يمكن الموضوع ما بيستاهل بس انا متورطة متورطة ومحتارة ومحتاجة رأيكم

[أم جود87]

السلام عليكم يا بنات
الموضوع صراحة يعتبر تافه بس انا بهاللحظة بورطة وماني عرفانة كيف اتصرف

بصراحة انا عند اهلي هالفترة وبتعرفوا اني حامل ..

بابا الله يخليه طبيب قلبية وعندو جهاز ايكو للقلب وهو مسافر ورح يرجع
بكرة بالليل.. المهم انا قبل شوي قلت خليني افتح الجهاز واشوف البيبي
شوي بالايكو .. وفعلا فتحتو وشفت البيبي (لأني بعرف كيف الخطوات)
وفرحت كتير بس المشكلة فجأة الجهاز ما بعرف شو صرلو وسكر لوحدو
والله ما عملتلو ولا شي غلط على حظي اتسكر لوحدو (هو عبارة عن جهاز
متل الكمبيوتر تمام بس مطور للاطباء)

فلما حاولت ارجع افتحو عم يقلي انو في مشكلة بالنظام .. شكلي
خبصت الدنيا .......... المشكلة بهالجهاز في كل معلومات المرضى وانا
تورطت ومحتارة باخر هالليل ..

احكي لأمي ؟؟؟
ولا احكي لبابا (يمكن يموتني)
ولا انسى الموضوع واعمل حالي مالي أي دخل ؟؟؟؟؟؟

شوروا علي شو أحسن حل بالله عليكم؟؟؟؟؟؟

[!! طيف المشاعر !!]

حبيبتي انا بالنسبة لي اشوف انك تصارحي ابوكي
يعني قولي له انتي ايش اللي عملتيه بالضبط
يمكن هو يقدر يحل هالمشكلة اللي في النظام
لانك لو سكتي ممكن يتهم احد تاني

: )

[ســومــا]

الله يعينك عزيزتي سمر بجد ورطة
أنا من رأيي تعملي خطة
إتصلي على أبوكي وإستأذني منة إنك بدك تفتحي جهاز الإيكو
لأنك بتعرفي تستخدمية
ولما يوافق إتصلي بعدها بخمس دقائق وإحكي لة إنة صارت
مشكلة والجهاز إتعطل
مااعرف أحس إن هذا أنسب حل لمشكلتك
عشان يجنبك الإحراج بنفس الوقت أبوكي يصير عندة علم وما
يتهم أحد ثاني

[سدراالمنتهى]

والله ورطة ياسمورة كنتي ستني بابا وهو بيورجيكي ياه بس والله ياما بيصير هيك قصص
بالصدفة ببطل يشتغل الغرض يلي مو النا
انا برائي اولي لامك وهي تقول لابوكي هاد الشي ببعدك عن الاحراج وجه لوجه وموفقة على الزفة مقدما وتعيشي وتاكلي غير هالخناقة عم امزح طبعا

[بديني أحيا]

ضروري يا أختي تقولي الصدق

لأنه الصدق منجاة والكذب حباله قصيرة

ولا تخافي يمكن عطل عادي ،،

عموماً طمنينا وما في إلا الخير بإذن الله

[DAHUBA14]

سموره الملقوفه خخخخخ
لا تخافي عادتا المعلومات إلي في الجهاز بيكونوا مخزنات
ما بيختفوا بسهوله هاي لآن في يا عمري ملفات و اشياء محفوظه
و الله اعلم
انتي ما تخافي ابدا حاولي تقولي للوالدة و هى بتوقف معك لما تخبروا الوالد
بالي حصل بضبط
المهم انتي ما تتوتري كتير مو منيح علشان البيبي
المهم ادعي ربنا و استغفري بنية الله يستر وما يكون صار شيئ عطل في الجهاز
بس عندي احساس ان الموضوع بسيط ان شاء الله ما تخافي
و طمنينا يا قلبي في اقرب وقت
الله معك و دعواتنا ترافقك حبيبتي .

[rejena]

صارحي ابوك وان شاء الله العطل سهل تصليحه

[zineb gharbia]

الموضوع ما بيستاهل

بل يستاهل يا سمر
شقاوة وأنت حامل .

أعتقد أنّ أحسن حلّ هو أن تخبري والدك

لأنّه من الممكن ألا يكون قد حصل فيه عطب كبير
و وهذه الأعطاب عادية يمكن إصلاحها
كما أنّ الملفات تكون محفوظة ؛ وقد لا تتأثّر
لكن لا أنصحك بالتحايل ؛ لأنّ التهمة قد تلصق بإنسان بريئ،
وإن خفت من مواجهة الوالد فأخبري والدتك ؛
وهي تعرف كيف تنقل الرسالة
وإن شاء الله لا تكون ورطة .

[أم جود87]

شكرا حبيباتي على نصحكم لي

بصراحة الامور سارت بشكل مخالف للي توقعته
انا حكيت لماما وهي قالتلي لما يجي من السفر
قوليلو بكل بساطة انا فتحتو وما عملت شي بس
علق الجهاز .. انا قلت خلص رح اقلو لما يجي وامري لله

المهم هو مسكين كان جاي من السفر مستعجل
عندو مرضى مستنينو واجا بسرررعة اخد الجهاز وراح !!
وانا انربط لسااااااااني ما بعرف شو صرلي ما قدرت
افتح تمي ابدا
وقلبي على ناااااااار

المهم لما رجع كان عااادي كتير وقعدنا نتعشى فجأة قال:
اليوم غريبة فتحت جهازي بيكتبلي في مشكلة بالسيستم
وما اشتغل معي .. شكلو اتأثر لأنو من كم يوم وقع من ايدي
!!

انا ما كنت اعرف انو الجهاز وقع من ايدو بس بصراحة الجهاز
لما انا فتحتو كان شغال عادي بس على حظي طلعت شاشة
زرقاء فجأة واتسكر .. ماما ما حكت شي وانا ما قدرت احكي
شي ولحد هلأ بابا مفكر انو من الوقعة مو مني ....... وانا
ضميري بيعذبني بس ما عاد اقدر احكي لأنو ما بعرف راحت
شجاعتي وكمان الحمدلله ما اتهم اي حدا . بس هلأ بدو
يتصل بمهندس كمبيوتر وياخده يصلحه واستعار مؤقتا جهاز
ايكو من زميلو ................................. فعلا اتعلمت هي
اخر مرة بحياتي بلمس اغراض غيري !!!

شكرا عنجد على ردودكم الله لا يحطكم بهيك موقف

[سحابة الوفاء]

سمر حمداً لله إنوا حصل هيك ولكن من رأي إنك تحكيلوا
الصدق صح الموضوع انتهى ولكن الله عز وجل وضعك في إمتحان
أقصد يا ما رح تواجهك مشاكل في المستقبل عزيزتي ومش ممكن يكون
حلك للأمور بهذة الطريقه يجب أن تكوني حازمه في قراراتك وتتحملي
مسؤوليه خطأك لتكوني أم عظيمه ومربيه ناجحه وإذا خنا الأمانه بشيئ صغير الشيطان في المستقبل رح يسهل الأكبر من هيك
الإعتراف بالذنب فضيله ما بعرف هذا رأي وبالتالي الوالد ما حيزعل
من أولادة وفقك الله إلى ما هو خير

[أم جود87]

سمر حمداً لله إنوا حصل هيك ولكن من رأي إنك تحكيلوا
الصدق صح الموضوع انتهى ولكن الله عز وجل وضعك في إمتحان
أقصد يا ما رح تواجهك مشاكل في المستقبل عزيزتي ومش ممكن يكون
حلك للأمور بهذة الطريقه يجب أن تكوني حازمه في قراراتك وتتحملي
مسؤوليه خطأك لتكوني أم عظيمه ومربيه ناجحه وإذا خنا الأمانه بشيئ صغير الشيطان في المستقبل رح يسهل الأكبر من هيك
الإعتراف بالذنب فضيله ما بعرف هذا رأي وبالتالي الوالد ما حيزعل
من أولادة وفقك الله إلى ما هو خير

والله معك حق بكل كلمة اختي
وانا مفكرة انو لازم اقلو بس ان شاءالله يصلحو
وكنت عم فكر قلو قبل ما ارجع عند زوجي
مشان يعني ما يبهدلني كتير

[SIRINA]

ههههههه يا شقية

ليش كل هالخوف الوالد اكيد ما رح يزعل

خاصة وانتِ حامل هههههه

الله يتمملك حملك على خير

وياريت تصارحي البابا

الله معك

[rejena]

طمينيا اختي عنك وعن جهاز ابيك
ربي يتمم حملك يارب ويسعدك

[إنجــــــــي]

الحمدلله اختي سمؤ ان الموقف عدى على خير
ممكن ال8هاز فعلا تأثر من الوقعة
لآن حتى لعبك فيه ممكن يأثر على المعلومات لكن لا يؤدي الى اغلاقه تماما

المهم انا برأيي ان افضل حل الصراحة المباشرة
اختي يمكن لو اخبرت والدك بما حدث يساعده في معرفة مشكلة الجهاز
و يسهل اصلاحه بالتالي

و تعودي على الصراحة مع والدك
انت ما شاء الله بنت كبيرة
و ليس من السهل ان يتعامل معك بطريقة سيئة خاصة لو انكم متعودين على اسلوب راقي في حل المشاكل و الحوار
و حتى لو عصب او تدايق فتعلمي تحمل مسؤولية اعمالك

و ان شاء الله موقف مر و انتهى

موفقة ان شاء الله

[n0urr]

ما تكبري الموضوع كتير....
نعم قولي لامك ...سمعي رايها
وطولي روحك ان شاء الله خير