زمنا غير
السلام عليكم ورحمة الله وبركاته
اخواتي العزيزات احترت هل سوف انزل الموضوع او لا .. فالموضوع نتج عن مناقشه بل ومشاده في موضوع مهم في وقتنا الحالي ... والصراحه لم احاول ان اقتنع وان اقنع لكن ماباليدي حياله ففضلت استشارتكم لعلي اجد الحجه المقنعه
اخواتي تعبت وانا اكتب في الموضوع وهو من كتابتي وهو حقيقي فلا تبخلي عليه بل اقرئيه الى النهايه لاني متاكده ان هناك تساؤل ما يشبهه في ذهنك >>> تقييم لا هنتوا
اللي صار كنت جالسه مع صديقاتي الجامعيات وكنا نتناقش في عده مواضيع لكن كان الموضوع المهم اللي هو الزواج بما اننا مقبلات على التخرج وربما الزواج وكنت معهم ومناقشاتنا طويله ومتنوعه >> تعرفون هذرة الحريم
سوف ارمز لهن بالارقام
الموقف 1
صديقتي1 ..تقول والله احنا بنات الهندسه راح نعنس في بيوت اهالينا لان مافي احد من الشباب يحب تكون زوجته مهندسه (لان المجال الاكبر للرجال ) .. ترد عليها صديقتي2 ... ومن قالك اغلب الشباب حتي الطبقه الراهيه يبون بنات يصرفون عليهم لان اللحين في وقتنا انقلب صارت القوامه على البنت ..صديقتي 3 .. لا من قالك اسمعي انا اخوي يشتغل بأرامكوا يعني تعرفين العقليه عقلية اجانب بس مايبي موظفه خصيصا المعلمه اكل وشرب وخدامه تشتغل في وزارة التربيه والتعليم وتلاقين عيالها وبيتها من دون خدامه ماينطاق ويقولون يبون يتقاعدون واغلب الخريجات قاعدين في البيت بسببهم
الموقف2
صديقتي 3..اقول من بياخذني انا مهندسه وسمرا وماني حلوه وكل الشباب طايحين على هالتركيات او السوريات بعد ماغلت المهور وصاروا العوايل مايبون الا المطوع ..صديقتي 1 .. طيب الدين قال من ترضون دينه وامانته فزوجوه يعني من الطبيعي نبي مطوع او متدين ..صديقتي3 .. ايه واذا الشاب مايبي يصير مطوع ولقا من هالسوريات اللي مهورهم ماتتجاوز 30 الف اكيد راح يتزوج
الموقف3
صديقتي 4( ماشالله على قدر من الجمال )..طيب يابنات انا اختي متزوجه واللحين تعاني من زوجها وقاعده معاه عشان العيال بس .. اخاف يجي واحد مثلها وانا موب ناقصني شي ..صديقتي 5 .. ايه صح انتي من حقك تختارين جما ومال ورقه ونعومه يعني لو تاخذي لبناني احسن ..صديقتي3 .. طيب لحظه ليه احنا يالبنات نلتزم بالحديث من ترضون دينه وامانته فزوجوه ؟؟؟ والشباب مايلتزمون فيها لو جا يبي يخطب مايبي الا الجميله البيضا القبيليه يعني البشعه والقصيره والدبه مالها حظ ؟؟؟مثلي ومثلكم هههه .. لا تقولين لي امهاتنا وجداتنا ماكانوا حلوين لان زمنهم كانوا يبون زوجه ويبون الستر ويبون ام اوما اللحين اللي يبي مثل نور واللي مثل هيفا وهبي واللي يقهر هم كل شاب اشين من الثاني ..صديقتي 5.. هذول حبيبتي اغلبهم امهاتهم معطينهم وجه يعني تقوله تعال اخطبلك احلى بنت بس انت اعطيني المواصفات يعني لو تشوفين مجالس الخطابه الامهات يجلسون يطنزون على بنات الناس ويقولون وع شعرها خشن مابيها لي ولدي ..الخ يعني بختصار امهاتهم هم اللي حدوهم على هالشي او من كثر الواحد يشوف التلفزيون من الجميلات اثول مايبي الامنهم وبعد موافقة والدته مين يقدر يرده صديقتي 3 ... ايه حتي امي يوم جات تخطب لخوي كانت تبي وحده حلوه مع انه موذاك الحلا يعني اخوي اسمر مره وشوي قصير ودبدوب يعني بختصار حتي الشين يبي الزينه اجل وين بيروحون الشينات خخخ
الموقف4
صديقتي6 ( غير سعوديه )..احنا عندنا الزواج سهل لان احنا محجبات ويصير يتعرف عليها من الجامعه يعني يعرفها ويشوف شكلها وبالتالي يتصير الموافقه من الطرفين انتو هون صعب بالسعوديه لانه مابيعرفها ولا حتي يشوفها واذا شافها في الخطبه الشرعيه ملزوم يتزوجها ..صديقتي 3 .. ايه صح انتي صادقه وتدرون اكثر حالات الطلاق بعد الكويت احنا السعوديه يمكن يكون من هذا لان الشاب يرتبط بوحده مايعرفها صح تكون بمواصفاته بس يمكن تكون بذاك الجمال وهو المطلوب بس ماتكون بذيك الاخلاق وبعدين يحدث طلاق .. يعني لو يكون متعرفين من قبل كان كل واحد رضا بالثاني او على الاقل لو كان شافها من قبل كان تطمن قلبه بدل ماتوصف له امه او اخته
الموقف5
صديقتي 7 ..تدرون قبل كم سنه تقدم واحد يتيم الى بنت خالتي بس انها رفضت ولو اا تقدملي واحد يتيم راح ارفض ...صديقتي 6 .. ليه طيب كلنا بشر وتجينا مصايب ليه تحمليها مصيبته الرسول كان يتيم شي عادي ..انا .. تصدقون بنات انا لو تقدملي واحد مقعد او ابكم او اصم راح اوافق لان طريق الجه راح يكون قريب اذا خدمته بعيوني ودام ا الدوله تقدم مساعدات للعاجزين فهذا راح يكون اسهل واجر اكثر
الموقف6
صديقتي 4..بنات تصدقون فلاه الفلاني تزوجت 4 مرات اللحين تطلقت تدرون ليه؟؟ صح كانت جميله مره بس اخلاقها ماش يعني كل من سمع عنها يبي يتزوجها عشان جمالها واللحين تطلقت ماستفاد احد من جمالها يعني انبسطوا جا دورنا يالقبيحات هههههههه
الموقف7
صديقتي4 ..ليه يعاملون الشاب الخارج من السجن انه مطوع وحافظ للقران ونه راح يكون زوج صالح بخلاف البنت اذا طلعت من سجن خلاص صارت من المغضوب عليهم.. صديقتي5.. لانهم شباب ذكور كل شي جايز لهم يعني حتي اللي يبتعث برا ويجي يكون افضل شاب بينما البنت اللي تكون مبتعثه ينظرولها بأنها بنت فاسقه وحتي البنت اذا كلمت شاب تلاقين اهلها يذبحونها يحبسونها يظربونها بينما الشاب يقولون له لا تعيدها اذا بغيت نزوجك زوجناك يعني يكافؤنه بالزواج بدل ما يعاقبونه لانه يصير هتك حرمه من حرمات الله .. هذي مجرد نظرة مجتمع وان شالله لو طلعنا ندرس برا راح تشوفوا الفرق.. صديقتي 6 الغير سعوديه ... ايه صح احنا ماعنا هالاشياء ابدن وحتي الطلاق ماكتير بنسمع فيه متل هون وحتي الضرب والخيانات بين الازواج مو كتير متل هون
الموقف8
صديقتي 2..تصدقون بنات زوجة عمي المتوفي تقدملها رجال عنده زوجتين بس هي رفضت صح انها مو كبيره يعني عمرها في الثلاثين بس رفضت مادري ليه ..صديقتي 5.. ايه خير تصير الزوجه الثالثه مجنونه هي يعني واحد ماقدر على ثنتين بيقدر على ثلاث ... صديقتي 2 ...صح بس اللحين هي وحيده بس عندها 3 اطفال ..صديقتي 5.. خلي اطفالها يملون عليها الدنيا خلاص هي جربت الزواج مثل المطلقه خلاص جربت خلي مجال لغيرها هههه وبعدين رجال اليوم تعرفينهم لا صرف ولا قوامه ولا حتي ادب تبينها تتمرمط بعد دلع عمك الله يرحمه اصلن مدري ليه الاهالي بهالغباء يزوجون بناتهم الصغيرات واحد متزوج شلون يرضون تكون لها ضره يعني مافي شباب مثل اول ينشرون بالذهب يعني بدل ماتكون دلوعة امها وابوها تكون سجينه زوجها خيررررررررر
الموقف9
صديقتي 7 ..تدرون بنات انتم تتكلمون عن الزواج وانا ماني جنبكم بس شايله هم اننا سبع بنات اكبر وحده تقريبا 26 سنه بس ماتزوجت .. صديقتي 2 .. طيب هي رفضت او ايش .. صديقتي7 .. لا محد تقدم لها الا واحد او اثنين ورفضت امي وخلاص الى الان قاعدين واتوقع السبب انا مانطلع من البيت ولا احد يعرفنا لا نروح عزائم ولا طلعات ولا زواجات ولا شي حتي المكياج مو كثير..صديقتي 2 .. عادي تراه قسمه ونصيب... صديقتي 7 .. ماقلنا شي بس لازم الدفع بالاسباب يعني حتي المشايخ يقولون اخطب لبنتك لا تخطب لابنك وبعدين احنا كلنا تخصصاتنا حلو هندسه وطب وانجليزي بس توقع امي مخبيتنا واتحب احد يجيب طاري الزواج مدري ليه وحتي ابوي اهم شي عنده الوظيفه وغيرها لا وحتي اخوي الكبير اهم شي تجيبين فلوس وغيره لا يعني مستحيل يصير شي قبل نكمل الدراسه واللحين اختي عنست والباقين في الطريق
هذي المواقف واديم تحصل لانها موضوعات مهمه واللحين اخواتي اترك لكم كامل التعليق والنصح والميكروفون معكم على اي موقف وانا كلي اذان صاغيه لكن اتمن منكم الجديه والصدق وربما انتم احكم مني واعقل واكبر وانا على اتم الاستعداد للمناقشه وللتصدي للهجمات القاسيه 
امون في الانتظار
منقوووووووووول
منقوووووووووول
تعليق