وتحت باطه كتاب

عجبي !!

89

يا خالق الكون بالحساب و الجبر

و خالقني ماشي بلختيار و الجبر

كل اللي حيلتي زمزمية أمـل

وازاي تكفيني لباب القــبر؟

عجبي !!

90

قاعدة قناني الخمر ساكتة و ساهية

مع ابن آدم في الشبه متناهيـــة

مفيش كده روقان في لحظة تشوفهم

و بعدها بلحظه يودوا في داهيــه

عجبي !!!

100

حتة محارة وجدتها في يوم لقيـة

قالت لي شوف كيف الطبيعة شقية

نظرت للكهف اللي فيها و لقيت

إن الطبيعة كمان لا أخلاقيــة

عجبي !!!!

101

بلياتشو قال إيه بس فايدة فنونـي ؟

و تلات وقق مساحيق بيلونونـي

و الطبل و المزامير و كتر الجعـير

إذا كان جنون زبوني زاد عن جنوني

عجبي !!!

102

نقطة مرارة كمان علي مشروبــي

دوبها يا ساقي حسب مطلوبـــي

طعب الحياة .. مش برضه فيها و فيها ؟

ليالي وردي و نهارات خروبـــي ؟

عجبي!!

103

وسط الحطام اتفرجوا يا أنــام

تمثال ملك . و مبوله م الرخـام

لتنين نحتهم نفس أسطي الحجـر

و كانوا ذات يوم كتلتين لسه خام

عجبي !

104

عيد و العيال اتنططوا ع القبـور

لعبوا استغمايه .. و لعبوا بابـور

و باللونات و نايلونات شفتشـي

و الحزن ح يروح فين جنب السرور

عجبي !!

105

أنا قلبي كورة و الفراودة أكـم

ياما اتنطح و انشاط و ياما اتعكم

و اقول له كله ح ينتهي في المعاد

يقول بساعتك ؟ و الا بساعة الحكم ؟

عجبي !!!

106

الضحك قال يا سمع التكشيـر

امشير و طوبه وانا ربيعي بشيـر

مطرح ما باظهر بانتصر ع العدم

انشالله أكون رسماية بالطباشيـر

عجبي !!!!

107

أهوي الهوي و همس الهوي في العيون

وبسمة المغرم ودمعه الحنــــون

و زلزلات الحب نهد الصبــــا

أكون انا المحبوب أو لا أكـــون

عجبي !!!

108

يا ملونين البيض في شم النسيـم

لون الحنين و الشوق و خمر النديم

ما تعرفوش سايق عليكو النبـي

تلونوا الأيام بلون النعيــم ؟

عجبي!!

109

الدنيا صندوق دنيا. دور بعـد دور

الدكة هي .. و هي كل الديكـور

يمشي اللي شاف ويسيب لغيره مكان

كان عربجي أو كان امبراطــور

عجبي !

110

قطي العزيز راقد علي الكنبـات

في نوم لذيذ .. و بيلحس الشنبات

و انا كل عين فنجان مدلدق قلـق

صدق اللي قال إن الحياة منابات

عجبي !!


111

قالوا السياسة مهلكة بشكل عـام

و بحورها يا بني خشنة مش ريش نعام

غوص فيها تلقي الغرقانين كلهــم

شايلين غنايم .. و الخفيف اللي عـام

عجبي !!!

112

سلام سلام سلام سلام ... سلام

كلام كلام كلام كلام كلام

هز الورق يا صاحبي كدهــوه

يطلع كلام سلام .. و سلام كلام

عجبي !!!!

113

فوق تحت . ورا قدام . يمين شمـال

في الجو . تحت الميه . أو في الرمال

طلب الكمال يحرم علي الممـكن

و الممكنات دول محرومين م الكمال

عجبي !!!

114


هات يا زمان و هات كمان يا زمان

غير بسمة الشجعان مامني يــبان

هو اللي داق الفرحة يوم ثورتــه

يقدر يعود و لا ثانية للأحــزان ؟

عجبي!!

115

عبثا باقول واقرا في سورة عبس

ماتلومش حد إن ابتسم أو عبس

فيه ناس تقول الهزل يطلع جـد

و ناس تقول الجد يطلع عبـث

عجبي !


116

يومي علي الله تنتهي و تغـيب

الشمس و تعود تاني يوم لهاليب

زي الحياة مأساه و من كترهـا

بقي لا انتهاءها و ابتداءها عجيب

عجبي !!

117

علم اللوع اضخم كتـاب في الأرض

بس اللي يغلط فيه يجيـبــه الأرض

أما الصراحة فأمرها ســـاهل

لكن لا تجلب المال و لا تصون العرض

عجبي !!!

118

أنا كان لي أب . و كان رئيس محكـمه

ستين سنة .. في قضية واحدة أترمي

ستين سنة و طلع براءة و خـرج

يشكي الحياة و الموت لرب السـا

عجبي !!!!

119

قالوا ابن آدم روح و بدنه كفـن

قالوا لأ بدن . قالوا لأ ده روح في بدن

رفرف فؤادي مع الرايات في الهــوا

أنا قلت لأ روح في بدن في وطـن

عجبي !!!