ساعدوني بمشكلتي مع أهل زوجي وأهلي

[أم جودي وجنى]

مرحبا

هي اول مشاركة الي بهالركن
طبعا انا مشكلتي مارح مط فيها رح اختصر عالسريع
ياجماعة اهلي واهل زوجي روح قلبن يتدخلو ب بناتي وانا من النوع للي مابحب اكسر بخاطر حدا بس هنن روح قلبن مثلا بنتي اخدت لعبة بنت خالتها بتلاقي امها بتضربها عإيدها انا بشوف هيك وبتطلع عيوني طيب مابحب حدا يمد ايدو عولادي ولما مرة نترت فيها قال شو زعلتي ؟؟؟
طبعا زعلت هاد مو مزج بناتي حساسين كتير ولا مثلا ستهم ام ابون مثلا كسرولها صحن بتلاقي بتنزل دعاوي يبعتلكن حمة وداء السل طيب حرام بناتي صغار يعني وحدة 4 ونص والتانية سنتين وشوي حرام علين ليش هيك عم يكسرو بخاطري ؟؟
والله ياعالم احيانا بحسن عم يوجهو الحكي الي
وفوق كل هاد مبارح ابن اخي الله يهديه اعد يحملها ويألبها لحد ماقلبت معدتها وشغلتنا طول الليل انا وابوها للفجر مانمت وهي عم تستفرغ لك شو ساوي ؟؟ مو معقول كمان احرمن من اللعب معن
بس جلطوووووووووووني الله وكيلكن

شو ساوي ؟؟ مالي غيركن من بعد الله انا حاسة حالي ام فاشلة او ماعندي شخصية

[نقآء الياسمين ~]

السلام عليكم

اهلين حبيبتي منورة النافذة .. شوفي انا حكيتلك من قبل لازم تحطي خط احمر ..

الاولاد اذا انتي وابوهم والعيلة كلها بدها توجهن وهاد يضربن وهاد مابعرف شو بيتشتتو ..

تمام التوجيه والترباية والتنبيه خليه منك ومن زوجك فقط..

مشان اخواتك لاتسمحي لحدا يمد ايدو ابدا عليهن اولا الضرب مو سياسة عقاب

تانياً سألي اختك قوليها بتحبي امزح مع بنتك واضربها ؟؟ (( طبعا باسلوب جدي )) حتى الكل يعرف انو خط احمر ..

معليش بس يخطأو بناتك اولا هنن صغار تانياً يجو يحكولك وانتي وجهين ..

مافي داعي كل من هب ودب يوجه ويعاتب ..

ومشان اللعب هاد لعب ابن خالها مابعرف مين حبيبتي من اول مابتشوفيه عم يلعب هيك

قوليله مثلا حبيبي بنتي هلأ اكلت اذا بتضل عم تحملها هيك رح تستفرغ وانت اكيد مابتحبها تمرض مو .. وسحبيها شوي شوي منو ..
وديري بالك على اي نوع لعب عم يلعبوه ..

وانتي مالك ام فاشلة بس لانك طيوبة زيادة عم تخافي الناس تتحسس منك

بس مو على حساب بناتك

مابدي الناس يفهمو ردي هجومي لا والله بس لانو انا بعرفها شخصياً ل ام جودي

ومن باب المونة .. والصاحب للي بيبكيك مو للي بيفرحك ..

مابدي شد ع ايدك وقلك برافو خليكي هيك .. لا و100 لا

بدي ياكي ياعسل تكوني فارضة شخصيتك باسلوب حلو .. مو باسلوب تنفر الناس منك

هي ماما اكبر وحدة بالعيلة البنت البكر يعني

والله لما بروح ع بيت ستي عامللي هيبة انا واخي مشانها ليش خلص فارضة ع الكل ولادي خط احمر مزحو معن وكل شي بس ماحدا يوجهلن اي كلمة حكولي الي انا امهم بعرف وجهن عند الغلط ..

اما بالنسبة لحماتك هلأ قوليلها انكسر الشر وانتي نضفي شو كسر ولادك ..
وعادي بدك تتحمليها لانو الست الكبيرة بتزعل لما تلاقي الشغلات عم تتكسر ..

وانتي كوني حذرة اكتر ع تصرفاتن .. واذا جنى من النوع للي بيكسر اختي بدل لها الصحون

ب صحون خاصة للاطفال وخلصي من هالمشاكل ..


واسفة طولت عليكي

وبالتوفيق ياقلبي

[Rimaa]

شوفي نحنا بالعيلة عنا اكتر من كنة وماشالله كلهن عندن ولاد ولما بيجتمعو الكل شوفي نفس القصص ... على هاد ضرب ابن هاد وهاد ما بعرف ... انت اول شي لا تكوني حساسة كتير الولاد بيلعبو بيوقعو بيتقاتلو بس بيضلو يحبو بعض .... يعني لا تخلي شغلات صغيرة تأثر على علاقتك باهلك او بيت حماكي ....

انا كون محلك ما بقبل حدا يضرب او يسب على اولادي ... بس اذا كنت من النوع اللي ما بيحب يخجل حدا او الطيب زيادة عن اللزوم ... صيري احكي اللي بدك تقوليه بالمزح ... او بطريقة لطيفة .. ومباشرة ما بدها خجل ... لما بنتك بتكسر صحن انت حكيها قبل اي حدا تاني ,,, وقوليلها يا ماما ما بيصير هيك هلا ستك بتزعل مننا ,,, او قولي مثلا لك له يا ما ما كسرتي الصحن بكرى بدنا نشتري لستك دزينة بداله .. قدام حماتك وقتا هي ما راح تحط فوق كلامك شي ... بيجوز هني بيعتبرو ان انت مدللة ولادك وعاملين حالن عم يربوهن ويوجهون عنك .. لهيك كوني انت المبادرة قبل لا حدا يعمل اي شي ....

[ضــ ح ـــى]

انا براي اختي لازم تحطي حدود انا متلا ازا بشوف حدا عم يضرب بنتي بشيل عيونو مين ماكان يكون
والله وهيدي نصيحة من اخت ماتتنازلي بحقوقك وماتقولي مابحب اكسر بخاطر حدا لالا
لازم توقفي كل حدا عند حدودو
ولو بكلمة وحدة

ومتل ماقالت رغودة حطي خط احمر بينك وبين اهل زوجك واهلك

وتربية البنات تكون مقتصرة عليكي وعالاب فقط

والباقي مالو علاقة

وليش الدعاوي والشتايم ماحرام اطفال ؟ مابيفهمو
اعزريني اناة اسفة انتي شخصيتك ضعيفة لازم تحطي حدود والا بيتمادو بشي اعظم
اول مرة بتكون عليكي صعبة صح بس مرة تانية بتنبسطي من النتايج

الله يوفقك اختي

[* نور هدى *]

يا اختي
الله حط ولادك أمانة عندك
وحطك الإمام والراعي والمربي
فأنت ليه بتخجلي من الناس بحق الله وحق ولادك وحقك كأم
هادا حقك وحقك ولادك حبيبتي
قولي بكل صراحة لابن أخوك يلعب معها بس مو بالعنف هادا
يعني الدنيا خليت من اللعب اللطيف مع طفل مرهف
شو يقلبها ما يقلبها
تخيلي لا قدر الله وقعت من ايدو أو خبط راسها بشي محل
يعني الواحد ما بيحس إلا بعد أن يقع الفاس بالراس
وين شخصيتك الحازمة اللي بدها تربي البنات
كمان استخدميها في حمايتهن
واللي بتضرب بنتك قوليلها ايه زعلت !!!
مابدي اربي بنتي بالضرب هادا مو أسلوب إنساني ولا حتى إسلامي
رسول الله بعمره ما ضرب بيده طفل ولا امرأة ولا أحد قط إلا جهادا في سبيل الله
ومع هذا ربى أمة بحالها
ولحتى الآن
ووقت بشوفوك زعلتي وعبستي بيحسبوا حسابك صدقيني
( هي طريقة تربية الحيوانات حاشاك التربية بالضرب )
أنا عنك بعض الايد اللي بدها تضرب بنتي صدقيني
ما بتحمل حدا ينزع تربايتي لها بتدخله وضربه مع احترامي لجميع الناس
وستهم إذا دعيت عليهم
ارفعي صوتك وادعيلهم بالهداية والصلاح ويكونوا مرضيين لستهم
واذا عبست في وجهك
قوليلها أحسن تشوفيهن صالحات مرضييات ليك ولا مصابين بالسل عم بيموتوا بين ايديك
معليش كوني قوية معهم
قوليلها كلنا وقت كنا صغار يا ما كسرنا
ماكنا نقصد نأذي ولا نقصد نخرب ؟؟؟
بس هيك طبع الطفل بحب البحث والاكتشاف وبدونهما ما بكبر سليم
أصلا إذا منعتي ولد منهما بنمو ناقص شخصية صدقيني
الله ماحط حدا امانة في رقبتك غير ولادك هما بس بدك تتحاسبي عليهم
وباقي الناس الله يتكفل فيهم
والله أنا مشانك
ربي يعينك ويهون عليكي ويجعل ولادك وبناتك من الصالحين والصالحات

[أم جودي وجنى]

اخواتي والله انا معكن وكلامكن صح

بس شو بدي ساوي مابدي زعل حدا مني وبنفس الوقت ربي بيشهد اني بحياتي مادعيت على اي ولد بالعيلة ولا مديت ايدي على حدا

بس الله يهدي زوجي بيقلي مابدنا مشاكل وبيضلو صغار ولا تتحسسي زيادة

بس انا بتحز بقلبي

حسبي الله ونعم الوكيل

[أمنية الامين]

السلام عليكم .. انا بتفق مع نور هدى في كلامها .. بس بعتبر الانسان هيك وهيك .. يعرف متى يكون جدي مع الناس ومتى يكون طيب وبيفوتلهم .. لكن بايد جدا ريما في طريقة علاجها للمشكلة لانو يبدو ان اختنا من النوع اللي ما بدو يزعل حدا ويفضل السكوت .. اتمنى لك التوفيق كما اتمنى ان يعطيك الله اكثر مما تتمنى يارب

[مجد الاقصى]

اختي لازم تكون الك شخصية ولبناتك كمان
يعني احنا لما بنجتمع مع بعض تقريبا 13 ولد كلهم جيال
وطبعا اكيد رايحين يتقاتلو ورايحين يلعبو
ما واحد بصف مع ولد على ولد بالعكس ازا ولد ضرب ابن عمه ابوه بضربه وبصرخ عليه
واكيد ما في بيت من دون مشاكل بس ازا انتي عودتي ابنك ما يضرب حدا او ما ياخد اشي مو اله صدقيني رايح يتعود على هيك

[@رتوجى@]

أخيتي خير الكلام ما قل ودل
تبغي تمنعي الشتايم والدعاوي
خففي الزيارة ..يدوب سلمو وامشو على طول
واذا سالو جاوبيهم بكل صراحة ... يمكن تلاقي
هذا الاسلوب يوقف هذا الحال...عنك وعن اطفالك..