مدارس الاسكندريه

[shaimaa 78]

بالنسبة لحضانة A B C ممتازه جدا انا ابنى فيها من شهر 8 2008 يعنى قرب يكمل سنة ما شاء الله على المدرسات اللى فيها
هى مافيهاش لغة عربية بس فيها قرآن كريم ومدرسة القرآن فوق الممتازه ابنى حفظ حوالى 10 سور اواكتر حافظ احاديث كتيير حافظ اذكار الصباح والمساء
هى فيها لغتيين انجليزى وفرنساوى انا مدخلة ابنى انجليزى راح عمل مقابلة صعبه فى مدرسة فاروس نجح وكانوا مبسوطيين بية جدا حافظ الابجدية ABC كلها
حافظ الارقام وشكلها كلة بالشكل سياسة الحضانة مش بتمسك الاطفال اقلام غير تلويين فقط
عارف الالوان كلها اسماء الحيوانات كلها وكمان اهم حاجة.......
بينطق انجليزى صح الصح تعرفى فى مدرسة فاروس اللى عملتة الامتحان مدرسة امريكية مع واحدة مصرية علقت الامريكية انه بينطق الانجليزى صح
طبعا مع مراجعة خفيفه منك فى البيت بصراحة الفضل كلة للحضانة
هى فى ناس كتيير بتستغلاها بس بتدفعى فلوس وتلاقى مقابل اكتر
وبتبعتى مع طفلك وجبتيين فطار وغداء هى مش يتقدم وجبات
وبتهتم بنظافتهم والطفل بينام ساعة قبل مايرجعلك البيت
انا ابنى الباص بيجيلوا تسعة الا ربع الصبح على حسب ما انتى ساكنة وبيرجعلى تلاتة الا ربع
ولو بتشتغلى بتاخد اطفال انتى بتودية طبعا من الساعة7 الى 3 ونصف
وفيها انشطه صيفية فيها بسيين فى الصيف دة منغير فلوس لو عايزة تدربية معاهم برة نشاط رياضى فى نادى مبارك قوات مسلحة
بيودوهم فى الباص وبيرجهوهم وقت الحضانة دة متهيئلى بفلوس بس رمزيه
مديرة الحضانة اسمها مدام خديجة هى اخلاق اخلاق وبيدير معاها الحضانة جوزها وبناتها
واي سؤال انا فى الخدمة

[hanaa2]

انا متشكره لكى جدا افادتينى ان شاء الله حاروح واسال عليها هى تعتبر قريبه لى يعنى لو حيروحها مش حاحتاج ل باص
وسعرها معقول
ربنا يوفقنا للى فيه الخير لاولادنا يارب

[shaimaa 78]

بصى الاقبال فاتحة فى الدائرى ويتقدمى فى الفرع الرئيسى اللى هو فى الاقبال نفسها
هى عبارة عن مدرسة حكومة عادية هى لغات بس كانى انا وانتى فى المدرسة يعنى مفيش اختلاف بين مدرستى ومدرسة ابنى وكمان رحنا اللى فى الدائرى وقت الفسحة ما شاء الله على المدرس فى ميكرفون الفسحة اسلوب سىء عشان التلاميذ تجمع يعنى مش اسلوب حضارى مش سنة 2009
والله ده راييى انا مش متكبرة ولا بتعالى انا انسانة عادية بس نفسى يكون ابنى فى احسن حاجة على الاقل يكون فى فرق بين مدارسنا زمان ومدرسته دلوقتى
محمد كريم مش هياخدوه الا اربع سنيين انا روحت وقابلت المديرة قالتلى مستعجلة لية استنى السنة اللى جاية والمديرة سألتنى سؤال غرييب انتى شايفة ان المدرسة مناسبة ليكى .. سكت ماردتش
وفى نفس الوقت واحنا قاعدين مع المديرة كان فى مدرسات بيشتكولها من مدرسة تانية دى بتعمل اسافيين فينا احنا مش ضدها بالصووت العالى طبعا وخناقة
والدادات قاعديين على السلم بيشحتوا والحمامات زفت
دة رأييى ممكن ماتخدييش بية والتجربة خير دلييل روحى انتى واحكمى

[hanaa2]

معاكى حق انا برضه زيك نفسى ادخل ابنى حاجه كويسه بس للاسف المدارس النضيفه بتبتدى من 6000 وانتى طالع
والله انا حزينه وانا حاسه انى مش لاقيه حاجه كويسه وبسعر معقول
وبعدين حنعمل ايه

[hanaa2]

طب انتى لما لفيتى على المدارس وانتى بتقولى انك ابتدى من يناير ايه اكتر مدارس عجبتك
وبعدين انا مش عارفه ليه ما فيش حد من اعضاء المنتدى بيدخل يشارك معانا كان اسكندريه كلها ما فيهاش غير شيماء وهناء
حلجه تغيظ

[نسائم حائره]

متتغظيش ولا حاجة
هههههههههههه

بصي في مدارس زهراء المدينةبنتي كانت فيها السنة اللي فاتت بس طبعاسافرنا
فمكملناش
فيها قسم عربي و اانجليزي
المدرسة ممتازة
جدا
طبعا بتهتم بالدين جدا لانها اسلامية و كل الادارة و المدرسات ملتزمين الاولادفي فصول مستقلة عن البنات ده في الروضة بعد كده بيبقو في مبنى مستقل
بيهتمو كتير بالاطفال
وبيرجع حافظ اذكار و حافظ حاجات كتير من الباص بس
لو عايزة ارقام تليفوناتها ان شاء الله اجبهالك لان ليا قرايبي فيها
طبعا في مدرسة المدينه المنورة اقدم من زهراء و برضو التعليم فيها كويس بس المدرسة قديمة شوية

[hanaa2]

شكرا ليكى انا فعلا سمعت عن زهراء المدينه وكمان فيه مدرسه جديده تبعها لسه امبارح قاريت اعلانها اسمها بريلانس بس المشكله ان المدارس دى بعيده وانا خايفه من طول المسافه يعنى مش معقول اليوم كله يضيع وانتى عارفه وقت خروج المدارس الشوارع بتكون تقريبا واقفه انا عايزه اعرف انتى كنت ساكنه برضه بعيد عنها ياريت تحكى لى تجربتك بالتفصيل

[نسائم حائره]

اقولك انا ساكنة في باكوس يعني بعيد برضه الباص كان بياخدها 8الا تلت صباحا و بترج الساعة واحدة

القسم الانجليزي منها اسمه بريلانس كان بنفس المصاريف العربي لانه كان افتتاحه السنه اللي فاتت
بس السنه دي اكيد اختلف
هي المدرسة جميلة جدا وزي ماقلتلك بيهتموا بالجانب التربوي لطفل جدا و الديني بس مش كتير زي الازهر
في نشاطات كتير في المدرسة و دايما ندوات للامهات
هي مشكلتها الوحيدة المكان بعيد زي ماقلتي بس الاهم انهم بيكون بيهتموا فعلا بالطفل
على فكرة هناك بتلاقي مدارس كتير جدا و كلهم كويسين
زي ماقلتلك المدينه المنورة و اجيال و القدس **

[shaimaa 78]

الحمدلله فى واحدة انضمت لينا متشكريين جدا يانسائم حائرة على المعلومات دى
انا مسمعتش عن زهراء المدينة بس برضوا زى ماهناء قالت المسافة
انا سالت فى القدس بتاخد من 4 سنين دى السكرتيرة اللى قابلتها وقالتلى يااما تدخلية القسم الامريكى بس لما ضغطت عليهم واحدة قالتلى استنى لشهر5
ممكن تكون فى اماكن فاضية فياخدوا KG1
مصاريفها 1000 تأمين غير مسترد
3700 المصاريف على قسطين
500 كتب والزى المدرسى
1000 الباص
وطبعا بالنسبه لسموحة بعيدة بس انا بشوف الباص بيجى عندنا انا ساكنة قدام
جرين بلازا

[hanaa2]

انا سعيده والله ان الجروب بتاعنا ابتدى يكبر
بصى يا شيماء المدرسه اللى اسمها بريلانس كانت عامله اعلان فى الوسيط ولها موقع انا دخلت عليه شكلها كويس
والموقع هو www.brilliance-school.com انا لما دخلت عليه اكتشفت انها تبع زهراء المدينه بس مبنى مختلف تماما وانا سالت بالتليفون عرفت ان المصاريف 4950 بدون كتب او زى وغير الباص
وبتاخد كجى وان من سن 3سنين ونص

[hanaa2]

نسيت اقولك ان الباص حيجى ياخدهم الساعه 7 الا ربع لانها قالت لى بيبتدو الساعه 7ونص طبعا بدرى قوىىى
تيجى نعزل واهو نوفر تمن الباص هاهاهاها

[نسائم حائره]

السلام عليكم
هو فعلا بدري شوية بس انتي متاكدة ان ده ميعاد الكي جي
لانهم بيبقو متاخر شوية عن الجرايد
انا تجربتي كانت مع زهراء و طبعا كان في انجليزي اضافي
و كنت مبسوطة فيها
و احسن شيء انك تروحي بنفسك و تشوفي على الطبيعة
القدس قبل زهراء على اول الطريق الدولي

[shaimaa 78]

صباح الخير ياهناء وصباح الخير يانسائم حائرة
بصى ياهناء انا دخلت على موقع المدرسة حلوة بس تعالى نحسبها
لما تبقى مصاريفها 5000 واحنا ساكنيين بعيد يعنى هندفع اكتر حاجة فى الباص
قولى الحد الادنى 1000 وقولى الحد الادنى للكتب واللبس 1000 ولو انى اعتقد
ان هيبقى اكتر يبقى كلة 7000 او قولى 6500
وبصراحه حرام انزلة من بدرى قوى وشتاء اسكندرية صعب جدا وانا ابنى طوول الشتاء بيبقى عيان ياحرام لان اذنة حساسة جدا
بصى تفكيرى وقوليلى صح ولا غلط بس والدة مش موافقنى بس عايزه اسمع رايك
انا ممكن اجى على نفسى شوية ودبر وجمعيات
وازود على 6500 كمان 3000 يبقوا 9500 وادخلة مدرسة هلالية اللى جنب سيدى جابر مدرسة تحفة
بصى عامليين فيها حصص تجويد وهى استثمار مصرى كويتى صاحبها كويتى ومدام هلالية دى مراته مصرية المديرة بتاعتها امريكية مسلمة
والمديرة دى مشهوره اوى بس نسييت اسمها
وكمان فيها حمام سباحة اوليمبى وانشطة صيفية يعنى نادى ومدرسة انا اصلا مش مشتركة فى اى نادى
انا بقوول ادخله سنتيين kg1 kg2
وبعد كده يكون كبر واحولوا مدرسة ارخص ولو حتى بعيدة مش مشكلة صحته تكون احسن وكبر
بس نستحمل سنتيين اية رأيك؟؟؟؟؟؟؟؟؟؟؟؟؟؟
قوليلى رأيك بأمانة

[shaimaa 78]

ويارب افتح علينا جميعا ونسافر ونسييب البلد دى .... عشان خيرها مش لينا خيرها لغيرنا

[hanaa2]

بصراحه انا برده فى الاول فكرت زيك كده لكن لاقيت انى لو دخلته مدرسه كويسه ونضيفه وغاليه وبعدين احوله بعد كده على مدرسه ارخص يبقى اكيد حتكون اقل فى المستوى وساعتها الولد ممكن نفسيته تتعب النقل كمان مش سهل قوى ممكن ساعتها يقولو لك ما فيش اماكن
وانا علشان كده باحاول انى ادخله من الاول فى مدرسه يستمر فيها وتكون معقوله بس مش لاقيه
انا مش عارفه كتيير بيقولولى يدخل سيدى جابر وخلاص وخصوصا انها جنب البيت يعنى حيروح ويجى لوحده وفيه كمان جنبى زهران انا ساكنه قدامها بس هى كمبانى حلوه ونضيفه بس التعليم مش كده وكمان بتاخد سن كبيير يكون معدى الخمس سنين ومصاريفها اقل من 1000 جنيه تقريبا 850
انا محتاره مش عارفه لسه اخد قرار