شاركونا تجاربكم لكل ام وموظفة وسابت بيبى لم يتم السنة فى حضانة للنزول للعمل

[lolo habeby]

السلام عليكم يا بنات
السؤال واضح هل سهل ان الام تسيب بيبى متمش السنة فى حضانة
ولا صعب
واية اضرارة
واية اللى نحطة فى الاعتبار
دعوة للنقاش
يا ريت نتناقش والامهات الموظفات يقوللنا تجاربهم واية اللى فشل واية اللى نجح؟
وشكرا وربنا يعينا ان شاء الله

[*جنة الاماني*]

بصي انا رايي ان اي ام تسيب ابنها او بنتها وهي بترضع ومعتمدة عليها دي بتبقي بتظلم ابنها
بس لو كانت مضطرة او ظروفها صعبة مثلا
فممكن تسيبة مع حد يبقي امين علية زي مامتها مثلا او حضانة مؤثوق فيها
لكن فية امهات للاسف بتسيب البيبي لمجرد انها زهقت من قعدة البيت
بصراحة النموذج دة انا مش بحبة ودايما بنقضة
لكن لو فية ظروف خلت الام مضطرة انها تنزل فممكن تشوف حضانة قريبه من عملها عشان تقدر تبص علي البيبي كل وقت والتاني
انا دة رايي من غير ما اكون جوا الموضوع لاني مجربتش الحكاية دي لسة
ربنا المستعان
يارب اكون قدرت اوصل وجهة نظري كويس

[lolo habeby]

فعلا كلامك صح
ربنا يسهل لنا يا رب

[lolo habeby]

اية يا بنات معقول محدش ودا اولادة حضانة مش معقول ؟؟؟؟؟؟؟؟؟؟؟؟؟

[lolo habeby]

[صاحبة البيت]

لولو حبيبتى
أهلا يا قمر
أنا الحمد لله لم اعمل ولا قبل الزواج ولا بعده
ولكن والحمد لله كنت أتابع أولاد اخواتى لطبيعة الحال اننى لا أعمل
ولكنى أريد ان اقول لكى شىء مهم
كل اخواتى البنات كانوا يعملوا وكانوا وأطفالهم صغار كانوا يضعوهم فى الحضانة
ولكن عندما يمرض الطفل كانت أمه تجلس معه يوم او أثنين ولكن قد لا تستطيع أن تجلس معه فتضطرها الظروف لتركه معى
ورغم بأننى خالته ألا ان قلب الأم لا يهدأ على أبنها أو ابنتها
سبحان الله ..وكنت أتلقى أتصالا كل نصف ساعة لكى تطمئن على طفلها
وأقربها والله يا لولو ..أبن أختى ماشاء الله فى اولى ثانوى منذ شهرين
مرض بالصفرا ...وكان يتصل بأمه فى العمل ليبلغها بانه متعب جدا فما كان منها ألا ان تتصل على لأخذ الولد للدكتور وكانت تتابعنى بالموبايل
(أيوه عندى موبايل )هههههههههههه
لذلك اود أن اقول لكى......والله إن عمل المرأة إن لم يكن لضرورة تحتم عليها فلا حاجة لها أن تترك بيتها وأولادها
فبيتها اولى بها
يكفى أن ابن اختى كان يقول لها ...نفسى أرجع يا ماما ألاقيكى فى البيت
أقعدى يا أمى من الشغل
تخيلى هذا القول من ولد كبير فى السن وليس طفلا
قوليلى بالله عليكى ..ماذا تفعل هذه الأم وهى محاطة ومطالبة بكم من المصاريف
التى لا تنتهى ..بصراحة أعطيها عذرها فهى مطالبة بمساعدة زوجها
اما من لا تحتاج فبيتها وأولادها أولى بها
عموما الظروف بتحكم ..وربنا يساعد الجميع
أسفة للأطالة وتقبلى مرورى

[mero17]

بصى انا هقولك تجربتى انا نزلت الشغل وادم كان 7 شهور فى الأول كنت بروح من 10 الى 2 او 3 بالكتير فا ده كان مسهل على وكنت بسيبه مع ماما وكنت رافضى تماما فكرة انى اسيب ابنى فى الحضانة ولحد دلوقتى برفضها واما ربنا يكرم بالتانى لو ماما مش قدرت تقعد بيه يبقى هسيب الشغل وتتعوض اى مصاريف اللى نا اعوزة اقوله فكرة انك تسيبى ابنك فى حضانة وهو لسه مش بيتكلم ولا فاهم بيكون حرامممممممممممم بيتظلم والله انا جربت اودى ادم حضانة وكان عنده سنتين ابتهدل يا حبيبى لانه مش بيتكلم وكان بيبقى عطشان وجعان مش فاهمين واما اكلمهم يقولىل عمال يعيط تخيلى مرة بقولها طيب تجربى كده تشربيه بعدها اتصلت تانى قالت هو فعلا كان عطشان وشرب حوالى 3 كوب ماء تخيلى انتى عشان كده برفض فكرة الحضانة اما ينطق ويتكلم ابقى اوديه دولت عليكى معلش فرصة الواحد يفضفض

[المشغولة دائما]

مش معقول يا صحصوحة مكان ما اروح اجدك وكمان قولتى الى كنت جاية اقوله
بس انا عندى اضافة
انا عن تجربه كنت الاول اشتغل فى الحكومة ولما ربنا رزقنى بابنتى الكبرى اخذت 3 شهور اجازة وضع ثم اخذت سنة بدون مرتب اجازة رعاية طفل وزوجى رفض بشدة انى اودى بنتى للحضانة مع انه هو كانت والدته تعمل وكان هو واخواته فى الحضانة من عمر شهور قليلة لان زمان لم يكن موجود اجازة وضع ولا غيره ويمكن ده هو السبب الى خلاه يرفض بشدة ان بنته تمر بالى مر بيه وهو صغير
انا من رائى ان الطفل لا يذهب الى الحضانة الا اذا كان قادر على التعبير عن نفسه وعن طلباته (عايز يشرب , عان,فلان ضربه) ولازم يكون بيعرف يتكلم ولو حاجات بسيطة جدا علشان لو حد ضايقه فى الحضانة سواء الاطفال او المشرفين(ربنا يهديهم)
بصراة انا عندى كلام كتيييير جدافى الموضوع لان اولادى لما كبرو (3و4 سنين كنت ابعثهم لحضانة قريبة من مكان شغلى(هو شغل حر لكن مكنش ينفع يفضلو معايا لان ابنى كان بيكسر فى البضاعة)
المهم كانت بنتى تحكيلى على اللى تصرفات المشرفين وانهم بيعاملو الاطفال الرضع بطريقة غبية ويسيبو الطفل يبكى ومحدش يحاول يسكته بصراحة كان قلبى بيتقطع من كايتها وطبعا كل هذا لا يظهر امام الام لان الطفل ما زال رضيع لا يستطيع الكلام
طبعا مدحش كان يقدر يكلم ولادى لانهم كبار وبيعرفو يتكلمو ولانى كنت كل شوية اروح اتابعهم
اسفة اذا كنت طولت عليكم

[lolo habeby]

صاحبة البيت شكرا يا قمر على النصيحة
بس عارفة ساعات بيبقى الواحد غصب عنة لازم يشتغل واكيد الاسباب مقنعة بس ربنا يسهل ان شاء الله
ميرو المشكلة ان ماما مسافرة ولو مكنش كدة كنت وديتة عند ماما بس للاسف
مشغولة
انا عن نفسى مودتش بنتى حضنات خالص بس خسرت انها مبتعرفش تتكلم كويس لانها كانت لوحدة وكنت بخاف عليها من الحضانة بس عارفة الطفل التانى بيبقى قلبك جامد علية شوية بس وكمان لما تكون الام ضرورى انها تشتغل ربنا يسهل
تعبتكم معايا يا قمرات

[ام دادا]

السلام عليكم

انا ابني عمره 4 شهور


تنصحوني اوديه للحضانه او لا ؟

[. تيوليب***]

السلام عليكم ورحمة الله وبركاته

أختي لو كنتي واثقه في الحضانه وإبنك قرب على السنه يعني بيفهم شويه وإنتي مضطره توديه حضانه لظروف شغلك
يبقى إستخيري في الحضانه دي وإتكلي على الله
حبيت أقولك على تجربتي مع إبني الأول لما وديته الحضانه وعمره 10 شهور لأني نزلت شغلي تاني
بصراحه كانت مفيده له وليا
أولاً هو مكانش إتعلم الكلام والنتيجه إنه إتقدم شويه
أهم من كده إنه مكانش بيقبل أي حد غيري أنا وباباه
وكل ما ننزل لحته يبكي ويصرخ ويفضل خايف لغاية ما نرجع البيت
كنت خايفه لما ننزل أجازه عند أهلي بعدها بشهرين يعذبني وميرضاش يروح لحد
الحضانه خلته جرئ وإجتماعي ومبقاش يخاف من الأغراب وخصوصاً لما رحنا عند أهلي أخد عليهم بسرعه
بس لازم تتأكدي من مستوى وإلتزام الحضانه
يعني أنا لفيت كتير ودخلت كل جزء من كل حضانه رحتها قبل ما أقدم له في واحده
الحضانه اللي عجبتني وقدمتله فيها أكتر شئ عجبني هو المديره
كانت شخصيتها قويه وصارمه وكانت بتتدخل في كل كبيره وصغيره في الحضانه
والمشرفات كانوا بيعملوا لها ألف حساب
غير كده وكده مدة غيابي كانت صغيره كنت بسيبه 4 ساعات ونص وكنت بتابعهم على التليفون بإستمرار
يعني الولد مفتقدنيش كثير
هقولك على طريقه تعرفي إذا كان إبنك مبسوط ومرتاح في الحضانه ولا لأ
هي مدى لهفته للذهاب للحضانه
يعني لو بينبسط هتلاقيه ملهوف على روحتها
ولو بيتضايق أو حد بيأذيه أو بيعامله وحش
هتلاقيه متعلق فرقبتك وخايف ما يدخل
متهيألي ده مؤشر لحب الطفل أو كرهه للحضانه
سامحيني طولت عليكي يا قمر

[lolo habeby]

تيوليب بالعكس يا قمر دا انتى افدتينى جدا لانى ان شاء الله على المدارس هودى سوف ان شاء الله
شكرا يا قمر

[eng2008]

السلام عليكم

انا ابني عمره 4 شهور


تنصحوني اوديه للحضانه او لا ؟

السلام عليكم

أنا قرأت الموضوع اليوم فقط

إبنك صغير جدا جدا على الحضانة... يا ريت يا أختي لا تتركيه إلا بعد بلوغه عامين أو عام و نصف على الأقل لو مضطرة

و انتقي حضانة جيدة و اجلسي معه أول يوم لتشاهدي المستوى بنفسك

و لو عندك شخص أمين كالأم و الأخت و الحماة يكون أفضل تركه عندهم