ذكرياتنا يوم حــــــــــنا بزاريــــــــــــــــن الأ ليتها تعوووود

[بارعه]

السلام عليكم ورحمة الله وبركاته ومرضاته وان كان عندك شي هاته هذا سلام شايب يقرب لنا الله يخليه لعجيزه

اليوم الاربعاء وانا منطقة مو منطقة يعني مضروبه لا يعني جالسه وزهقانه ومقابلتن هالنت الله يخليه لي هو الوحيد بالبيت اللي يوسع صدرتي ولا ابوالشباب ماتمرقه عيني إلافي الظلام الدامس

الحقيقه منذو مبطي ودي اكتب عن طفولتنا البريئه تحمست قلت خل امحط بموضوع يفش خلقي ويوسع صدرتي ويقضي وقتي ويذكرني باللي مضى
كانت طفولتي بريئه ومفهيه احيانا وماعندي ماعند جدتي الله يرحمهاواحيانا ابليس ياخذ اجازه اذا تلاعنت واستشريت..صعبه اكون انا وابليس علي العالم شرط ان تخرب الدنيا
ابوي وامي مستاذين مني الين قالو امين وقبلي شاطتن بهم ووسم جلدي من كثر مايطقوني بس ماش مافيني رجاء ابد واستاثمو فيني وامي تقفل باب الشارع عني ماتبيني اطلع.. ((بلا والله العالم اللي تزهم يشتكون منتس ))
وبصفة ان عندي اخوان اكبر مني وقبلهم هايتين بالشوارع فدايم الاطلعوا ازرق معهم..علي ان امي تناديني
وتتوعدني وتتهددني بس ساحبه علي مندوبها..اطلع من البيت منطلقه للحياه واناقز من الفرحه كان بيتنا سجن اعوذ بالله.. اخواني24 ساعه لعب كوره بالشارع ماعليهم مني جعلي اشب وارمد اهم شئ لاتعلمين علينا ولانعلم عليتس((سياسة شد لي واقطع لك))
نكمـــــــــــل

[بارعه]

مرتن من المرات كنت جالسة بعتبة بيتنا وكاشخه تونا صابغين الباب ومنغرررره
لمحت عيني بنت الجيران فطوم وهي تمر من عند بابنا فطوم ذي دبيه حيييل المهم بصوت عالي الدبيه البرميل برميل الزيت
مادريت الا باللي يسحبني من جديلتي يوم رفعت راسي وانووااع التكفيييخ والطراقات حمرت خدودي من كفوفه جعله الماحي وفشلني عند صقيقتي وادخل عند امي قالت تستاهلييييييين جعلتس من هالحال واردي (حتي امي تتشمت بي) وبغت تسفني بالملاسه وهي تطبخ
كل شئ ببيتنا يصكونه عني.. يحسبوني اقرب ل ياجوج وماجوج ابقضي علي كل شئ مع اني مانيب اكل واجد(اشوا انتس تاكلين الطري واليابس
ابوي الاجاب لبيتنا جح((حبحب بروايه اخري)) وهو كان كريم يجيب كميه كبيره (بلاه والله داري ان اللي عنده بالبيت جراد مهوب انس اسرق كم جحه واخذهن للشارع انا وبنات جيراننا وكانت جنبنا زي الحديقه مجمعنا اليومي فيها
نفقش ونكسر الجح علي الارض(الله من زين النفس بعد
) وانواع البلع كان اللي معي ماشافوا خير ابد(ماعليتس زود)
واذا بعد اهلي سوو عزيمه وحطوا ذبايح انا واخواني نصرق راس الذبيحه ونفحط الين ندخل الحديقه ونتقاسمه اللي ياخذ اللسان واللهاه والعين ومدري وشو انحن والعيال والبنات (والله لو انه راس ديناصور تتقاسمونه
امي ضاقت بها الحال مني شوي وتصيح وتقول لي وش الله بالني بتس والله اني باره باميمتي
وش بلاتس انتي تسذا متي بتغدين حرمه الله يهديتس ولا الله ياخذتس
ان كان الجدران اللي عندكم سمعت وفهمت فانا سمعت وفهمت مطنشه العالم ولاحولي احد..
نكمــــــــــل الله يعين ايديتي

[بارعه]

طفح الكيل عند امي ودلت تصك علي بالحمام اللي بالعليه حق الشغاله(هذي اخرت متابعه سالي)
تقول اعقلي والا ابخليتس دائم كذا بالحمام..
ولا من زين المحل ..لاحظو حمام شغاله..الشغاله تحط حرتها فيني وانا في الحمام الا انحسرت ولاشئ ثاني تقول لي انتي ملحوكا(ملحوقه) مافيه كويص ليه انتي كذا انا ابغي حمام انا ايش سوي الحين
قلت لها سوي بيض الله ياخذتس مانيب رايقه لتس يقال الحين معجبني حمامتس قاعده اخذ فيه فتره استجمام ونقاهه مالت عليتس وعلي حمامتس الخايس ..كله ريحة شغاله..وودي اطلع منه الحين..اضرست علي الشغاله وراحت
ابي احد من اخواني يجي يفزع ماش كلن يقول نفسي وبس..الا انهم يجون لي يتشمتون و فاطسين ضحك علي يقولون
اخرتس حمام شغاله.. افااا بس..قلت لهم تكفون طلعوني روحوا ادهنوا سير امي بشئ الله ياخذكم دورا لي صرفه طاعون اي شئ طلعوني اشتقت للشارع والله..وش اخباره وش من جديد فيه؟قالوا ابد علي خبرتس لاجديد..

خذت براءه وطلعت من الحمام والشغاله بغت تسوي حفل بهالمناسبه بس موفره فلوسها لاهلها
ومير ماصبر كأن مانصك علي يوم الاشوي بالحمام و حطيت رجلي للشارع منجديد وفرحانه بعنننننف
مادريت الا من بكرا انا واختي اللي اكبر مني علطول داخلين السجن مره ثانيه (حمام الشغاله )
عاد مدري وشهي مسويه علي اني سالته بس مامسكتني علم بس الظاهر انه سارقة من شنطة امي حصه شرط
قلت اشوا ان معي احد يوسع صدري ويرد لي الصوت (يزيتس صدي صوتتس بالحمام
وانبسط لانه معي وبيني بينكم مهوب انبساط قدر ماهو تشمت
وجت الشغاله تطل علينا وهي حاقده قالت شكل كلوه اخو انتا ايجي هنا بكره في حمام انا
قلت لها طسي بقريح قال ايش قال حمام انا ..دافعه شئ من جيبتس ولاجيب ابوتس انتي وكشرتس اللي مدري وش تبي
اشوا انه من حلال ابيي الله يخليه قالت انتى مافيه كويص قلت هذا اللي جيده فيه مافيه كويص قطعوتس انشاءالله كوصه في مرق انطمي الله ياخذتس والله ماكدر صفو حياتي الا انتي وحمامتس الله يقلعكم يارب جميعن بيوم واحد..
وقطعة اخيتي الوقت علي بالسوالف وجانا العفو الملكي قبيل المغرب بساعه وماصدقت انا واخيتي نشوف النور الا ماشين 4000 للشارع... ((ابي معرفه سر محبه الشارع ))
وصرنا علي هالحااال يوم براءه وعشر ايام سجن
وحده من بنات الحاره كانت صقيقتي علي انها اصغر مني(كلن مصادقته انتي) وكان عندهم مرجيحه وزحليقه في بيتهم وقبلي ساكنه عندهم الا ان تجي امهم تشوتني من بيتها..ودائمن العب فيها..اقضي من المرجيحه اروح للزحليقه وعلي هالحال ..الين جاء ذاك اليوم ..جت اخت صقيقتي كبري هوو وانا راكبه المرجيحه الحالي وواقفه علي طرفها واهف فيها جت الكمخه اختها وقفة قدامي مادريت الا اني شايلتها مع راسها بالمرجيحه..وماحطتن بهاوطارت مادرينا الا ابو جيرانهم يطق الباب يقول ان حلتوها مره ثانيه ابشقه
انفلقة وصبصبة منها دمان انا انهبلت تحسبوني انقذتها ولا ناظرته هيهات جتني ام الركب ويالله وصلت بيتنا من الخرعه.. دخلت بيتنا ولا كلمت احد ودايركت للسطح وادخل الحمام (باصمه بالعشره انهم بينطلونها بالحمام بس اللي يختلف هالمره اني زلجت الباب ماحتريتهم يقفلون علي تخاف يدخلون عليها يفرشونها

[بارعه]

اتصلت ام الجيران جعلها المانيب قايله علي امي تشكيني امي نصف الشيب اللي براسها مني.. جت لي وانا بالحمااام وجلست تهاوشني بس انا مرتاحه ((واثقه ان ماحدن طايلها ))
وهاشت الين داخت و ملت وراحت..
فتحت الباب وطلعت وادقدق للشارع الا ابوي مقابلني بددسنه مدري وين بيرووح اشر لي اشاره بيده وقصده هو من الاشاره ادخل البيت..انا كمخه طبعن احسبه يقول اركبي وانقز للصندوق واركب ومشي هو ومبسووووطه علي الاخر
واقول بنفسي غريبه وش الطاري ابوي يقول اركبي ياحبيله ابوي يبي يتمشا بي داري ان هالحمام خنقني الله يخنق الشغاله..اشوف الطريق اللي يمشي فيه ابوي غريب وتعلو الاستفهامات راسي وين بيوديني له؟؟
قلت ياخبر اليوم بفلوس باتسر بلاش قصدي بعد شوي(الله من البرود فيني)
مادريت الاه موقف عند بيت واحد من اخوياه وكانوا قالطين بالشارع فارشين بساط وترمس القهوه والشاي
ابوي نزل من السياره وانا متعلقه بالصندووق احتري المفاجاه مادريت الا واحد من اخوياه يقول
وش بلاك يابو محمد وش انت جايب معك؟
ابوي التفت مطير عيونه علي بغت تلحقني زبيريات الرجال والترامس والبيالات والفناجيل
قال اركبي نعنبوا ابليتس ان كانتس غثاء قلت له انا راكبه بس احتريك تشغل .وانا استظرف في هاللحظه مادريت الا ابوي تالني مع علباتي وصاكني ذيك الصكه اللي عدلت راسي وتلني وركبني معه قدام..
ويقعد يلقي نصايح علي وانا ضايقن صديري..مهوب منه من اخوياه والله تفشلت عندهم واللي قاهرني يوم تلني ابوي تمددوا ضحك علي..رجعنا البيت ويعلم ابوي امي بالسالفه تنهدت امي تنهيده مغزاها يقول: ياحلالات من عفجتس عفج يغني كراعتس منه.. ((ياحبي لتس يمه ))

ودامت الحياه ماتوقفت (لاياشيخه نحسبها توقفت) يوم نضحك فيه وعشره نصيح منه..
الين غديت حرمه اخت وبنت رجال..واهم مافي الامر ان ابر واعوض اميمتي..
اخاف تجيني بنت بعدين تغثني وتوريني نجوم الظهر مثل ماغثيت ووريت امي بطفولتي..الله يسامحني بس...
ماجمل ايام الطفووووله حتي لو كانت مؤلمه..الا ليتها تعووووووود ..

مع تحيات بارعـــه
القصه بعضها من جعبتي والبعض منطوووول

[ام سهيل]

والله يابرووووووووووووووووووووووعة كنت شيء وانت صغيرونة .

الله يقطع ابليستس فقعت بطني من الضحك على سواليفك .
والله انت صادقة يالها من سواليف .

[أم عمارة 1]

ماشاء الله اثر سموتكم كله تحب اكل الروس
واهم شيء العيون واللسان
مثل الخال وعياله الله يرحمه

[بارعه]

وش يفك من ام مازن ياام عماره روس وعيون

الله يرحمه الخال توهق ناسب ناس مايعزمونه الا على الروس والكراعين وادمن عليها كله منكم
زاد اقول وش كل الذكاء بعيال خالتك الحين عرفت السر
حنا نقول ليش هم ذهانين وعليهم السن ماشاءالله تبارك الرحمن

[ّ!!منال!!]

[- asma -]

كل هذا كنت تسويه يا مفترية
ما بقيتي شي للخلق


أحلى حاجة هدي: ( دخلت بيتنا ولا كلمت احد ودايركت للسطح وادخل الحمام )
من متى وانتوا تقولوا دايركت بالقصيمي

[شمالية غربية]

فتحت الباب وطلعت وادقدق للشارع الا ابوي مقابلني بددسنه مدري وين بيرووح اشر لي اشاره بيده وقصده هو من الاشاره ادخل البيت..انا كمخه طبعن احسبه يقول اركبي وانقز للصندوق واركب ومشي هو ومبسووووطه علي الاخر
واقول بنفسي غريبه وش الطاري ابوي يقول اركبي ياحبيله ابوي يبي يتمشا بي داري ان هالحمام خنقني الله يخنق الشغاله..اشوف الطريق اللي يمشي فيه ابوي غريب وتعلو الاستفهامات راسي وين بيوديني له؟؟
قلت ياخبر اليوم بفلوس باتسر بلاش قصدي بعد شوي(الله من البرود فيني)
مادريت الاه موقف عند بيت واحد من اخوياه وكانوا قالطين بالشارع فارشين بساط وترمس القهوه والشاي
ابوي نزل من السياره وانا متعلقه بالصندووق احتري المفاجاه مادريت الا واحد من اخوياه يقول
وش بلاك يابو محمد وش انت جايب معك؟
ابوي التفت مطير عيونه علي بغت تلحقني زبيريات الرجال والترامس والبيالات والفناجيل
قال اركبي نعنبوا ابليتس ان كانتس غثاء قلت له انا راكبه بس احتريك تشغل .وانا استظرف في هاللحظه مادريت الا ابوي تالني مع علباتي وصاكني ذيك الصكه اللي عدلت راسي وتلني وركبني معه قدام..
ويقعد يلقي نصايح علي وانا ضايقن صديري..مهوب منه من اخوياه والله تفشلت عندهم واللي قاهرني يوم تلني ابوي تمددوا ضحك علي..رجعنا البيت ويعلم ابوي امي بالسالفه تنهدت امي تنهيده مغزاها يقول: ياحلالات من عفجتس عفج يغني كراعتس منه.. ((ياحبي لتس يمه ))

تحفففففففففففففففففففففففة يابروع الله يوسع صدرتس بالإيمان وطاعة الرحمن ..


ضحكني كثير هالموقف بس قاعده اتخيلتس ذيتس الحزة ...

أحلى حاجة هدي: ( دخلت بيتنا ولا كلمت احد ودايركت للسطح وادخل الحمام )
من متى وانتوا تقولوا دايركت بالقصيمي )

صدى لاتدققين حيل ....

[بارعه]

صدى شمووول دققو مادريتوا اني قصيميه ورجلي رياضي فيذا دايم نتهاوش بختلاف اللهجه كل شي متوافقين فيه الا اللهجه
القصه بعضها من جعبتي والبعض منطوووول

[أمنيه]

[سراب الليل]

ذكرتيني بطفولتي ( اشترك معك بحب الشارع بس ولا انا هادية )



راح اقول لكم موقف صار لي
مرة كنت طالعة العب في الشارع كالعادة وكان عمري وقتها ما بين 4 و5 سنوات تقريبا المهم عندنا جار حاط عند بابه كلب للحراسة وتاركه من دون ربط وانا كنت العب ومريت من جنب بيتهم وما عمل شيء شكله كان مربوط لحظتها لما جيت ارجع البيت كان لازم امر من جنب بيت الجيران وما ادري الا والكلب يلحقني وانا من شفته واركض على البيت وصياح ومن الخوف طاح فردة من الصندل الي كنت لابسته كنت ابرجع اخذه بس الكلب كان يلحقني وبعدين اخذه ورجع لبيته وانا دخلت البيت وانا ابكي sid واحمد الله على نجاتي منه

[توام روحى]

تسلمى اختى بارعة على كلامك الحلو ولو انى اعذرينى ما فهمت نصه

[a&a]

انا من مواليد الرياض...وساكنه بالرياض 24 سنه...وزميلاتي أغلبهم قصمان
ومع هذا فيه كلمات ما عمري سمعتها...ما ادري من أي قاموس جايبتها
بس وسعتي صدري الله يوسع صدرك...لاني نفس الشئ داخله وضايق صدري