ღ `·ܔ¸.· من أعماق الذكريات .. مواقف وحكايات `·.¸ܔ¸· ღ

[shrwet]

حبيبتى زهره انا فعلا سعيده باسمه الجديد
لكن لى اعتراف أحلى شوشو كنت داءما أسمعها من أبى كنت أحس فيها بالحب الله يعطيه أصلحه
ولانى فى محافظه غير فلم اعد أسمعها كثيرا
بصراحه فى جو ود جميل كلنا محتاجين له ربنا يديمها علينا نعمه

غاليتى أم أروى استمتعت معك
وها هى الحياه تجمعنا وتفرقنا
واللقا نصيب والفراق نصيب
لكن هناك أيضاً حقيقه أخرى ان أصدقاء الطفولة والجامعة هم أقوى الأصدقاء ومهما فرقتان الأيام يجمعنا اللقاء المغمور بالحب كأننا تركنا بعضنا امس ونتكلم دون تكلف
اللهم جمع قلوبنا على الحب والود وابعد عنا الضغينة

[ام اروى 86]

الله يكرمك يا زهر الريحان ويبارك فيكى يارب

كلماتك ريحتنى وهدأت من روعى

الذى يبكينى يا غالية ان للاسف لا اعرف منهم الان سوى 3 او اربع بالكتير

والباقى فقدت كل وسيلة اتصال بهم

ربنا يجمعنا بهم فى الجنة ان شاء الله

ومش هزعلك وهاحكيلكم عن ذكريات جميلة

بفضل الله كنت متفوقة من صغرى والكل يعرفنى كما يقولون يشار الى بالبنان هههه

والحمدلله كنت جريئة ولا اخاف احدا طالما انا على حق

الموقف الاول كنت فى امتحان الرياضيات سنة 5 ابتدائى كنا بنسميه ايامها الحساب

وكان السؤال ارسم دائرة قطرها 14 سم

رحت فتحت البرجل على 7 سم نصف قطر الدائرة ورسمتها .. تمام

اتى الموجه_ وكان يعرفنى _وقالى انتى جاوبتى السؤال ده غلط

قلتله لا صح هو ادانى طول القطر فرسمت الدايرة بنصف القطر

راح كشر كده وقالى انا بقولك غلط تقوليلى صح قلته اه انا متاكدة ان اجابتى صح ومش هغيرها
راح ابتسم ومشى هههه

الموقف التانى :كنت فى مسابقة للقران الكريم فى المسجد فى ابتدائى برده

وكان يوم توزيع الجوائز

تروحى تسلمى على الشيخ وتاخدى جائزتك وناس كتييييير فى المسجد

انا روحت استلم الجائزة والشيخ مد ايده يسلم عليا ويعطينى الجائزة كانت ساعة حائط لونها برتقالى

الشيخ ده كان دكتور فى الازهر وصديق والدى راجل كبير فى السن

قلتله آسفة مش بسلم على الرجال بالايد

الشيخ اندهش كده ومبقاش عارف يقول ايه

وبعدين قالى ماشى لما اشوف ابوكى انا مش عايز اسلم عليكى ولا على ابوكى بهزار طبعا هههههه

هيييييييييه كانت ايام جميلة

الحمدلله ظللت على تفوقى حتى دخلت احدى كليات القمة

ولكن ..ولكن تزوجت وانا بدرس فى الجامعة والحمدلله كنت بنجح بتقدير كمان بس مش ده هدفى.. فين التميز

لما بفتكر دلوقتى ايام تعبى وسهرى للمذاكرة وسهر امى معى واشوف شهادات التقدير بتاعتى

بشتاق جدا للدراسة والمنافسة تانى والفرحة بالنجاح والتفوق

الى اتعلمته واستفدته من الذكريات دى انى قررت ادرس واتعلم تانى وانجح واتميز تانى

بس اخترت حاجة تانية كان ادامى هنا فى الغربة اختيارين اما ادرس ماستر او اعمل معادلة واشتغل

بس الحمدلله ربنا يسر لى طريق تانى افضل من الاختيارين

بدرس قرآن وتجويد مع اخوات هنا نحسبهم على خير

اسال الله ان يتم علي وعلى اخواتى جميعا نعمة حفظ كتابه مجودا ويثبته فى صدورنا ويرزقنا العمل به اللهم امين

عايزة ذكريات تانى يا زهورة هههه انتى تؤمرى بس

[ام اروى 86]

حبيبتى شرويت(نفسى اعرف معنى اسمك)ربنا يبارك فيكى يا غالية

فعلا والله صدقتى صداقة المدرسة والجامعة تحسى انها صافية نقية فيها اخلاص وحب

طبعا للقلوب التى اجتمعت على حب الله فقط

لان منتشر جدا فى الجامعة صداقة المصلحة والمنفعة ربنا يعافينا

انتى عارفة بعد ما اتعرفت على اخوات كتير هنا شايلة هم الفراق والله

هنا لما حد يجى يمشى ويرجع لبلده بنعمل له حفلة وداع ما اقولكيش بابكى فيها ازاى

الله المستعان

[shrwet]

أم أروى ربنا يسهل لك أمرك
من خلال كلامك اعتقد انك صيدلانية
ووجهه نرى ان عمل معادله مفيد لك ويزيد معلوماتك العلميه وهذا مكسب
اما موضوع علم الدعاه فاصبح موضه طبعا التبحر فى علم الفقه والدين شىء جميل وربنا ينفع بك
ولكنى من خلال حوار آتنا مع بعض من خلال الموضوعات المختلفة فانت على خلق ودين وسهل عليك التبحر فى العلم وحضور الدروس فتكملتك فى دراستك ودخول المعامل والتعليم على حق فرصه غير موجوده كتير
وعلى فكره أإنا اخى مصمم كمبيوتر وحاليا فى معهد الدعاه ودراسته اربع سنوات فى إحدى الدول العربية

اما بالنسبه للاسم ومعناه فهو اسم زهره وفى أمريكا هو اسم يهودي هههههه زى جوزيف إلى هو يوسف عندنا

وتبقى الذكريات أينما كنا

[ام اروى 86]

شرويت عرفتى منين ههههه ليه ما قلتيش طبيبة مثلا او مهندسة
اكمل معاكى على الخاص

[زهر الريحان]

الله يكرمكم ،،، احلى شوشو وأم أروى
،،،
بعد الخاص تعالو هنا احكوا لنا عن ذكريات أخرى ،،،

[زهر الريحان]

احم من اجمل الذكريات المجنونة التي جاءت ببالي الآن ،،

انا وصديقتي ،، الله يحفظها اشتقت لهاااااا

اشترينا زلابية ، اعتقد تعرفونها،، حلو عندنا يميممممم
ومن كثر ما كنّا حابين ناكله ،، ذهبنا الى مكان معزول
قبل وصولنا الى البيت ،، كان باقي لنا اكثر من ٢٥ دقيقة على الوصول ،،
وجلسنا بالأرض ههههه واكلناها هههه
كانت لذيييذة وكنا ميتين بالضحك،،

مباشرة بعدها صرنا نقول ماذا فعلنا هههههههه
كانت ذكرى جمييييلة وللآن لما اذكرها اضحك من قلبي
،، وسبحاااان الله كيف تمر الايام،،
والله اذكرها كأنها حدثت امس فقط
بينما هي من أكثر 13 سنة ،،
يااااه نسيت أنني كبرت ،، احلفي خخخخ

[ام اروى 86]

ينفع ذكريات مؤلمة
ينفع ان شاء الله طالما اخذت منها فائدة وعبرة

اول مرة اسافر فيها كنت مسافرة لزوجى انا والاولاد
كل ما افتكرت الرحلة دى احس بتعب الدنيا كله فى الحال
كانت الرحلة من القاهرة الى فرانكفورت ترانزيت ساعتين ونصف ومنها الى تورنتو كندا
يعنى الرحلة كده لوحدها بدون اى عقبات حكاية لوحدها 4 ساعات طيران ثم ترانزيت ساعتين ثم 8 ساعات طيرا ن وبعدين ساعة ونصف للمدينه التى نسكن بها

المهم ذهبنا من محافظتنا لمطار القاهرة وده فى حد ذاته سفر كانت الساعة 7 صباحا والمفروض طيارتى تقلع 9 ونصف ص

اول عقبة :فى اضراب فى المطار ومفيش طيارات بتطلع من الامس ومفيش دخول اصلا ولا استلام حقائب

تخيلوا معى الصدمة

بالصراحة قعدت اعيط وكان معايا بابا وماما واخى وخلاص مش هسافر لزوجى

المهم بعد ساعتين سمحوا بالدخول واستلام الشنط وختم الجوازات وطبعا ما ينفعش بابا او اى حد يدخل معايا

والدنيا زحمة موت ومتلخبطة بين العيال والشنط نسيت اقولكم كان ابنى عنده 6 شهور وحطاه فى الحزام الى على البطن ده
وابنتى الصغيرة فى عربية الاطفال والكبيرة ما سكة فى هدومى



عمرى ما هنسى نظرة الخوف والقلق علينا من ماما وبابا بين دموعهم ودموعى والحضن الاخير

المهم الطيارة المفروض زى ما قلت تطلع 9 ونصف ص طلعت والحمدلله 10 مساءا

تخيلوا اكتر من 12 ساعة محجوزين داخل المطار

المهم وصلت لالمانيا الساعة 2 ص وطبعا اتلغت كده رحلتنا

اضطرينا نبات ليلتنا فى المطار على الشزلونج لاننا مش معانا تاشيرة المانية او اى تاشيرة اخرى محترمة ندخل بها فندق

الساعة 8 صباحا وجدنا رحلة ولكن ليس لتورنتو بل لمونتريال ومن مونتريال هناخد طيارة كمان لتورنتو
مفيش ادامنا حل غير كده

وصلنا مونتريال بتوقيت كندا الساعة 2 ظهرا بعد 9 ساعات طيران

وخلصنا اوراق الدخول والشنط طبعا ما وصلتش اتخلفت فى المانيا وعربية ابنتى ما اخذتهاش اصلا فى المانيا

فى اثناء تحركاتنا فى مطار مونتريال ما لقيت الاسانسير ولا السلم العادى فقط السلم الكهربائى وانا اصلا بخاف منه موت

ومعاى ابنى مربوط على بطنى وابنتى سنتين فى ايدى والتانية فى هدومى وشنطتين على الدراع ده وشنطتين على الدراع ده

المهم اضطريت اطلع وطلعت بنتى الكبيرة عادى الحمدلله انا لسه بحط رجلى انا وابنتى الصعيرة هووووووب

كانت حطة وقعة ما يعلم بيها الا ربنا البنت اتجرحت فى خدها لانها وقعت على وشها على السلالم

وانا لثوانى بعد الوقعة اغمى عليا وماعرفش والله مين الى شالنى وبنتى الى طلعت كانت هتنزل لما شافتنا وقعنا لولا احد المارة لحقها ونزلها

المهم بعد الاسعافات الاولية رحنا للطيارة وطلعت الحمدلله الساعة 4 ونصف لتصل لتورنتو الساعة 6 مساءا

يعنى كان المفروض اوصل لتورنتو يوم الخميس 7 مساءا وصلت الجمعة 7 مساءا الحمدلله

وطبعا مفيش داعى اقولكم على منظرنا كان عامل ازاى ههههه
زوجى اتخض اصلا لما شافنا هههه

الى اتعلمته من الى حصل ده وشعرت بيه جدا ان ربنا لطيف ورحيم بعباده

الحمدلله ربنا يسر لى اخت كانت معايا من اول مطار القاهرة وحتى مونتريال

تولت عنى الحوارات مع الموظفين فى المطارات وتكملة البيانات والاوراق داخل الطيارة وساعدتنى كتير ربنا يبارك فيها يارب

بس انا كنت اول مرة ادخل كندا اما هى ف بقالها 11 سنة فيها
لما وصلنا مونتريال اختلفت الطرق انا لازم ادخل immigration officeاما هى لا هتاخد شنطها بس وتستنى الطيارة التانية

توهنا عن بعض واحسست بالضياع خصوصا ان مونتريال معظمهم بيكلموا فرنساوى وانا ثقافتى المانى هههه قصدى انجليزى

كنت بكلم بنتى وانا بعيط فواحد من الموظفين سمعنى وقالى انتى بتكلمى عربى قلت اه

راح بعتلى شرطية بتكلم عربى هى من اصل لبنانى وساعدتنى كتير فى انهاء اوراق الدخول ربنا يبارك فيها يارب

حاجة كمان كنت عايزة اكلم زوجى ومش عارفة اعمل ايه اشترى كارت ولا افك فلوس واكلم من الماكينة وبتستخدم الماكنة دى ازاى اصلا

المهم لقيت واحد من الموظفين عرض عليا المساعدة وكان بيتحدث عربى وانهى لى موضوع الاتصال ده

شوفتوا ربنا رحيم بعباده ازاى الحمد لله

حد مر برحلة عسل زى دى 48 ساعة سفر

احسن حاجة انى ادلعت دلع بعد وصولى لمدة اربع ايام ما بعمل اكل ..الاخوات هنا ماشاء الله شالونى على كفوف الراحة
خصوصا بعد ما عرفوا بتفاصيل الرحلة السعيدة

[shrwet]

أم أروى ضحكتينى وطبعا هذه رحله لن تنسيها فى حياتك
والله فعلا بتوقف ولاد الحلال
اللهم اجعلنا سند وعون لبعض

زهره ضحكتينى والله
انا بحب الزلابية جداً
وتخيلت منظرك وانت وصحبتك قعدين على الأرض
الله يسعدك

[زهر الريحان]

ام أروى ااااااااه من هذا السفر اتخيلك واتخيل شكلك
اذا انا طائرتنا عملت تأخير ساعتين فقط وجرينا جري في المطار ،،،،
والرحلة ٩ ساعات ،،، وبعدها ٣ ساعات بالسيارة تعبببببت جداً

فأتخيلك انت وأولادك المساكين ،،،
الحمد لله على سلامتكم هههه
،،،،،

احلى شوشو ،،،، الله يحفظك



لي عودة ان شاء الله بذكريات جميلة

[shrwet]

سوف اسرد لكم اليوم ذكريات كلها شقاوه
وانا فى الفرقة الثالثة فى الجامعه ذهبت إلى معسكر لمده أسبوع كان عددنا 36 بنت
كان فى مصيف بالطيم بمحافظه كفر الشيخ
كنا مجموعه بنات ظرفاء ومحترمين وتفاجانا أننا نعرف بعضنا
كانت الإقامة فين يا ترى ؟؟؟؟؟؟
صدمه خيام بجانب الفنار القديم مكان صحراء جرداء البحر أمامنا والشمس فوقنا لم نر رجل او أمراه. هههههه
كنا فى العصارى وكنا ثمان بنات فى الخيمة وكان عندنا حاله ملل من الجو
تعملى ايه يا شوشو ايه يا شوشو آه كان معنا بنت اسمها كريمان الله يصحبها بالخير وكانت ضاربه شويه
بنات يلا كانت ناءمه فى سبات عميق مسكنا ابرهة وفتله وخيطناها فى المرتبه وجبنا المونكير ورسمها على يديها ورجليها وفجاه صحيت جت تتقلب مش عارفه وأحنا السبعه مرميين من الضحك عليها وهى تصرخ وتقول
عملتوا فى ايه يا كلبه حرام عليكم هههههههه وطبعا إحنا شررين وفجاه
قلتلهم مين فيكم إلى عمل كده ده هزار وانا غلبانه ومش قادره أمسك نفسي من الضحك
وفجاه بنت المشرفة صغيره عندها 7 سنوات بتتفرج علينا كريمان قالت لها تعالى يا سالم ساعدينى قشرى
معى قالت البنت ببراءه مش بعرف أقشر مامى إلى بتعرف بس
وطبعا بدأنا نجرى لان كريمان كانت فاقت ومصممة تضربنا ههههههههه
موقف لا ينسي هناك آخر ولكن فى المره القادمة
انتظرونى

[عُلو الهمّة]

الله الله في برّ الأم قبل النّدم ..

[ام اروى 86]

ههههه فظيعة انتى يا شرويت

بس ما قولتيش عملت فيكوا ايه بعد ما فاقت

احلى ايام ايام الثانوى والجامعة بس الجامعة احلى بكتير

ايه يا جماعة مفيش الاانا وشرويت وزهورة الى عندنا ذكريات ولا ايه

مستنياك يا شوشو انتى وزهورة وباقى البنات

[زهر الريحان]

علو الجميلة ،، لسه ما دخلت موضوعك رغم اني شفتو مراااات عديدة في توقيعك
،،،،،

ام أروى يمكن احنا من النوع اللي يحن للذكريات ويعيش بها
لكن ما اعتقد انو الكل عايش بالواقع فقط ،،
الحنييييين يشدني لكن افضّل ان اكتب لكم ذكريات احلى عندما أكون افضل بإذن الله

[لآلئ الجُمان~]

الله يسعدكنّ جميعا ويكتب لكنّ كل خير والهنا بحياتكنّ
ويجعل أيامكنّ مليئة بالذكريات الجميلة ()

:

ومن بحر الذكريات ~
وطن بيت كبير لنا سكن
لا أنسى تلك اللحظات المؤلمة التي فارقنا بها بيتنا ووطنّا الحبيب
كانت الدموع تهطل كالشلال ...
واجتمعنا بحزن وأسى على باب بيتنا
وكلّ الجيرة تحتضننا وتبكي وتودعنا وتدعو لنا ,
والدموع والعبرات في ذاك الصباح الغائم كانت هي المتكلّم الوحيد ...*
والحمد لله على ما قدّر الله
اشتقت لكلّ شيء هُناك واستودعت ربي وطني الغالي
أسأل الله أن يحفظه وأهلنا وأحبابنا من شرّ الفرس الظالمين
ويعيدنا لأرضنا منصورين ..
ونلتقى أحبتنا بدموع النصر ونجتمع من جديد بأحضان اللّهفة والاشتياق ...*

حسبنا الله ونعم الوكيل .
: